Read lunyore LUKA 21 Bible Online

LUKA 21 - lunyore bible

LUKA 21

¹Yesu yahenga ne nalola abahinda singa baretsanga ebihanwa biabwe mwibiikhilo lie Hekalu.

²Nalola omulekhwa undi omutakha naretsangamwo amapesa kabili.

³Naboola, “Mubool'langa tooto mbu omulekhwa omutakha uyu ureye mwibiikhilo okhuyomba abandi bosi.

⁴Okhuba abandi bosi bahiinisie esihanwa siabwe okhurula khubuhinda bwemiandu chiabwe, nebutswa omulekhwa uyu, khubutakha bubwe uhiinisie ebiokhumenyela bie biosi.”

⁵Abalala khubechi bali nibal'lomanga ake Hekalu, singa obwa yombokhwa namachina amakasu, nende ebihanwa khu Nyasaye. Yesu naboola,

⁶“Yibi biosi ebia mulolanga, amatukhu ketsanga akelichina kata elala lirakhasikalekhwo khulindi tawe; siesindu siakhononibwe.”

⁷Nibamureeba, “Omwibaali, akene yaka kakhekhole lina? Ne nisimanyilo sina esiakhamanyie mbu akene yako kali ahembi okhwekhola?”

⁸Yesu nabakalusia, “Muchetsihe, mubule okhukaatwa. Okhuba abenji bakharul'le mwo abalirumikhila eliira lianje nibaboola, ‘Nise ye’ khandi ‘Inyinga tsana yol'le.’ Nebutswa inywe murakhabalonde tawe.

⁹Kho olwa mwakhahul'le akamahe nende indiri, murakharimukhwe ikholo tawe; okhuba okhwola yako kekhole mbelio, esihesi nisisili okhubaho.”

¹⁰Yatsilil'la okhuboola, “Lihanga elala liakhasere elindi, ne obwami bulala bwakhasere obwami bundi.

¹¹Siahabundu khwakhabeho okhutechela khwesibala okhukali, nende inzala, nende obulwaye bwokhuhambania. Bilibaho ebiokhurisia nende ebilolelo ebikhongo okhurula mwikulu.

¹²Nebutswa yako kosi nikasili balimufumila, bamure mubuhambe, bakhamusandie nibamulera mutsisinakoki, nibamura mububohe; mwakhahilwe imbeli wabaruchi nende abemeli khulwe liira lianje.

¹³Yibu bwakhabe obweyangu bwenywe okhuboola Amang'ana Amalahi.

¹⁴Muchoome mumioyo chienywe, mubule okhupaala nikusili khale obwa mwakhesinje,

¹⁵sichila ise omwene ndimuha amang'ana nende obuchesi, obwabasuku benywe baranyala okhuleka nohomba okhufukula.

¹⁶Abebuli benywe, abata benywe, abaana benywe, abekho benywe nende abalina bakhamusiemane, ne abalala khwinywe mwakherwe.

¹⁷Abandu bosi bakhamubihil'lwe khulwe liira lianje.

¹⁸Nebutswa kata liswi elala eliokhumirwe chienywe siliakhakorekhwo tawe.

¹⁹Mulihonia obulamu bwenywe khulwo okhwefwila khwenywe.

²⁰“Olwa mulilola Yerusalemu nilibotokhan'nwe nende amahe, nilwo olwa mwakhamanye mbu esaa yokhukhuywa okhwe yilio eli ahembi.

²¹Kho abali Ebuyahudi belukhile mubikulu, ne abali mwitaala hakari barule, ne abali esioba barakhenjila mwitaala yimwo tawe.

²²Okhuba amatukhu yako kakhabe akesinyasio, kho kosi akali mu Mahandiko Amatsienukhu kahesibwe.

²³Balitsiboolelwa yabo abaliba nibabelekha nende abali nabaana abatoro mumatukhu yako. Okhuba kwakhabeho om'booko omukali musibala, nelirima lia Nyasaye liakhetsele abandu yaba.

²⁴Abalala bakherwe nolukanga, abandi balihilwa singa ababohe mubibala biosi; ne litaala lia Yerusalemu liakhasenwe nende abandu bebibala bindi okhwola olwetsinyinga tsiabwe tsilihesibwa.

²⁵“Bilibaho ebilolelo muliuba nende m'mwesi nende mutsinyininyini. Ebibala biakhabe nende esihenda mwoyo okhurulana khubikubuli ebikali nende okhuhoola khweinyanza.

²⁶Abandu bakhakobakobe khulwo oburi, nibalindil'langa amang'ana akakhekhole khusibala; okhuba obunyali bwelikulu bulitechesibwa.

²⁷Nilwo olwa balilola Omwana wo Mundu niyetsanga mwilumbesi nali nobunyali ma nende oluyali olwinji.

²⁸Olwa amang'ana yaka kalichiaka okhwekhola, musinjile ma mutiikul'le emirwe chienywe ikulu, sichila okhununulwa khwenywe khuli ahembi.”

²⁹Ma Yesu nabakhupila olukano luno: “Mufwananie khumukhuyu, nende emisaala chindi chiosi.

³⁰Olwa mulolanga nichisebukhile ne mumanya mbu omuhika kwol'le.

³¹Khandi nenywe olwa mwakhalole akene yaka nikekholanga, kho mumanye mbu Obwami bwa Nyasaye buli ahembi.

³²Siahene mubool'langa, lisuba yili siliakhabira amang'ana yako kosi nikasili okhwekhola tawe.

³³Likulu nende esibala biakhabire, nebutswa amang'ana kanje sikakhabire butswa tawe.

³⁴“Mwelinde, khase emioyo chienywe chilanyoola okhuyembekha khulwa okhulia okhwinji, nobukholwi nende obutitikhani bwobulamu yibu. Litukhu yilio liramwitsila singa esireko tawe.

³⁵Okhuba liakhetse singa omureko khu bosi abamenyanga musibala siosi.

³⁶Mwelinde munyinga tsiosi ne musaaye mukufuhasibwe okhuhona khu kosi akaliekhola khandi okhusinjila, imbeli wo Mwana wo Mundu.”

³⁷Yesu yamala amatukhu yako niyechinjia mu Hekalu ne mubutukhu yarula natsia Khusikulu sia Miseituni nabutsayo.

³⁸Abandu bosi batsitsanga mu Hekalu m'mabwebwe khe bamuhulile.