Read lunyore OKHUKALUKHILA MUMALAKO 15 Bible Online

OKHUKALUKHILA MUMALAKO 15 - lunyore bible

OKHUKALUKHILA MUMALAKO 15

¹“Mukhumal'likha khwa buli muhika kwakhane nakhataru okhwola olekhele yabo bosi abali nelikobi lilio eliamapesa.

²Kano kenyanga kakholekhe mbu. Omundu wosi owakopia amapesa kosi khu Muisiraeli wasie okhwola amulekhele likobi yilio; arakhateemakhwo okhubukula amapesa yako tawe; OMWAMI mwene umal'le okhuboola mbu likobi yilio sililiho khandi tawe.

³Onyala okhutsia okhubukula amapesa komundu omucheni owamenyibwa, nebutswa orakhabukula amapesa kelikobi lilio khumundu wosi owolwibulo lulwo tawe.

⁴“OMWAMI Nyasaye wenywe namulaamile tsikhabi nimuli musibala esia amuhetsanga. Saliho kata mulala khubandu benywe owa nobe omutakha tawe.

⁵Nimwakhamuhulila ma mulinde bulahi siesindu siosi esia amulaka okhukhola luno,

⁶OMWAMI yetsa okhumulaamila tsikhabi singa yali okhumusubisia. Inywe mwakhakopie amapesa khubetsinzibulo tsinyinji, nebutswa inywe simwakhakopekhwo khulwibulo lundi lwosi tawe. Inywe mwakharuche tsinzibulo tsinyinji, ne silulikhwoho olwibulo olwakhamuruche tawe.

⁷“Niyakhabakhwoho mwitookho liosi musibala sio MWAMI Nyasaye wenywe amuhetsanga, Omuisiraeli wasienywe oli nobutakha, murakhaba abekhotseli ma musuule okhumukhonya tawe.

⁸Nebutswa mube abahaani ma mumukopie siosi esiayakhenya.

⁹Murakhasuula okhumukopia esindu siosi sichila omuhika kwa amakobi okhulekhelwa kuli ahembi tawe. Murakhalekha amakani amabi singa yaka okhwinjila mumioyo chienywe tawe. Nimwakhasuula okhumukopia, omundu uyo anyala okhulakayila OMWAMI niyekananga singa musuuye okhumukopia. OMWAMI yetsa okhumubukula okhuba abesikha.

¹⁰Mumuhelesie namakhono amasiro khandi muremana tawe, kho OMWAMI abe onyala okhumulaamila tsikhabi mu kosi akamukholanga.

¹¹Buli khasotso nakhubetsenge nende balala khu Baisiraeli abanababetsenge abatakha abarali nesindu, kho mulakanga okhwola mubahelesienje namakhono amasiro.

¹²“Nikakhaba Omuisiraeli wasio, abe omusaatsa nohomba omukhasi niyakhekusia khuibe singa omusumba, okhwola okhukhol'le emilimo emihika chisasaba. Olwo muhika kwakhane nakhataru kwolanga, okhwola omuhe obulakhuule bubwe.

¹³Olwoba nomulakhuulanga, oramulekha butswa amakhono amakhaya tawe,

¹⁴omuhelesie namakhono masiro okhurula khu ebio MWAMI yakhulaamila ikhabi, amakondi, obuswache, nende ewaini.

¹⁵Mwitsul'le mbu mwalinji abasumba musibala sie Misiri ne OMWAMI Nyasaye wenywe yamukhola okhuba abalakhuule; yako niko akachilanga nimuha lilako yili.

¹⁶“Ne haundi omusumba wenywe siyakhenya okhutsia tawe; anyala okhuba niyakhuyanza nende abeinzu yiyo ma ahuchil'le okhumenya.

¹⁷Kho omuhile khumuliango kweinyumba yiyo ma yaho ofumire etundu musirwi sisie; kho yeetsa okhuba omusumba uwo obulamu bubwe bwosi; khandi okhole mbwo khu musumba uwo omukhasi.

¹⁸Orasinyikha olwoba nohetsanga omusumba uwo obulakhuule tawe, sichila wakhamala okhukhukhol'la emilimo khulwemihika chisasaba narungwangwa enusu yomukholi wokhurungwa. Okhole mbwo ne OMWAMI Nyasaye uwo yeetsa okhukhulaamila tsikhabi mu kosi okoba nokholanga.

¹⁹“Esiibulwa siambeli es'saatsa sieing'ombe nende esielikondi bihanwwe khu MWAMI. Murakharumikhila ebiibulwa biambeli bietsing'ombe okhukhola omulimo kwosi tawe. Khandi murakhakhalakakhwo obwoya bwebiibulwa biambeli ebiamakondi tawe.

²⁰Buli muhika inywe nende abetsinyumba tsienywe mubilie imbeli wo MWAMI habundu hokhwekayakayila.

²¹Nebutswa emiruko yitsio nitsiakhabakhwo nesindu esibi nikali tsialema nohomba tsiabofula nohomba nitsili nobulema bundi bwosi murakhatsihanakhwo singa omusango khu MWAMI Nyasaye wenywe tawe.

²²Munyala okhuliila emiruko tsieimbila iyo mungo mwenywe. Inywe mwesi abasiiywa nohomba abomusilo munyala okhulia singa obwa mulitsanga imongo nohomba esitsusu.

²³Ne murakharumikhila amatsahi kabio singa ebiokhulia tawe; musilenje yisio okhwola mukasundule hasi singa amaatsi.