Read lunyore LUKA 22 Bible Online

LUKA 22 - lunyore bible

LUKA 22

¹Lisabo liemikaati echiralimwo amamela, elilangungwa Pasaka liali nilili ahembi okhwola.

²Abesaalisi abakhongo nende abebaali ba Malako bali nibarunanga injila yo khwira Yesu, nebutswa baritsanga abandu.

³Setani yenjila mu Yudasi owalangwa Isikariote, owali mulala khubechi likhumi nababili.

⁴Yudasi narula natsia okhutwakana nende abesaalisi abakhongo nende abalindi be Hekalu obwa nasiemane Yesu, ma namure mumakhono kabwe.

⁵Nabo bayanza ma nibahuchilisania n'naye nabamurunge efetsa.

⁶Yudasi yahuchil'la, ne nachiaka okhuruna injila yokhumusiemana emikanda chiabandu nichiraliho.

⁷Litukhu lie Lisabo liomukaati okuralimwo amamela liola olwesimeme sielikondi esiokhulibwa mu Pasaka sienyekhanga siirwe.

⁸Yesu naruma Petero nende Yohana nababool'la, “Tsie mukhulombele Lisabo elie Pasaka khulie.”

⁹Nabo nibamureeba, “Wenyanga khulombele hena?”

¹⁰Nababool'la, “Hulile! Olwa mwitsa okhuba nimutsitsanga mwitaala, namubukane nende omundu musatsa nachinjile isongo yamaatsi. M'mulonde okhwola munyumba mwanayenjile.

¹¹Mubool'le mwene inyumba, ‘Omwibaali akhureebanga, esikoti siabacheni sili hena esiandiila mwo Epasaka halala nende abechi banje?’

¹²Naye alamumanyia esikoti esikali mukorofa esilombelwe obulahi: mulombelemwo.”

¹³Bamala nibatsia, nibanyoola ebindu biosi nibili singa Yesu yali nababooleye, nibalomba Lisabo Lie Pasaka.

¹⁴Olwe esaa yoola, Yesu yekhala okhulia ebiokhulia nende abechi baabe.

¹⁵Nababool'la, “Ndekomba okhusila okhulia n'nenywe Lisabo lie Pasaka lino nisili okhusal'la.

¹⁶Okhuba mubool'langa sindakhalie khwo khandi tawe, okhwola olwa liakhahesibwe mu Bwami bwa Nyasaye.”

¹⁷Ma nabukula es'sanda, nakhupa embwo khu Nyasaye, ma naboola “Bukule yisi, munywe mwesi.

¹⁸Mubool'langa okhurula luno sinanywe khwo ewaini yemisabibu tawe okhwola olwo Bwami bwa Nyasaye bwakhetse.”

¹⁹Ma nabukula omukaati, nakhupa embwo khu Nyasaye, nakumekania, ma nabahelesia naboola, [“Yiku nom'bili kwanje, okuhanwangwa khulwe inywe. Mukholenge mbwo khulwo khunzitsul'la.”

²⁰Nakhola mbwo khandi khus'sanda, inyuma womukaati, naboola, “Es'sanda sino neindakano ya Nyasaye imbia ekufuhasibwanga namatsahi kanje akasundukha khulwe inywe.][10]

²¹Nebutswa, lole, owanausiemane ali n'nase khumesa khuno.

²²Tooto Omwana wo Mundu atsitsanga okhwirwa singa kaloosibwa, nebutswa alitsiboolelwa omundu uyo owakhamusiemane.”

²³Nibachiaka okhureebana abene khubene niwina khubo owanokhole ling'ana yilio.

²⁴Amahangasi kabukha hakari wabarumwa yabo, niwina mubo opaalwanga khwo okhuba omukhongo okhuyomba abandi.

²⁵Yesu nababool'la, “Abaami betsimbia barukanga abandu babwe khulwe tsingufu, ne abaami yabo balangwanga abakholi bobulahi.

²⁶Nebutswa karakhaba mbwo mwinywe tawe; nikarali oli omukhongo mwinywe okhwola abe omutu okhuyomba bosi; ne uyo oli omwemeli okhwola abe singa omurumikhi.

²⁷Okhuba niwina oli omukhongo: Ni uyo owikhalanga khumesa okhulia, nohomba uyo omurumikhilanga?

²⁸“Inywe ninywe abasikala n'nase mukhutemwa khwanje;

²⁹ne singa Papa wanje yambelesia Obwami nase ndakhamuhelesie Obwami.

³⁰Mwakhalie nimunywa khumesa yanje mu Bwami bwanje, ne mwakhekhale khutsindebe tsioburuchi khulwo okhukhalachila tsimbia likhumi natsibili etsia Isiraeli.

³¹“Simoni, Simoni, hulila! Setani uhuchiliywe okhumuseletsa mwesi singa omundu aseletsanga obule.

³²Nebutswa ise mal'le okhukhusaayila Simoni, mbu obusubili bubwo bubule okhututuha. Nawe olwa wakhangalukhile, olaralisie abaana benywe.”

³³Ne Petero naye namukalusia, “Omwami, ise nderechekhele okhutsia n'nawe mubuhambe, kata mukhufwa.”

³⁴Yesu namukalusia, “Khubool'langa ibe Petero, etaywa sinelakule obutukhu bwalelo nosili okhunyambakhana esia khataru tawe.”

³⁵Ma Yesu nareeba abechi baabe, “Olwa ndamuruma sila omutata kwamapesa kata ebilaro mwaleema khwo esindu siosi?” Nibamukalusia, “Tawe.”

³⁶Naye nababool'la, “Nebutswa luno oli nomutata kwamapesa abukule; ne oli nende imenga, naye mbwo. Ne wosi orali nende olukanga akusie likoti lilie, akule olukanga.

³⁷Okhuba mubool'langa, amang'ana aka Mahandiko Amatsienukhu kaboolanga, ‘Wabalwa halala nende aboni,’ okhwola kahesibwe.”

³⁸Nibaboola, “Omwami lola khuli hano nende tsinganga tsibili.” Naye naboola, “Yitsio tsihela.”

³⁹Yesu narula, singa yali ifwo yiye, natsia Khusikulu sia Miseituni, ne abechi baabe nibamulonda.

⁴⁰Olwa yoola hatsana yababool'la, “Musaaye mubule okhwinjila mukhutemwa.”

⁴¹Ma nabalekha, natsia ahahela lichina okhulaswa, nasikama, nasaaya;

⁴²“Papa, noba noyanza, ohinie es'sanda siokhunyakhana yisi khwise; ne kata mbwo karabba obwe ise ndalilanga tawe, nebutswa obwe ibe olalilanga.” [

⁴³Om'malaika okhurula mwikulu yalolekha khuye namukufuhasia.

⁴⁴Nali mukhusalila okhukali, yasaaya netsingufu okhusila, oluchesi lulwe lwaronyanga singa amatsahi, nikaronyanga hasi.][11]

⁴⁵Olwa yasinjila okhurula mukhusaaya, yatsia khubechi baabe, nanyoola bakonanga tsindoolo, sichila bali nende esibeela.

⁴⁶Nababool'la, “Busina mukonanga tsindoolo? Bukhe musaaye, mubule okhwinjila mukhutemwa.”

⁴⁷Olwa Yesu yali nasil'loma omukanda omukali kwola, nikwemeleywe nende uyo owalangwa Yudasi, mulala khubechi likhumi nababili. Niyesunda ahembi nende Yesu mbu amutsunzune.

⁴⁸Nebutswa Yesu namubool'la, “Yudasi, osiemananga Omwana wo Mundu nokhumutsunzuna?”

⁴⁹Olwa abechi abali nende Yesu balola akali nikenya okhwekhola, nibaboola, “Omwami, khurumikhile tsinganga tsiefwe?”

⁵⁰Ne mulala khubo naremaka omurumikhili wo Mwesaalisi Omukhongo namukhalaka esirwi sisie esiomukhono musatsa.

⁵¹Nebutswa Yesu naboola, “Lekhe! Yaka kahel'le.” Natila khusirwi siomundu uyo, namuhonia.

⁵²Yesu nabool'la abesaalisi abakhongo, nabalindi be mu Hekalu nende abakhulundu abetsa okhumutiila: “Mwitsile nende tsinganga nende tsindabusi okhufumila singa omunuuli?

⁵³Olwa ndalinji n'nenywe sielitukhu mu Hekalu simwayindila tawe. Nebutswa yino niyo esaa yenywe, nibio ebise ebiobwami bwesiilima.”

⁵⁴Bafumila Yesu, nibamuhila munyumba yo Mwesaalisi Omukhongo. Petero yamulonda inyuma ehale.

⁵⁵Omul'lo kwali nikubwan'nwe hakari mulukala, ne nibaba bekhaye halala, Petero niyekhaye hakari mubo.

⁵⁶Omurumikhi mulala omukhaana olwa yalola Petero niyekhaye ahembi nende omul'lo, namureela tsimoni, naboola, “Omundu uyu yali halala nende Yesu.”

⁵⁷Nebutswa Petero niyambakhana naboola, “Omukhaana ibe, ise simumanyile tawe.”

⁵⁸Inyuma wetsinyinga tsindututu omundu undi nalola Petero, naboola, “Ibe oli mulala khubo.” Nebutswa Petero nakalusia, “Omundu ibe, sindi ise tawe!”

⁵⁹Inyuma wetsinyinga tsindututu omundu undi natinyilisia naboola, “Tooto omundu uyu yalinji halala na Yesu; sichila Nomugalilaya.”

⁶⁰Nebutswa Petero naboola, “Omundu ibe, simanyile kata akoboolanga tawe.” Ne olwa yali nasiboola mbwo, etaywa nelakula.

⁶¹Omwami Yesu nasukhana, nahenga Petero. Petero niyetsusia ako Mwami yali namubooleye, “Etaywa nesili okhulakula leelo, naundeyambakhane esiakhataru.”

⁶²Narula esioba, nalakaya obululu.

⁶³Abandu abali nibalindanga Yesu, bamukhol'la inzekhelesi nibamukhupa.

⁶⁴Bamuboha esitambaya mumoni ma nibamureeba, “Rooba khwo, niwina okhutuyile?”

⁶⁵Nibaboola amang'ana kandi khuye amenji akamanyeko.

⁶⁶Olwa bwasia, libukana liabakhulundu babandu lialombwa, elialimwo abesaalisi abakhongo nende abebaali ba Malako. Yesu nalerwa imbeli wesiina siabwe

⁶⁷Nibamubool'la, “Khubool'le, ibe niwe Masihi?” Nebutswa naye nababool'la, “Kata nimubool'la simwakhasubila tawe;

⁶⁸ne kata nimba nimureeba lireebo simunyala okhukalusia tawe.

⁶⁹Nebutswa okhurula luno Omwana wo Mundu alekhala khumukhono musatsa kwa Nyasaye owobunyali.”

⁷⁰Ma bosi nibaboola, “Ibe oli Omwana wa Nyasaye?” Naye naboola, “Inywe muboolanga nimbwo ndi.”

⁷¹Nibaboola, “Khurunanga obukobokheli bundi khandi? Ifwe abene khuhuliye naboolanga nomunwa kukwe omwene.”