Read lunyore OKHUKALUKHILA MUMALAKO 16 Bible Online

OKHUKALUKHILA MUMALAKO 16 - lunyore bible

OKHUKALUKHILA MUMALAKO 16

¹“Helesinjie OMWAMI Nyasaye wenywe oluyali khulwo khwitsul'la Epasaka mumwesi kwa Abibu; khwali khubutukhu bwomwesi yikwo olwa Nyasaye yamununula okhurula Emisiri.

²Mutsie habundu halala hokhwekayakayila ma mwir'reho elala khumakondi kenywe nohomba ndala khutsing'ombe tsienywe khulwe lisabo lie Pasaka okhuhelesia OMWAMI Nyasaye wenywe oluyali.

³Olwa namulitsenje lisabo yili, muraliakhwo omukaati okutekheywemwo amamela tawe. Khulwa amatukhu kane nakataru namulitsenje omukaati okuralimwo amamela singa obwa mwakhola olwa mwarula Emisiri matetekhana. Mulie omukaati yiku, ne nakulangwenge omukaati kwobusaalili, kho mbu oluhono olwa namube nimusili mwoyo, namwitsul'lenje litukhu elia mwarul'lamwo Emisiri, aha mwali okhusaalila.

⁴Khulwa amatukhu kane nakataru omundu wosi musibala sienywe arabbakhwo namamela munyumbamwe tawe; ne inyama yomuruko okwir'rwe khumukolooba kwelitukhu liokhuranga okhwola eliibwe obutukhu bwene yibwo.

⁵Murahaanakhwo omusangokwe Pasaka mumataala kenywe kosi ako MWAMI Nyasaye wenywe namuhelesie tawe.

⁶“Mwir're emiruko chie Pasaka habundu ho MWAMI Nyasaye wenywe yahula khulwokhwekayakayilaho. Muchileere khumukolooba kwelitukhu liamwarul'lakhwo Emisiri.

⁷Mutekhele inyama mumaatsi ma muchiliile habundu ho MWAMI yahula khulwo khwekayakayilwaho ne omukamba okulondakhwo mukalukhe ingo.

⁸Khulwa amatukhu akalondakhwo kasasaba mulalia omukaati okuralimwo amamela, ne khwitukhu liakhane nakhataru mwebunjikhe halala okhwekayakaya OMWAMI Nyasaye wenywe, ne murakholakhwo emilimo litukhu yilio tawe.

⁹“Mubale amahonga kane nakataru okhurula olwa muchiakanga okhuchesa obuswache,

¹⁰ma mwitsul'le okhulia Lisabo lie Lichesa, okhuhaana oluyali khu MWAMI Nyasaye wenywe, khulwo okhumuler'ra omusango kwobwehaani okhuhelana netsikhabi etsiayakhaba namuheye.

¹¹Musangale imbeli wo MWAMI, halala nabaana benywe, nabarumikhili benywe halala na Balawi nende abacheni abamenyibwa mwinywe, nababisandu nende abalekhwa abamenyanga mumataala kenywe. Mukhol'le yaka habundu aho MWAMI yahula khulwo khwekayakayilwaho.

¹²Mulole mbu mulondanga amalako yaka; murebil'la mbu mwalinji abasumba musibala sie Misiri tawe.

¹³“Nimumal'le okhuhula obuswache bwenywe bwosi ma nimumin'ne emisabibu chienywe, mukhole Lisabo lia Mahindu khulwa amatukhu kane nakataru.

¹⁴Mulisangal'le nabaana benywe, nende abarumikhili benywe, na Balawi, nende abacheni abamenyibwa, nababisandu nende abalekhwa abamenyanga mumataala kenywe.

¹⁵Muhaane oluyali khu MWAMI Nyasaye wenywe khulwo okhulia lisabo yili khulwamatukhu kane nakataru habundu aha Nyasaye yahula khulwo khwekayakayilaho. Musangale sichila OMWAMI umal'le okhulaamila lichesa lienywe nende emilimo chienywe tsikhabi.

¹⁶“Abasaatsa bosi abelihanga lienywe bakhoya okhwitsa okhwekayakaya OMWAMI hali khataru khumuhika habundu aha yahula khulwo okhumwekayakayilaho, mbu khwisabo lie Pasaka, Lisabo lie Lichesa nende Khwisabo lia Mahindu. Siomusaatsa akhoya okhuleera esihanwa

¹⁷esianyala okhuhelana netsikhabi etsio MWAMI Nyasaye wenywe amuhelesisie.

¹⁸“Mwahule abakhalachi nende abemeli bandi mu sielitaala elio MWAMI Nyasaye wenywe namuhelesie. Abandu yaba nabakhalachenge emise chiabandu sila ebiela tawe.

¹⁹Sibakhoya okhulilil'la omundu wosi kata okhuba nebiele mubukhalachi bwabwe tawe; khandi barahuchil'la okhuhebwa ebihetso tawe. Okhuba ebiomufuusi bibofusianga kata tsimoni tsiabachesi nende abalunji, ma kachila bahaana obukhalachi oburali obwahabwene.

²⁰Mubetsenje abahabwene khandi abalunji, kho namubukule esibala esio MWAMI Nyasaye wenywe amuhelesianga ma namutsilil'le okhumenyamwo.

²¹“Olwa mulombela OMWAMI Nyasaye wenywe olusambwa, murabiikha hasibafu halwo esifwanani siomunyasaye mukhasi Ashera esiabatswa khumusaala tawe.

²²Khandi murasinjisiakhwo esilo yamachina khulwo khwekayakayilakhwo ebiniini tawe. OMWAMI wabisula yibio.