Read lunyore OKHUKALUKHILA MUMALAKO 10 Bible Online

OKHUKALUKHILA MUMALAKO 10 - lunyore bible

OKHUKALUKHILA MUMALAKO 10

¹“Ma OMWAMI niyambool'la mbu, ‘Khalaka orubao rwamachina rubili rube singa orwokhuranga ma olombe lisanduku lietsimbaho okhurubiikhamwo; ma wanichile witse ahandi khusikulu.

²Nase nzia okhuhandika khuruchina yirwo aka ndahandika khuruchina orwa wali okhwaraka, ma nawe nilwo olwa witsa okhurubiikha mwisanduku.’

³“Kho ndamala nombe lisanduku khumusaala kwomusisia ma nikhalaka orubao rwamachina rubili singa orwali orwokhuranga nirubukula ma ninzia n'narwo khusikulu.

⁴Ma OMWAMI naruhandikakhwo amang'ana amatelwa singa aka yahandika olwokhuranga, Amalako Likhumi aka yamuhelesia olwa yal'loma okhubir'ra mumul'lo khwitukhu elia mwebunjikha hasikulu. OMWAMI yamala yambelesie orubao rwamachina tsana,

⁵nase nisukhana niserenjela okhurula khusikulu. Ma singa butswa OMWAMI yali okhundaka, ndamala nirubiikha mwisanduku elia ndali ninombele ma rubetsanga mwisanduku tsana okhurula olwene yilwo.”

⁶(Abaisiraeli bamala barule habitaho ebialinji biabandu ba Yaakani, nibatsia Mosera. Haruni yamala afwile ebwene yiyo ma nayabilwayo, ne omusiani uwe Eliasa yamala abukule obukono bubwe singa omwesaalisi.

⁷Okhurula Mosera batsia Kudikoda ma khandi nibatsia Yotibatsa, habundu hamaatsi kali amenji.

⁸Habwene yaho hasikulu, OMWAMI yahula abandu bolwibulo lwa Lawi okhuba abalindi be Lisanduku lie Indakano, okhumurumikhila singa abesaalisi, nende okhulaama tsikhabi muliira lilie. Ne emilimo yitsi tsisili etsiabwe okhwola leelo.

⁹Nisio esiachila olwibulo lwa Lawi niluranyoolakhwo omukabwa kwomukunda singa tsinzibulo tsindi; omukabwa kwabwe kwali okhuba abesaalisi bo MWAMI, singa OMWAMI Nyasaye wenywe yesuha.)

¹⁰“Ndali okhumenya khusikulu amatukhu amakhumi kane om'basu nobutukhu, singa ndamenyakhwo olwokhuranga. OMWAMI yambulila khandi ma nahuchil'la mbu sinamumume inywe tawe.

¹¹Ma niyambool'la nzitse okhumwemel'la kho mwinjile ma mubukule esibala esia yali niyesuha okhuha abakuka benywe.

¹²“Luno, inywe abandu ba Isiraeli, hulile ako MWAMI Nyasaye wenywe yenyanga mukhole. Mwekayakaye OMWAMI ma mukhole kosi aka amulakanga okhukhola. Mumuyanze, mumurumikhile nomwoyo kwenywe kwosi,

¹³khandi mulonde amalako kaake kosi. Ngahaananga khwinywe olwaleelo khulwa okhukarumikhila.

¹⁴OMWAMI niye mwene likulu lieikulu okhusila; esibala nesisie khandi, nende biosi ebili khusio.

¹⁵Nebutswa obuyanzi bwo MWAMI khubakuka benywe bwali obukhongo okhusila mbu yamwahula inywe musilenje siabandu bandi, nenywe musili abandu baabe abeelwa.

¹⁶Khulwe yako, okhurula olwaleelo mubetsenje abahulili khu MWAMI ma mulekhe okhutinyia emioyo chienywe.

¹⁷OMWAMI Nyasaye wenywe nomukhongo okhubira abanyasaye bosi nende obunyali bwosi. Nomukhongo khandi nomukufu, khandi nowokhuribwa. Sakholanga ebiela tawe, khandi sahetswanga tawe.

¹⁸Akholanga akanyalikha okhulola mbu ababisandu nende abalekhwa bakhol'lwanga obulahi; ayanzanga abacheni abamenyibwa mubandu befwe, ne abahelesianga ebiokhulia nende tsingubo.

¹⁹Kho nenywe mukhoya okhuyanza abacheni abamenyibwa yabo, sichila nenywe mwalinji abacheni abamenyibwa Emisiri.

²⁰Muhulile OMWAMI Nyasaye wenywe ma mumwekayakaye yenyene. Mube abasubilwa khuye ma mwesuhilenje muliira lilie lionyene.

²¹Mumwitsoomie sichila niye Nyasaye wenywe, khandi mumal'le okhulola netsimoni tsienywe abene ebindu ebikhongo nende ebiokhuhuka ebia yamukholeye.

²²Olwa bakuka benywe batsia Emisiri, bali butswa abandu amakhumi kane nakataru bonyene. Nebutswa luno OMWAMI Nyasaye wenywe umal'le okhumuhinjihiia okhuba abenji singa tsinyininyini tsiokhwikulu.