Read lunyore OKHUKALUKHILA MUMALAKO 17 Bible Online

OKHUKALUKHILA MUMALAKO 17 - lunyore bible

OKHUKALUKHILA MUMALAKO 17

¹“Orakhahaanakhwo khu MWAMI Nyasaye wenywe omusangokwe ing'ombe nohomba likondi elilikhwo nobulema bwosi tawe sichila OMWAMI wabisinyikhila.

²“Haundi munyala okhuhul'la mbu mwitaala elala khumataala kenywe, omusaatsa nohomba omukhasi ukholeye OMWAMI tsimbi ma ufunachile Indakano yo MWAMI,

³khulwo okhwekayakaya nende okhurumikhila abanyasaye bandi, nohomba okhwekayakaya eliuba nohomba omwesi nohomba tsinyininyini, okhwabukhana khwilako lio MWAMI.

⁴Nimwakhahul'la amang'ana keimbila iyo okhwola murunilisie butinyu okhunyoola obwatooto. Nikali nakatooto mbu amang'ana amabi yaka kayekholekha mu Isiraeli,

⁵kho muhile omundu uyo esioba welitookho ma mumulase namachina okhwola olwafwa.

⁶Nebutswa anyala okhwirwa nikali mbu baliho abakobokheli okhuyomba babili ababoolanga mbu omundu uyo yakhola liibi yilio, nebutswa nikali aliho omukobokheli mulala yenyene, arerwa tawe.

⁷Abakobokheli yabo barange okhulasa omundu uyo amachina kokhuranga, kho abandu bandi bosi balondekhwo okhumulasa amachina. Munjila yiyi namube nimukhungile esibi yisio.

⁸“Haundi emise chindi chinyala okhuba emitinyu khulwa abakhalachi bemumataala okhukhalaka, singa emise chiokhuhaana emiandu, nohomba emise chiokhusaalisibwa omubili nohomba emise chiokhwabukhania hakari hokhuchooma okhwira nende okhwira khwokhwitsukhan'na. Yaka nikakhekholekha, mutsie habundu hokhwekayakaya aho MWAMI Nyasaye wenywe aba niyel'le;

⁹ma muhaane omuse kwenywe khubesaalisi nende khumukhalachi oba nali khumulimo litukhu yilio, ma mulekhe bahaane obukhalachi khumuse yikwo.

¹⁰Beetsa okhuhaana obukhalachi ne inywe mukhole singa bakhalachile.

¹¹Okhwola muhuchil'le obukhalachi bwabwe ma mukhole kosi akababooye.

¹²Omundu wosi owakhateema okhufukula akomukhalachi nohomba omwesaalisi oba nali khumulimo aboola, okhwola yerwe; munjila yiyi mwitsa okhuhiinia esibi khu Isiraeli.

¹³Kho buli mundu yeetsa okhuhul'la amang'ana yako ma abe noburi ma sialiho owakhateema okhukhola mbwo tawe.

¹⁴“Nimumal'le okhubukula esibala sio MWAMI Nyasaye wenywe yenyanga okhumuhelesia, ma nimumenyelemwo, kho namukhalake mbu mwenyanga omuruchi singa abetsinzibulo abali ahembi khwinywe.

¹⁵Mube subi mbu omusaatsa owamwela okhuba omuruchi niye owo MWAMI yel'le. Okhwola abe mulala khubandu benywe; murakhakhola omucheni owamenyibwa okhuba omuruchi tawe.

¹⁶Omuruchi arabba netsisululi tsinyinji etsiokhulwana lihe tawe, khandi arakharumakhwo abandu Emisiri okhukula etsisululi tawe, sichila OMWAMI yaboola mbu abandu baabe barakhakalukhakhwo Emisiri tawe.

¹⁷Omuruchi arakhaleera abakhasi abenji tawe, sichila yaba bakhachila arule khu MWAMI; khandi arekhola omuhinda wefetsa nende etsahabu tawe.

¹⁸Olwa yakhemekhwa okhuba omuruchi, okhwola ahebwe esitapu siamalako ka Nyasaye, nende amebaalo akarulanga musitapu siokhuranga esiabiikhwa nende abesaalisi.

¹⁹Okhwola abiikhe esitapu yisi ahembi n'naye ma asisome mubulamu bubwe bwosi khe abe onyala okhweka okhuhaana oluyali khu MWAMI khandi abe omusubilwa khumang'ana kosi akalakwanga musitapu yisio.

²⁰Kano kakhamwibaal'la okhumanya mbu sayombele Omuisiraeli wasie tawe, khandi sali onyala okhubula okhulonda amalako ko MWAMI munjila yosi tawe. Kho yako kakhachila yamihe khulwemihika eminji, ne abolwibulo lulwe bakhamiha mu Isiraeli tsinzibulo tsinyinji.