Read lunyore OKHUKALUKHILA MUMALAKO 14 Bible Online

OKHUKALUKHILA MUMALAKO 14 - lunyore bible

OKHUKALUKHILA MUMALAKO 14

¹“Inywe muli abandu bo MWAMI Nyasaye wenywe. Kho olwa mwekhulanga abafu, murekhalaka emibili chienywe nimubeka emirwe chienywe olwale singa abandu bandi bakholanga tawe.

²Inywe muli abo MWAMI Nyasaye wenywe; ye wamwahula okhuba abandu baabe omwene okhurula mubandu bandi abamenyele khusibala.

³“Muraliakhwo esindu siosi esio MWAMI yaboola mbu nesiomusilo tawe.

⁴Munyala okhulia tsinyama tsino: tsing'ombe, amakondi, tsimbusi,

⁵tsimongo, amakondi kom'mutsuru, tsimbusi tsiom'mutsuru, nohomba ebitsusu;

⁶tsinyama tsiosi etsie tsinzakayu tsiabukhanamwo hakari khandi etsinyanyanga ekaamula.

⁷Nebutswa tsinyama etsirayabukhana tsinzakayu tsiatsio hakari khandi etsiranyanyanga ekaamula tsiralibwa tawe. Muralia tsingamia, ebipwoyo nohomba amachinieli tawe. Okhwola tsikholwe etsiomusilo; tsinyanyanga ekaamula nebutswa tsinzakayu tsiatsio sitsiayabukhanamwo hakari tawe.

⁸Muralia tsimbitsi tawe. Okhwola tsikholwe etsiomusilo; tsiayabukhana tsimbakayu nebutswa sitsinyanyanga ekaamula tawe. Muraliakhwo khutsinyama yitsi tawe, kata murahambakhwo khumibili chiatsio emifu tawe.

⁹“Munyala okhulia imbila yosi yetsisutse etsilikhwo ebibeye nende amakamba,

¹⁰nebutswa esindu siosi esimenyanga mumaatsi ne nisirali nesibeye nende amakamba murasiliakhwo tawe; musikhole esiomusilo.

¹¹“Munyala okhulia linyonyi liosi elili lisiyikhu.

¹²Nebutswa tsimbila tsiamanyonyi kano muratsilia tawe: tsinditsu, amakkhuule, amahutselesi,

¹³amakhupi, amakakha, etsisori,

¹⁴amakhokho,

¹⁵namaluto, netsimbukambuka, netsinyanje,

¹⁶namahungu, nemahitsihitsi, namafitibili,

¹⁷namakhokorelo, netsimwari, netsinangwa nende amanamulobi,

¹⁸namakui, nemanakha, namahutihuti nende amanyinya.

¹⁹“Ebikoko biosi ebili netsimbaha nebiomusilo; murabilia tawe.

²⁰Munyala okhulia ebikoko bindi ebiasiiywa.

²¹“Muraliakhwo omuruko kwosi okufwiye okwene tawe. Munyala okhulekhela abacheni abamenyibwa mwinywe bakulie nohomba munyala okhukusia khubacheni bandi. Nebutswa inywe muli abo MWAMI Nyasaye wenywe; muli abandu baabe. “Muratekhela esimeme sielikondi nohomba esiembusi mumabeele kanyina wasio tawe.

²²“Mure sibeka esielikhumi khusiesindu siosi esiamanga mumikunda chienywe buli khumuhika.

²³Ma mutsie habundu halala aho MWAMI Nyasaye wenywe yahula mbu yekayakayilwenjeho; ma habwene yaho imbeli uwe muliileho esielikhumi siobuswache bwenywe, newaini, namafura komuseituni, nende esibulwa siokhuranga khutsing'ombe tsienywe nende khumakondi kenywe. Mukhole yaka kho mweke okhuhaana oluyali khu MWAMI Nyasaye wenywe khasotso.

²⁴Habundu hokhwekayakayila niyakhaba ehale okhusila okhurula ingo wenywe mbu simwakhachinga esielikhumi siebiamo ebio MWAMI amukaasisie n'nabio okhuliilaho tawe, kho mukhole kano:

²⁵Mukusie ebiamo bienywe ma mutsie namapesa habundu hokhwekayakayila.

²⁶Mukarumikhile okhukula siesindu siosi esia muba nimwenyele, mbu inyama, esimeme sielikondi, ewaini, kata amalwa, ma habwene yaho imbeli wokhubaho khwo MWAMI Nyasaye wenywe, inywe halala nabetsinyumba tsienywe mubiliile ho nimusangala.

²⁷“Murebil'la Abalawi abamenyanga mumataala kenywe tawe; sibali nemiandu chiabwe abene tawe.

²⁸Mukhumalila khwa buli omuhika kwakhataru muleerenje esielikhumi siokhubiamo bienywe biosi ma mubire mubiachi mumataala kenywe.

²⁹Ebiokhulia yibi nebia Balawi, sichila sibalikhwo nemiandu tawe, khandi nende abacheni abamenyibwa, nende ababisandu nende abalekhwa abamenyanga mumataala kenywe. Nabetsenje nibahebwa biosi ebia batakhanga. Mukhole yaka ne OMWAMI Nyasaye wenywe namulamile tsikhabi musiesindu siosi esia mwakhakhola.