Read lunyore OKHUKALUKHILA MUMALAKO 11 Bible Online

OKHUKALUKHILA MUMALAKO 11 - lunyore bible

OKHUKALUKHILA MUMALAKO 11

¹“Muyanze OMWAMI Nyasaye wenywe khandi mulonde amalako kaake kosi khasotso.

²Mwitsul'le akamumal'le okweka khu MWAMI luno olwa mwayakan'nenje n'naye. Mwali inywe; tawe abaana benywe, ababukananga nende yaka. Mwali okhulola obukhongo bwo MWAMI, nobunyali bubwe, netsingufu tsitsie,

³nende akamangalimwa kaake. Mwalola aka yakhola khumuruchi we Misiri halala nende esibala sisie siosi.

⁴Mwali okhulola singa OMWAMI yamulula abasikari ba Bamisiri bosi, halala netsisululi tsiabwe nende amakaari kabwe khulwo okhukahila nende Inyanza Inzakhanyu olwa bali nibamulondel'langa.

⁵Mumanyile ako MWAMI yamukhol'la musitsiimi nimusili okhwola hano.

⁶Mwitsul'langa singa OMWAMI yakhola khu Datsani nende Abiramu abasiani ba Eliabu womulwibulo lwa Rubeni. Mutsimoni tsia buli mundu liloba liekukha ma ndibamila bosi babili halala nabetsinyumba tsiabwe nende amaheema kabwe, nende abakholi babwe halala netsing'ombe tsiabwe.

⁷Yee, ninywe abalola ebindu ebikali yibi ebio MWAMI yakhola.

⁸“Mulonde amalako kosi akamuhelesisie olwaleelo kho mube abanyala okhwambukha omuchela nende okhumenya musibala esia muli ahembi okhwinjilamwo.

⁹Khandi mwakhamenye amatukhu amenji musibala siobuhinda nende liloba elilimwo obunolu obwinji elio MWAMI yasubisia okhuhelesia abakuka benywe nende abolwibulo lwabwe.

¹⁰Liloba elia muli ahembi okhubukula silifwana nende liloba lie Misiri elia mwamenyangamwo tawe. Ebwene iyo olwa mwaraakanga ebiraakwa, mwatiyanga butinyu khulwo okhusama emikunda;

¹¹nebutswa liloba elia muli ahembi okhwinjilamwo neliloba liebikulu nende amabanda, liloba lieifula ekwitsangamwo.

¹²OMWAMI Nyasaye wenywe niye olihengelesianga nende okhulilinda omuhika kwosi.

¹³“Khulwe yako mulonde amalako akamuhelesisie olwaleelo. Muyanze OMWAMI Nyasaye wenywe khandi mumurumikhile nomwoyo kwenywe kwosi.

¹⁴Nimwakhakhola mbwo, OMWAMI anyala okhuleera ifula olwa muba nimuchienyele, singa mumuhika nende Musubwe kho mube abanyala okhunyoola obuswache, ewaini nende amafura komuseituni,

¹⁵khandi obunyasi khulwe tsing'ombe tsienywe. Namunyoole ebiakhulia biosi ebia mwakhenya.

¹⁶Murakhahuchil'la okhuhiinibwa khu MWAMI khulwo okhwekayakaya nende okhubarumikhila abanyasaye bandi tawe.

¹⁷Nimwakhakhola mbwo OMWAMI yakhamusinyikhila. Yeetsa okhubisia ifula elekhe okhukwa, ma liloba liitsa okhuba eliomu eliebiokhulia birakhakhulamwo tawe. Kho khubwangu mulafwila musibala yisio kata nikali neliloba lilahi eliamuhelesianga.

¹⁸“Mwitsul'le amalako yaka ma mukatile butinyu. Mukabohe khumakhono kenywe, khandi mukahandie khubweni bwenywe singa esitsusio.

¹⁹Mwekesie abaana benywe amalako yaka. Mul'lome khukamalako yaka nimuli hango kata nimuli ehale okhurula hango, kata olwa muba nimuhuluukhanga nohomba nimukholanga emilimo.

²⁰Mukahandike khulmatilwa kemiliango chietsinyumba tsienywe nende kemiliango chietsikalanga ebilibwa bienywe.

²¹Kho kachile inywe nende abaana benywe mumenye amatukhu amenji musibala esio Mwami yasubisia okhuha abakuka benywe. Mwakhamenye musio khuluhono lwelikulu lili ikulu wesibala.

²²“Mulonde mubusubilwa amalako kosi akamuheye olwaleelo. Muyanze OMWAMI Nyasaye wenywe, ma mukhole kosi akaamulakanga ma mube abasubilwa khuye.

²³Ma yeetsa okhukhunga tsinzibulo yitsio tsiosi olwa mwitsa okhuba nimwesundanga imbeli ne mwitsa okhubukula esibala sia betsinzibulo tsingali okhumuyomba khandi abali netsingufu okhumusila.

²⁴Liloba liosi elia namubir'remwo nelienywe. Esibala sienywe nasichiachile musitsiimi elubeka lwenandete okhwola khusikulu sia Lebanoni elubeka lwesinyolu. Khandi okhuchiachila khumuchela kwa Efurate elubeka lwebukwe okhwola khu Nyanza ya Mediterenia eli elubeka lwe masaba.

²⁵Habundu hosi hanamutsie musibala yimwo, OMWAMI Nyasaye wenywe nakhole abandu okhumuria, singa obwa yamusubisia, ne abulaho owakhanyala okhumwikal'la.

²⁶“Olwaleelo muhetsanga obweyangu mwelekhwo hakari hokhuhebwa tsikhabi nende okhunyoola esilaamo.

²⁷Mulahebwa tsikhabi, nikali mwakhalonda amalako ko MWAMI Nyasaye wenywe akamuhetsanga litukhu lino;

²⁸nebutswa mulanyoola esilaamo, nikali mwakhafunaka amalako yaka, khandi mukalukhane okhwekayakaya abanyasaye bandi abamusili okhwekayakyakhwo tawe.

²⁹Olwo MWAMI yeetsa okhumuleera musibala esia namumenyemwo, mureebe tsikhabi okhurula khusikulu sia Kerisimu; ne esilaamo okhurula khusikulu sia Ebali.

³⁰(Ebikulu b'bili yibi bili elubeka lwe emasaba wo Muchela kwa Yorodani musibala sia Bakanaani abamenyanga mwibanda lia Yorodani. Bili khulubeka lwe masaba, sieli ehale okhurula khumisaala emitsienukhu etsili More ahembi nelitookho lia Giligali.)

³¹Muli ahembi okhukhalania omuchela kwa Yorodani ma mubukule esibala sio MWAMI Nyasaye wenywe amuhetsanga. Nimusibukula ma mumenye musio,

³²mube nesinani okhulonda amalako kosi akamuhelesianga litukhu lino.