Read lunyore LUKA 9 Bible Online

LUKA 9 - lunyore bible

LUKA 9

¹Yesu yalanga abechi baabe likhumi nende babili halala ma nabahelesia tsingufu nende obunyali bwokhuhinia ebisieno biosi nende okhuhonia obulwaye.

²Ma nabaruma batsie okhukamba Obwami bwa Nyasaye nende okhuhonia obulwaye.

³Nababool'la, “Olwa mutsia murakhabukule khwo esindu tawe, kata indabusi, kata omutata kwomusumi, kata ebiokhulia, kata efetsa, nohomba kata likoti liakhabili.

⁴Inyumba yosi eya namwinjisibungwemwo, mumenyemwo okhwola olwa mwakharule mwitaala yimwo.

⁵Ne nibabula okhumwinjisia olwa namurule mwitaala yimwo mubungulule olukukhi oluli mutsindubar'ro tsienywe bube oburibuli khubo.”

⁶Abechi barula nibayeyema mumataala, nibakamba Amang'ana Amalahi, ne nibahonia abandu habundu hosi.

⁷Olwo omuruchi Herode yahul'la kosi akali nikekholanga, naba nende esihenda mwoyo sichila abandu abalala bali nibaboolanga mbu Yohana Omubaputisi usimukukhile okhurula mubafu.

⁸Abandi bali nibaboolanga mbu Elija ulolekhele, ne abandi nabo nibaboola ni mulala khubaroobi bakhale osimukukhile.

⁹Herode naboola, “Yohana ndamukhalaka omurwe, ni mundu sina uyu owambul'langa amang'ana yaka khuye?” Naba nende obuha bwokhumulola.

¹⁰Abechi bakalukha nibabool'la Yesu kosi akabali nibakhol'le. Yesu yababukula natsia n'nabo sibeka mwitaala elilangwa Betsisaida.

¹¹Nebutswa olwemikanda chiabandu chiamanya, chiamulonda. Yesu yabenjisia ma nababool'la ako Bwami bwa Nyasaye, nahonia abali nobuha bwokhuhonibwa.

¹²Olwe eliuba liachiaka okhuyela, abechibe likhumi nababili batsia khuye nibamubool'la, “Sebula abandu batsie mumataala nende mumichitsi banyoole ebiokhulia nende ahokhukona, sichila hakhuli hano nomusitsiimi.”

¹³Nebutswa Yesu yababool'la, “Inywe mubahelesie ebiokhulia.” Nabo nibamukalusia, “Sikhulikhwo nesindu siosi tawe nichirali emikaati chirano nende tsisutse tsibili. Fwana khutsie okhukula ebiokhulia khulwa abandu yaba bosi.”

¹⁴Bali nibaliho abasaatsa abahela etsielefu tsirano. Ma Yesu nabool'la abechibe, “Yikhasie abandu mubitunduma biamakhumi karano karano.”

¹⁵Abechi nibakhola mbwo, ma nibekhasia abandu bosi.

¹⁶Ma Yesu nabukula emikati chirano yichio nende tsisutse tsibili nahenga mwikulu, nakhupila Nyasaye embwo, namekania ma nahelesia abechi baabe babakabul'le.

¹⁷Bosi balia ma nibekura ma abechi nibatol'lesia ebitonye ebiasikala nibitsula ebitinyilo likhumi nende bibili.

¹⁸Litukhu elala Yesu yali nasaayanga yenyene, ne abechi baabe bali ahembi. Ma nabareeba, “Abandu baboolanga ise nise wina?”

¹⁹Nabo nibamukalusia, “Abalala baboolanga niwe Yohana Omubaputisi, abandi baboolanga niwe Elija, ne abandi baboolanga ibe oli mulala khubaroobi bakhale osimukukhile.”

²⁰Ma nabareeba, “Nenywe muboolanga nise wina?” Petero nakalusia, “Ibe niwe Masihi wa Nyasaye.”

²¹Ma Yesu nabakaya barakhabool'lakhwo omundu wosi amang'ana yako tawe.

²²Ma khandi nababool'la, “Khatimba Omwana wo Mundu asal'le okhusila ma asulwe nende abakhulundu, abesaalisi abakhongo nende abebaali ba Malako. Yakherwe, nebutswa inyuma wamatukhu kataru yakhasimukusibwe.”

²³Ma nabool'la abandu bosi, “Omundu wosi niyakhenya okhuba omulondi wanje, okhwola yekaye omwene, yetukhe omusalapa kukwe sielitukhu ma yanonde.

²⁴Okhuba omundu owenya okhuhonia obulamubwe yakhabukosie, nebutswa owakhakosie obulamubwe khulwanje, yakhabuhonie.

²⁵Ni bukhala sina omundu naba niyakhanyoola esibala siosi ne nakosia obulamu bubwe nohomba ye omwene okhutiba?

²⁶Omundu naba niyasimbila ise omurwe nohomba amang'ana kanje, Omwana wo Mundu naye yakhamusimbile omurwe olwaliitsa mubukhongo bubwe, nende mubukhongo obwa Samwana, nende obwa bamalaika abatsienukhu.

²⁷Mubool'langa tooto mbu baliho abalala hano abarakhafwe tawe okhwola olwa balilola Obwami bwa Nyasaye.”

²⁸Amatukhu munane nikabir're inyuma wamang'ana yaka, Yesu yabukula Petero, Yohana nende Yakobo, natsia n'nabo musikulu okhusaaya.

²⁹Olwa yali nasaayanga, likondo lilie liakalukhana, ne tsingubotsie nitsiba tsindafu okhusila nitsing'inang'ina.

³⁰Ne abandu babili nibalolekhaho nibal'lomanga n'naye. Bali Musa nende Elija,

³¹abalolekha nibali nende obukhongo bwomwikulu, nibal'loma nende Yesu khukokhufwa khukhwe okhwa yenya okhuhesia lichoomo lia Nyasaye mu Yerusalemu.

³²Petero nende abasie bali mbali mutsindoolo tsingali, nebutswa olwa bahembukhil'la balola obukhongo bwa Yesu nende yabo babili abali nibasinjiye n'naye.

³³Olwa abandu babili yabo bali nibabukhananga nende Yesu, Petero yamubool'la, “Omwami, nobulahi okhusila mbu khube hano. Khwombokhe amahindu kataru, elala libe elilio, elala elia Musa ne elindi elia Elija.” Siyamanya aka yaboolanga tawe.

³⁴Olwa Petero yali nasiboola yako, lilumbesi lietsa nilibafuunikha; ma abechi nibaria muno olwelilumbesi lietsa khubo.

³⁵Omwoyo kwarul'la mwilumbesi tsana nikuboola, “Uyu niye Omwana wanje owandeela; mumuhulilenje.”

³⁶Olwo omwoyo yikwo kwamala okhul'loma, Yesu yalolekha nali yenyene. Abechi basiling'ana khu kosi akali nikekhol'le. Sibabool'lakhwo omundu wosi mumatukhu yako khukabali nibalutsi tawe.

³⁷Litukhu elialondakhwo olwa bali nibekhele okhurula khusikulu tsana, omukanda omukhongo kwabandu kwakan'na Yesu.

³⁸Omundu mulala mumukanda yikwo yahanzuukha naboola, “Omwibaali khuhombanga ohenge omwana wanje sichila no mwana wanje omutelwa.

³⁹Es'sieno simufumilanga, ma yayula ne nisimusambakasia ne olufilo nilurula mumunwa. Sitsilil'langa okhunyasia oluhono, sisimulekhanga bwangu tawe.

⁴⁰Mombele abechi baabo basihinie, nebutswa sibanyal'le tawe.”

⁴¹Yesu naboola, “Inywe lisuba elirali nobusubili eliebera, ndakhabe n'nenywe nimwefwilanga okhwola lina?” Ma nabool'la omundu uyo, “Leera omwanawo hano.”

⁴²Olwomwana uyo yali natsitsanga khu Yesu, es'sieno siamukoka hasi, nisimusambakasia. Nebutswa Yesu yakondekhela omwoyo kwesifwabi yikwo, nahonia omwana uyo, ma namuhana khu samwana.

⁴³Abandu bosi bachenya muno khulwo obukhongo bwa Nyasaye. Abandu bali nibasichenya khu kosi aka Yesu yali nakholanga, ne nabool'la abechi baabe,

⁴⁴“Murakhebil'le aka nyenya okhumubool'la kano tawe. Omwana wo Mundu atsitsanga okhurebwa mumakhono kabandu.”

⁴⁵Nebutswa abechi sibamanya esifune siamang'ana yako tawe. Liabiswa khubo kho babule okhulimanyilisia, ne baria okhumureeba khuka mang'ana yako.

⁴⁶Obuhingani bwabukhila mubechi, niwina mubo owanobe omukhongo okhuyomba abandi bosi.

⁴⁷Yesu yamanya akabali nibapaalanga ma nabukula omwana omutu namusinjisia khusibafu sie

⁴⁸nababool'la, “Omundu wosi niyakhenjisia omwana uyu muliira lianje aba niyenjisianga ise, ne wosi ounyinjisianga ise, yenjisinjia uyo owaruma. Okhuba oli omutu khwinywe mwesi, niye omukhongo.”

⁴⁹Yohana naboola, “Omwibaali, khwalutsi omundu nahinianga ebisieno muliira lilio, nikhumukaya sichila sialondananga n'nefwe tawe.”

⁵⁰Nebutswa Yesu namubool'la, “Murakhamukaya tawe, sichila oramufukulanga tawe nowolubeka lwenywe.”

⁵¹Olwa amatukhu kokhubukulwa khwa Yesu okhutsia mwikulu kali ahembi okhwola, yalola mbu atsie Yerusalemu.

⁵²Yamala naruma abarumwa bamwekholel'le, nibatsia nibenjila mwitaala elia Basamaria, bamunyool'le habundu hokhukona.

⁵³Nebutswa abene taala sibayenya okhumwinjisia tawe sichila yali natsitsanga Yerusalemu.

⁵⁴Kho abechi baabe, Yakobo nende Yohana olwa balola mbwo, nibaboola, “Omwami, wenyanga khulache omul'lo kurule mwikulu kwitse kubamulule?”

⁵⁵Nebutswa naye nasukhana ha bali nabakondekhela.

⁵⁶Naboola simumanyile imbila eyo Mwoyo owamulondangakhwo tawe. Okhuba Omwana wo Mundu siyaitsa atibie obulamu bwabandu nebutswa abuhonie.[5]

⁵⁷Olwa bali nibali khuluchendo omundu mulala yabool'la Yesu, “Nakhulonde hosi aha notsie.”

⁵⁸Yesu namubool'la, “Ebibwe bili namako kabio, ne amanyonyi kali nebitsu biako, nebutswa Omwana wo Mundu abula kata ahokhuhulukhila nokhweyalisia.”

⁵⁹Nabool'la omundu oundi, “Nonda.” Nebutswa uyo naye naboola, “Omwami, mbuchilil'la nzie okhuyabila Papa wanje mbelio.”

⁶⁰Yesu namubool'la, “Lekha abafu bayabile abafu babwe abene, nebutswa ibe tsia olandie ako Bwami bwa Nyasaye.”

⁶¹Ne omundu undi namubool'la, “Nakhulonde, nebutswa umbuchilil'le sebulane nende abomunyumba yanje mbelio.”

⁶²Yesu namubool'la “Wosi ofumilanga imbako yokhulima ma akhupa amasemo inyuma siakwan'ne mu Bwami bwa Nyasaye tawe.”