Read lunyore OKHUKALUKHILA MUMALAKO 13 Bible Online

OKHUKALUKHILA MUMALAKO 13 - lunyore bible

OKHUKALUKHILA MUMALAKO 13

¹“Omuroobi nohomba omundu wokhuhaana esifune siamalooro anyala okhusubisia akamangalimwa nohomba akokhuchenyia,

²mbu amwemel'la okhwekayakaya nende okhurumikhila abanyasaye bamusili okhubekayakayakhwo. Kata nikali mbu esiakhusubisisie siekholekhele,

³orabukulakhwo obweyangu muye tawe. OMWAMI Nyasaye wenywe amurumikhilanga khulwo khumuteema, alole nimuba nimwayanza OMWAMI nomwoyo kwosi nende amakani kenywe kosi.

⁴Mulonde OMWAMI khandi mumurie; mumuhulile ma mulinde amalako kaake; mumwekayakaye khandi mube abasubilwa khuye.

⁵Nebutswa mwire omundu wosi obisulanga amalooro nohomba omuroobi omubool'langa musuule OMWAMI, owali okhumuhinia okhurula Emisiri, aha mwalinji abasumba. Omundu weimbila iyi nomwoni ne ateemanga okhumwemel'la okhurula khubulamu bwo MWAMI yalaka mumenye. Okhwola yeerwe, kho mube abanyala okhwehiniakhwo esieno yisio.

⁶“Omwana wenywe nohomba omusiani uwo nohomba omukhaana uwo, nohomba omukhasi uwo uwawayanza, nohomba omulina uwo wokhumwoyo, anyala okhukhutsuuba masilisi okhwekayakaya abanyasaye, abe ibe nende abakuka benywe basili okhwekayakayakhwo tawe.

⁷Mulala khubo anyala okhukhutsuuba okhwekayakaya abanyasaye babandu abamenya ahembi n'nenywe, nohomba okhwekayakaya abanyasaye babandu abamenya ehale.

⁸Nebutswa orakhahuchil'la akhuhombelesie tawe; kata oramuhuyiakhwo tawe. Orakhamanyiakhwo tsimbabasi nohomba okhumubelel'la tawe, khandi oramusinga khubasuku tawe.

⁹Yeerwe! Obe owokhuranga okhumulasa lichina, ma olekhe siomundu wosi amulase namachina.

¹⁰Mumulase namachina okhwola olwafwa! Yali okhuteema okhumwemel'la okhurula khu MWAMI Nyasaye wenywe owali okhumuhinia okhurula Emisiri aha mwalinji abasumba.

¹¹Kho abandu bosi ba Isiraeli beetsa okhuhul'la akekholekhele; beetsa okhuba noburi, kho sialiho kata mulala owakhakhola amang'ana amabi yako tawe.

¹²“Olwa namube nimumenyele mumatookho ko MWAMI Nyasaye wenywe nabe namuhelesisie, namuhulile

¹³mbu abasaatsa balala abolwibulo lwenywe abarali neifuma bakosisie abandu abamenya mumatookho khulwo khwekayakaya abanyasaye bamusili okhwekayakayakhwo tawe.

¹⁴Nimwakhahul'la imonyi efwana mbwo, muchirunilisie bulahi; ne nikakhaba tooto mbu amang'ana amabi yaka kekholekhele,

¹⁵kho mwire abandu bosi bomwitookho yilio halala netsing'ombe tsiabwe. Litookho yilio okhwola lisasibwe liosi kupu.

¹⁶Muleere halala ebindu biosi ebiabandu abamenya musibala yisio ma mubunjikhe hakari welitookho. Ma musambe litookho nende ebindu biosi ebilimwo singa omusango kwokhusambwa khu MWAMI Nyasaye wenywe. Okhwola litookho yilio lilekhwe ndiasasikha khulwe inziayo ne lirakhombokhwakhwo khandi tawe.

¹⁷Murakhebikhilakhwo esindu siosi esiakhalachilwa okhwononibwa tawe; ma nilwo olwo MWAMI akalukhanie oburima bubwe obubi ma amubeele tsimbabasi. Yakhaba owetsimbabasi khwinywe ma kachile mumetekhe okhuba abandu abenji singa obwa yali okhusubisia abakuka benywe,

¹⁸nimwakhalonda amalako kaake singa muhelesisie litukhu lino ma mukhole kosi akenyekhanga.