Read lunyore LUKA 2 Bible Online

LUKA 2 - lunyore bible

LUKA 2

¹Mumatukhu yako omunwa kwarula Khumuruchi Omukhongo Agusto mbu abandu bosi musibala esiayarukanga bahandikwe amera.

²Okhuhandikwa khuno khwali okhwokhuranga Kuirinio nali Omwami wesibala sia Siria.

³Abandu bosi bamala batsie okhuhandikwa amera, siomundu mwitaala mwabwe.

⁴Yosefu naye yalomba oluchendo okhurula mwitaala lia Nasareti elili mu Galilaya, natsia mwitaala lia Betselehemu elili Ebuyahudi eliomuruchi Daudi yebul'lwamwo. Yosefu yatsiayo sichila yali owolwibulo lwa Daudi.

⁵Yatsia mbu ahandichilweyo eliira, halala nende Mariamu, owa yali niyahamba. Yali niyabelekha,

⁶na olwa bali mu Betselehemu, litukhu lie eliokhwibula liola.

⁷Niyebula omwana we owokhuranga omusiani, namufuunikha tsingubo tsiaabaana abatoro, ma namukonia musiko sietsing'ombe, sichila sibanyoola obweyangu munyumba yabacheni tawe.

⁸Musibala yisio balimwo abayi abekhalanga musiayo obutukhu bwosi nibalinda ebiayo biabwe.

⁹Om'malaika wo Mwami yabalolekhela ma obukhongo bwo Mwami nibubaakhila. Baria okhusila,

¹⁰nebutswa om'malaika nababool'la, “Muraria tawe. Mulereye amang'ana amalahi, akakhalere obusangali khubandu bosi.

¹¹Okhuba litukhu lino mwitookho lia Daudi mwibuliywe omuhoni, niye Kristo Omwami.

¹²Ne sino nisio esianasibe esimanyilo khwinywe, namunyoole omwana nafumilwe tsingubo tsiabaana abatoro, nakon'ne musiko sietsing'ombe.”

¹³Ne bwangubwangu omukanda omukali okwabamalaika bomwikulu kwalolekha nende om'malaika uyo, nikwembanga oluyali khu Nyasaye nikuboola,

¹⁴“Obukhongo khu Nyasaye ikulu mwikulu ne emilembe khusibala khubandu abamuyanzisianga.”

¹⁵Olwo om'malaika yali narul'le khubo okhukalukha mwikulu, abayi babool'lana, “Chende khutsie Betselehemu, khulole ling'ana eliekhol'le yili, elio Mwami akhumanyisie.”

¹⁶Nibatsia tsimbilo nibanyoola Mariamu nende Yosefu ma nibalola omwana nakon'ne musiko.

¹⁷Olwa bamulola, baboola akom'malaika yali nababooleye khuko omwana.

¹⁸Bosi abahulila bahuka khukabayi baboola.

¹⁹Nebutswa Mariamu yabiikha amang'ana yaka kosi ma nakapaala khwo mumwoyo kukwe.

²⁰Abayi bakalukha nibafumianga nende okhwitsomia Nyasaye khukosi akabali nibahuliye nende okhulola, kosi kali butswa singa om'malaika yali nababooleye.

²¹Inyuma wamatukhu munane, litukhu liokhumuseba liola, nakulikhwa Yesu, eliira liom'malaika yali niyamuhelesia kata nasili okhubelekhwa.

²²Amatukhu kola aka Yosefu nende Mariamu okhulomba omulukha kwokhusiiywa, singa obwa Amalako ka Musa kaboolanga. Ma nibabukula omwana nibamuhila Yerusalemu okhumuhaana khu Mwami,

²³singa kahandikwa mumalako ko Omwami: “Sies'saatsa siosi esiranga okhwibulwa sihanwe khu Nyasaye.”

²⁴Khandi batsia okhuhaana omusango kwebituka bibili nohomba amakhulwi kabili singa lilako lio Omwami liboolanga.

²⁵Mumatukhu yako yali ho omundu mu Yerusalemu owalangwa Simioni. Yali omundu omulahi, owaria Nyasaye, ma yali nalindil'langa okhuhonibwa khwa Baisiraeli. Omwoyo Omutsienukhu yali halala n'naye

²⁶ma yali niyamusubisia mbu siyakhafwe nasili okhulola Masihi wo Mwami tawe.

²⁷Yemel'lwa no Mwoyo okhutsia mu Hekalu, ne olwa abebuli balera mwo omwana Yesu okhumukhol'la akelilako liboolanga,

²⁸Simioni yamubukula mumakhono kaake, niyetsomia Nyasaye, naboola:

²⁹“Luno Omwami uhesisie esilaka munwa sisio, onyala okhulekha omurumikhiliwo afwe mumulembe.

³⁰Okhuba tsimoni tsianje tsimal'le okhulola obuhoni bubwo,

³¹obwa walombela mumoni tsiabandu baabo bosi,

³²Obulafu okhumanyia obulalilo bubwo khu abandu bosi abetsimbia, nende okhulera obukhongo bwabandu baabo ba Isiraeli.”

³³Samwana nende nyina bachenya khumang'ana ka Simioni yaboola khumwana.

³⁴Simioni yabalamila ikhabi ma nabool'la Mariamu, nyina omwana, “Omwana uno wel'lwe nende Nyasaye khulwo okhukwa nende okhuhona khwabenji mu Baisiraeli. Yakhabe esimanyilo okhurula khu Nyasaye esia benji bakhafukule,

³⁵ma alaribule amambiswi kamapaalo kabwe. Ne esibeela singa olukanga siakhafumire omwoyo kukwo.”

³⁶Yaliho omuroobi mulala owesikhaye ma omusiele okhusila, owalangwa Ana, omukhaana wa Fanweli, owoluyia lwa Asheri. Yali niyamenya nomusaatsawe emihika chine nachitaru okhurula nibatesania.

³⁷Ma nasikala omulekhwa emihika amakhumi munane nende chine. Ne emihika yichio chiosi siyarulanga khwo mu Hekalu tawe, yekayakayanga nahonga okhulia om'basu nobutukhu.

³⁸Esaa iyo yenjila okhuhaana embwo khu Nyasaye ma naboola amang'ana komwana khu bosi abali nibalindil'langa Nyasaye okhununula Yerusalemu.

³⁹Olwa Yosefu nende Mariamu bali nibahesisie kosi ake lilako lio Mwami liboolanga, bakalukha Galilaya, mwitaala liabwe elia Nasareti.

⁴⁰Omwana yakhula ma nakufuhala, niyetsula nobuchesi ne tsikhabi tsia Nyasaye tsiali khuye.

⁴¹Siomuhika, abebuli ba Yesu batsitsanga Yerusalemu Khwisabo lie Pasaka.

⁴²Olwa Yesu yali niyahel'le emihika likhumi nende chibili batsia khwisabo singa khasotso.

⁴³Olwe Lisabo liahwa bachiaka oluchendo lwokhukalukha ingo, nebutswa omusiani Yesu yasikala Yerusalemu ne abebuli baabe sibamanyakhwo tawe.

⁴⁴Bapaalanga ali m'mukanda, ma nibachenda oluchendo lwelitukhu elala liosi, kho nibachiaka okhumuruna mubekho nende mubalina.

⁴⁵Sibamunyoola tawe, kho bakalukha Yerusalemu okhumuruna.

⁴⁶Khwitukhu liakhataru bamunyoola mu Hekalu niyekhaye nende abebaali Besiyahudi, nahul'langa aka baboolanga ne nabareeba amareebo.

⁴⁷Bosi abamuhulila bahuka khubuchesibwe nende amakalusio ke.

⁴⁸Olwa abebuli baabe bamulola bang'ang'ala, ma nyina namureeba, “Mwana wanje, busina nokhukhol'la yaka? Papawo n'nase khukhurun'ne nesihenda mwoyo habundu hosi.”

⁴⁹Yabakalusia naboola, “Esichil'le nimuruna nisina? Simumanyile mbu kambel'le okhuba munyumba ya Papa wanje tawe?”

⁵⁰Nebutswa sibamanyilisia likalusio lie yilio tawe.

⁵¹Ma Yesu nakalukha n'nabo Nasareti, yali omuhulili khubo. Nyina yabiikha amang'ana yaka kosi mumwoyokwe nakanil'la khwo.

⁵²Yesu yatsilil'la okhukhula mubuchesi nende mumubili, nayanzwa nende Nyasaye ma nende abandu.