Read lunyore OKHUKALUKHILA MUMALAKO 12 Bible Online

OKHUKALUKHILA MUMALAKO 12 - lunyore bible

OKHUKALUKHILA MUMALAKO 12

¹“Kano niko amalako aka mukhoya okhulonda oluhono lwosi olwa musili mwoyo musibala esio MWAMI, Nyasaye wabakuka benywe, amuhelesianga. Mukahulile!

²Musibala esia namubukule okhumenyamwo, mutuye siahabundu hosi ahabandu bekayakayilanga abanyasaye babwe khubikulu ebirambi, nende ebimbichiti nende hasi wemisaala emibisi.

³Mukoke hasi etsisambwa tsiabwe ma mutonyanie etsisiilo tsiamachina etsiabanyasaye babwe. Musambe ebifwanani biabwe bwomunyasaye mukhasi Ashera ma mukoke hasi ebiniini biabwe, kho mbu barakhekayakaywakhwo habundu yaho tawe.

⁴“Murekayakaya OMWAMI Nyasaye wenywe munjila singa eyabandu yaba bekayakayilangamwo abanyasaye babwe tawe.

⁵Mubuli lusoma lwetsinzibulo tsienywe tsiosi, OMWAMI nayahule habundu nalebe ahabandu bakhoya okhwitsa halala imbeli wokhubaho khukhwe ma bamwekayakaye.

⁶Habwene yaho mukhoya okhuhaana emisango chienywe chiokhusambwa, emisango chindi chiosi, esielikhumi sienywe nebihanwa bienywe ebia mwesuha okhuhaana khu MWAMI, ebihanwa biobwehani, nende esibulwa siokhuranga khutsing'ombe tsienywe nende khumakondi kenywe.

⁷Yaho imbeli wo MWAMI Nyasaye wenywe, owamulaamiye ikhabi, inywe nende abetsinyumba tsienywe mulalia nimusangal'la ebindu ebilahi ebia mwafulukhanila.

⁸“Olwe inyinga iyo yakhabe niyol'le, murakholakhwo singa mwakhol'lenje tawe. Okhwola luno, mwayekayakayilenje singa obwa mwenyele,

⁹sichila mwali nimusili okhwinjila musibala esio MWAMI Nyasaye wenywe amuhelesianga, aha namumenye mumulembe.

¹⁰Olwa namukhalanie omuchela kwa Yorodani, OMWAMI namuhuchil'le okhubukula esibala yisio ma namumenyemwo. Namusoole okhurula khubasuku benywe bosi, nenywe namumenye mumulembe.

¹¹OMWAMI nayahule habundu halala aha nayekayakayilwenje, ne habwene yaho namulerenjeho ebindu biosi ebia ndali okhumulaka: emisango chienywe chiokhusambwa, nende emisango chienywe chindi; esielikhumi sienywe nende ebihanwa bienywe, nende ebihanwa ebitsienukhu ebia mwesuha okhuhaana khu MWAMI.

¹²Habwene yaho mube nobusangali imbeliwe halala nabaana benywe, abarumikhili benywe, nende Abalawi abamenyanga mumataala kenywe; mwitsul'le mbu Abalawi sibalikhwo nomukabwa kwomukunda kwabwe abene singa inywe tawe.

¹³Murahaana emisango chienywe hosi aha muba nimwenyele tawe;

¹⁴okhwola muchihaana habundu halala aho MWAMI namwahul'le mulusoma l'lala olwo mutsinzibulo tsienywe. Habwene yaho honyene niho aha mukhoya okhuhaana emisango chienywe echiokhusambwa ma mukhol'leho ebindu bindi biosi ebia mal'le okhumulaka.

¹⁵“Nebutswa muli abalakhuule okhwira nende okhulia emiruko chienywe hosi hosi aha mumenyanga. Munyala okhulia ebinji okhuhelana nende obwa Nyasaye yali okhumuhelesia. Inywe mwesi, abasiyikhu kata abomusilo munyala okhuchilia, singa butswa munyala okhulia inyama yeliaka nohomba eyesitsusu.

¹⁶Nebutswa murarumikhila amatsahi kabio singa ebiokhulia tawe, okhwola mukachetul'le hasi singa amaatsi.

¹⁷Esindu siosi esihanwa khu MWAMI singa omusango siralilwa ahamumenyele tawe: Kata esielikhumi siobuswache bwenywe, noho ewaini yenywe, nohomba amafura komuseituni kenywe, nohomba esibulwa siokhuranga esiokhutsing'ombe tsienywe kata amakondi, nohomba ebihanwa ebiamwesuha okhuhaana khu MWAMI, noho emisango chienywe chiobwehani, nohomba ebihanwa bindi biosi.

¹⁸Inywe nende abaana benywe, halala nabarumikhili benywe nende Abalawi abamenyanga mumataala kenywe, mukhoya okhulila emisango yitsi imbeli wo MWAMI Nyasaye wenywe, habundu halala hokhwekayakayila aho MWAMI Nyasaye wenywe yahula. Ne mukhoya okhusangal'la ebiene yibio khusiesindu esia muba nimukhol'le.

¹⁹Kho mulole mbu murebil'lakhwo Abalawi, oluhono lwamusili mwoyo musibala sienywe tawe.

²⁰“Olwo MWAMI Nyasaye wenywe nakalihie esibala sienywe singa amal'le okhwesuha, munyala okhulia inyama lwosi olwa mwenyele.

²¹Nikakhaba mbu habundu hokhwekayakayila halala ali ehale okhusila, kho lwosi olwa mwenyele, munyala okhwira ndala khutsing'ombe nohomba khumakondi ako MWAMI amuheye, ne munyala okhuchiliila ingo singa ndali okhumubool'la.

²²Omundu wosi, omusiiyikhu kata owomusilo, anyala okhulia khunyama iyo, singa obwa yakhaliye inyama yeliaka nohomba eyesitsusu.

²³Habula muralia inyama nesilimwo amalasile tawe, okhuba obulamu buli mumatsahi, ne muraliakhwo obulamu neinyama tawe.

²⁴Murarumikhila amalasile singa esiokhulia tawe; habula mukachetul'le hasi singa amaatsi.

²⁵Nimwakhalonda lilako yili, OMWAMI alasangala, nenywe mulanyoola ol'lahi halala nabolwibulo lwenywe.

²⁶Muhile habundu halala hokhwekayakayila emisango chienywe nende ebihanwa bienywe ebia mwesuha okhuhaana khu MWAMI.

²⁷Muhan'ne ebiene iyo emisango chiokhusambwa nichichiman'ne khulusambwa lwo MWAMI. Khandi muhaane emisango echiamulitsanga inyama yatsio ne nimusundula amatsahi khulusambwa.

²⁸Mulonde mubusubilwa siesindu esia mal'le okhumulaka, nenywe namunyole ol'lahi halala nabolwibulo lwenywe inziayo, sichila namube nimukholanga akali amulunji khandi kakayanzisianga OMWAMI Nyasaye wenywe.

²⁹“OMWAMI Nyasaye wenywe namume amahanga olwa namube nimuseeranga esibala siabwe, nenywe namusibukule ma namumenye mwo.

³⁰OMWAMI namal'le okhumuma amahanga yako, mulole mbu simulondanga emilukha chiedini yabwe tawe, sichila yilio liakhaba eliokhuleera olufu. Murateema okhurunilisia singa obwa bekayakayanga abanyasaye babwe, kho nenywe mube abanyala okhwekayakaya munjila iyo tawe.

³¹Murekayakaya OMWAMI Nyasaye wenywe munjila eya nabo bekayakayilangamwo abanyasaye babwe tawe, okhuba mubwekayakayi bwabanyasaye babwe, bakholanga ebindu bies'sinyo ebio MWAMI asinyikhilanga. Kata bahaananga abaana babwe singa emisango mumil'lo khumisambwa chiabwe.

³²“Mukhole kosi ake ise mal'le okhumulaka; murameetakhwo esindu siosi khuko nohomba okhuhiiniakhwo esindu siosi tawe.