Read lunyore OKHUKALUKHILA MUMALAKO 1 Bible Online

OKHUKALUKHILA MUMALAKO 1 - lunyore bible

OKHUKALUKHILA MUMALAKO 1

¹Esitapu yisi siahandikwamwo amang'ana ka Musa yali okhul'loma khu Baisiraeli nibali musitsiimi elubeka lwebukwe womuchela kwa Yorodani. Bali nibali mwibanda liomuchela kwa Yorodani ahembi Sufu hakari helitaala lia Parani ndili elubeka l'lala ne amataala ka Tofali, Labani, Heserotsi nende Disahabu nikali elubeka lundi.

²(Noluchendo lwamatukhu likhumi nende elala okhuchenda okhurula khusikulu sia Sinai okhutsia Kadeshi Barinea nolondeye khunjila yemubikulu biesibala sia Edomu.)

³Litukhu liokhuranga khumwesi kwelikhumi nal'lala mumuhika kwamakhumi kane okhurula Abaisiraeli nibarula musibala sie Misiri, Musa yabool'la abandu amang'ana kosi ako MWAMI yamulaka ababool'le.

⁴Yaka kekholekha inyuma wo MWAMI okhuleka omuruchi Sihoni wa Baamori owali narukanga okhurula mwitaala lia Heshiboni nende omuruchi Ogu wa Basani owarukanga amataala ka Ashitarotsi nende Edirei.

⁵Kali olwabandu bali ebukwe womuchela kwa Yorodani musibala sia Moabu olwa Musa yachaaka okhwinoosia amalako nende amebaalo ka Nyasaye. Musa naboola mbu,

⁶“Olwa khwali musikulu sia Sinai, OMWAMI Nyasaye yakhubool'la ifwe mbu, ‘Mumal'le okhumenya oluhono hasikulu sino.

⁷Musambule ekambi ma mutsilil'le noluchendo. Mutsie musibala siebikulu sia Baamori nende mutsingongo etsili ahembi n'nasio — mwibanda lia Yorodani, nomubikulu nende khumaloba akali khumialo nomutsingongo akali enandete nende khuluchinga lweinyanza ya Mediterenia. Mutsie musibala sia Kanaani kata nende imbeli webikulu bia Lebanoni okhwola khumuchela kwa Efurate.

⁸Liloba yili liosi nilio elio MWAMI yasubisia okhuhelesia abakuka benywe, Aburahamu, Isaka, nende Yakobo nende abolwibulo lwabwe. Tsie mulibukule.’ ”

⁹Musa yabool'la Abaisiraeli mbu, “Olwa khwali nikhusili musikulu sia Sinai, ndamubool'la mbu ‘Omulimo kwokhumwemel'la inywe kubeyekhwo omusiro khu ise. Sikuli okwanyala sienyene tawe.

¹⁰OMWAMI Nyasaye wenywe wamukhol'le okhuba abenji singa tsinyininyini tsiokhwikulu.

¹¹OMWAMI nayanza, Nyasaye wa bakuka benywe, amukhole mumetekhe okhuyomba hali elefu ndala ma khandi amukhole okhuba abahinda singa obwa yamusubisia.

¹²Nebutswa ise sienyene ndakhetuukha mbwena omulimo omusiro yiku kwokhumwabukhania mubusoolo bwenywe?

¹³Mwahule abasaatsa abalwenyukhu, abechesi abamanya amenji okhurula mubuli lwibulo ma nzia okhubakhola okhuba abemeli benywe.’

¹⁴Ne mwali okhuhuchil'la mbu yaka namang'ana amalahi kokhukhola.

¹⁵Kho ndali okhubukula abemeli abechesi khandi abamanyile amenji, aba mwali okhwela okhurula mubuli lwibulo, ma nimbakhola okhuba abemeli benywe. Abalala khubo balindanga abandu elefu ndala, abandi bahebwa abandu amakhumi karano ne abandi bahenga abandu likhumi. Khandi ndela abemeli bandi mutsinzibulo tsiosi.

¹⁶“Olwene yilwo ndababool'la, ‘Muhuyie khukoburambane bwakhetsa hakari habandu benywe. Muhaane obukhalachi bwahabwene khubuli obusoolo, kata nikali buli khubandu benywe noho buli khubandu abacheni bamenyibwa mwinywe.

¹⁷Murakholakhwo ebiela khumundu wosi tawe, obukhalachi bwenywe bube obwahabwene, kata abe nali wina. Murakhariakhwo omundu wosi tawe sichila obukhalachi bwosi obwa muhaananga burulanga khu Nyasaye. Nikakhaba kuliho omuse omutinyu okumuramile, muleere khu ise, ne nase nzia okhukhalaka omuse yikwo.’

¹⁸Olwene yilwo ndamuhelesia amalako kokhurumikhila khusindu siosi esiamukholanga.

¹⁹“Ifwe khwali okhukhola ako MWAMI Nyasaye yakhulaka okhukhola. Khwarula khusikulu sia Sinai nikhubir'ra musitsiimi esikali khandi esiokhurisia nikhuhengele musibala siebikulu sia Baamori. Olwa khwoola Kadeshi Barinea,

²⁰Ise ndamubool'la, ‘Luno mwol'le musibala siebikulu sia Baamori, esio MWAMI Nyasaye wefwe, okhuhelesianga.

²¹Lola OMWAMI Nyasaye wabakuka akhuhelesianga esibala esia yakhusubisia. Henge mulole siesila. Tsie musibukule singa OMWAMI yalaka. Murasisil'la tawe kata muraria tawe.’

²²“Nebutswa mwetsa khu ise ma nimuboola mbu, ‘Lekha khurume abandu imbeli wefwe khulwo khusihengelesia masilisi kho abandu tsana babe abanyala okhukhubool'la injila indahi okhusila eyakhunyala okhulondakhwo. Khandi bakhubool'le obwamatookho kaho kombokhwa.’

²³“Yako kalolekha amalahi okhukakhola, kho ndeela abasaatsa likhumi nababili, mulala okhurula mu buli lwibulo.

²⁴Batsia musibala siebikulu okhwola mwibanda lia Eshikoli ma nibalambuula esibala yisio.

²⁵Olwa bakalukha, baleera ebiamo ebiabali nibanyooyeyo, ma khandi nibaboola mbu esibala sio MWAMI Nyasaye wefwe akhuhetsanga nesinolu okhusila.

²⁶“Ne inywe mwali okhufukula lilako lio MWAMI Nyasaye wenywe, kho sinamwinjile musibala yisio tawe.

²⁷Mwali okhumumuchila abene khubene nimuboola mbu, ‘OMWAMI wakhusinyikhila ifwe. Yakhuhinia Emisiri khulwo khukhura mumakhono ka Baamori kho babe abanyala okhukhwiira ifwe.

²⁸Esichila khutsieyo nisina? Akabandu abakhwaruma okhulambuula esibala babooye kakhurimuye ikholo. Bakhubooleye mbu abandu bomusibala yisio nabetsingufu khandi abarambi okhuyomba ifwe khandi bamenya mumatookho akasirwa nende amasisi akoolanga mumalumbesi. Balola abaana ba Anakimu, emindu emikali ebwene yiyo!’

²⁹“Nebutswa ndamubool'la mbu, ‘Muraria abandu yabo tawe.

³⁰OMWAMI Nyasaye yeetsa okhumwemel'la, khandi yeetsa okhumulwan'na singa obwa mwalola namulwan'nanga Emisiri

³¹nende musitsiimi. Mwalola singa yamuleera sila amanyakhano khunjila yosi okhwola hano, singa papa anyala okhuchinga omusiani uwe.’

³²Nebutswa mukosi akandamubool'la, inywe simwali abanyala okhusubila OMWAMI tawe,

³³kata nikali mbu hali khasotso OMWAMI yemelanga imbeli wenywe okhumukhaabila habundu hokhukhupa ekambi. Khulwo okhumanyia injila, OMWAMI yemelanga imbeli wenywe nali musiilo yomul'lo butukhu ne m'basu yamwemel'langa nali musiilo yelilumbesi.

³⁴“OMWAMI yahul'la okhumumuchila khwenywe ma nahambwa nelileko ma yamala niyesuha naboola,

³⁵‘Abulaho kata mulala khwinywe okhurula mulwibulo lwetsimbi yilu owakhenjile musibala esinolu esia ndasubisia okhuhelesia abakuka benywe tawe.

³⁶Narali Kalebu omusiani wa Yefune yenyene niye owakhenjile musibala yisio. Ye watsilil'la okhusubila mwise, kho namuhelesie ye nende abolwibulo lulwe esibala esia amal'le okhulambuula.’

³⁷Khulwo bubi bwenywe OMWAMI yahambwa nelileko khu ise ma naboola mbu, ‘Kata ibe, Musa siolinjila musibala yisio tawe.

³⁸Nebutswa otinyilisie obunaayi bwomulondi uwo Yoshwa omusiani wa Nuni. Nayemel'le Abaisiraeli okhubukula esibala yisio.’

³⁹“Ma OMWAMI nakhubool'la ifwe fwesi mbu, ‘Abaana benywe, abasili abatitiiti khulwokhumanyilisia amabi nohomba amalahi, nibo abakhenjila musibala yimwo; abaana bamwaboola bakhatiilwe nende abasuku benywe. Ise ndakhabahelesie esibala yisio, ma bo bakhabukule esibala yisio.

⁴⁰Nebutswa inywe musukhane inyuma ma mukalukhe musitsiimi khunjila etsitsanga khumukhonokwe Inyanza Inzakhanyu okulangwanga Akaba.’

⁴¹“Nenywe mwangalusia nimuboola mbu, ‘Khwayona imbeli wo MWAMI. Nebutswa luno khulalwana, singa obwo MWAMI Nyasaye nabe nakhulachile okhukhola.’ Kho buli khwenywe yamala niyerechekha okhulwana napaalanga mbu nobutoro okhuseera esibala siomubikulu.

⁴²“Nebutswa OMWAMI niyambool'la mbu ‘Bachetsiyie balekhe okhuseera, sichila sinzia okhuba n'nabo tawe, ne abasuku beetsa okhubaleka.’

⁴³Ndamubool'la ako MWAMI yali niyambooleye, nebutswa simwabukulamwo obuha tawe. Mwali okhusuula OMWAMI, ne mumwekhonyo kwenywe mwatsia butsia musibala siomubikulu.

⁴⁴Ma Abaamori abamenya mubikulu yibio nibarula singa omusinga kwetsinzukhi okhumulwana. Bamulondel'la okhwola Horima ha bali okhumulekela musibala siebikulu sia Edomu.

⁴⁵Kho mwamulakayila OMWAMI okhumukhonyel'la, nebutswa OMWAMI siyahuhia khubulakayi bwenywe nohomba okhubukula obuha mwinywe tawe.

⁴⁶“Kho olwa khwali nikhwamenyele Kadeshi khulwo oluhono olurambi,