Read lunyore OKHUKALUKHILA MUMALAKO 18 Bible Online

OKHUKALUKHILA MUMALAKO 18 - lunyore bible

OKHUKALUKHILA MUMALAKO 18

¹“Olwibulo lwa Balawi silulanyoolakhwo esitonye siomukunda mu Isiraeli tawe. Musilenje yisio obulamu bwabwe nabweletenje khumisango nende ebihanwa ebilerwanga khu MWAMI.

²Sibalaba nomukunda kwosi singa tsinzibulo tsindi tawe; omukabwa kwabwe nomulimo kwokhuba abesaalisi bo MWAMI, singa OMWAMI amal'le okhulaka.

³“Lwosi olwe tsing'ombe nohomba amakondi kaba nikahanwanga singa omusango, abesaalisi bakhoya okhuhebwa inyama yomumabeka, netsiseya nende ebiomunda.

⁴Mubahelesie ebirongola biobuswache nende ebiewaini, nende ebiamafura komuseituni nende ebiobwoya bwamakondi.

⁵Mutsinzibulo tsienywe tsiosi, OMWAMI yahula olwibulo lwa Lawi okhumurumikhila singa abesaalisi inziayo.

⁶“Omulawi wosi owakhaba niyakhenya anyala okhurula mwitaala liosi liosi mu Isiraeli ma yeetse habundu aho MWAMI yahula okhwekayakayila

⁷khandi anyala okhurumikha ebwene yiyo singa omwesaalisi wo MWAMI Nyasaye uwe, singa Abalawi bandi abarumikhangaho.

⁸Ahebwe ebiokhulia ebihelana nende ebiabesaalisi bandi, ne anyala okhabukula siosi esia abeinyumba yabwe bamurumila.

⁹“Olwa namwinjile musibala esio MWAMI Nyasaye wenywe namuhelesie, muralonda emilukha chies'sinyo chiamahanga akalimwo tawe.

¹⁰Murakhola emisango chiokhuhaana abaana benywe mumul'lo khutsisambwa tsienywe tawe; khandi murahuchil'la abandu benywe bekayakaye ebiniini, nohomba okhutsia khubalakuli, nohomba khubaroobi, kata khubafila, kata murabba abalosi tawe,

¹¹kata muralanjila omundu mulupao, nohomba okhutsia khu owebitsohela nende khumufumu tawe.

¹²OMWAMI Nyasaye wenywe wasuula abandu abakholanga ebindu bies'sinyo yibi, ne nisio esichilanga nakhunga amahanga yako okhurula musibala yisio, olwa nenywe mwesundanga.

¹³Mube yabasubilwa kupu khu MWAMI.”

¹⁴Ma Musa naboola mbu, “Musibala esia muli ahembi okhubukula, muralonda amebaalo ke yabo abakholanga obulakuli nibekayakaya emisambwa, nibarunilisia ikhabi tawe, nebutswa OMWAMI Nyasaye wenywe samuhuchil'langa inywe okhukhola yako tawe.

¹⁵Musilenje yisio OMWAMI omwene narume omuroobi ofwana ise khwinywe okhurula mubandu benywe abene nenywe okhwola mumuhulile.

¹⁶“Khwitukhu yilio olwa mwebunjikha hasikulu sia Sinai mwareeba mbu murahulila OMWAMI nal'lomanga khandi tawe, nohomba kata okhumulola khandi tawe, sichila mwali nimuriye mbu en'no mwakhafwa.

¹⁷Kho OMWAMI yamala yambool'la mbu, ‘Bareebele ling'ana lilahi.

¹⁸Nambarumile omuroobi singa ibe okhurula mubandu babwe abene; namubool'la akayakhaboole, naye yakhabool'le abandu amang'ana kosi akandakanga.

¹⁹Yakhal'lomele muliira lianje, nase ndakhahaane esinyasio khu siomundu owakhabule okhumuhulila.

²⁰Nebutswa omuroobi wosi niyakhaboola amang'ana muliira lianje olwe ise ramulachile okhukaboola, okhwola afwe, khandi okhwola abaroobi bosi abal'lomelanga mumera kabanyasaye bandi bafwe.’

²¹“Munyala okhubula okhumanya nikali amang'ana komuroobi aboolanga sikarulanga khu MWAMI tawe.

²²Omuroobi niyakhal'loma muliira lio MWAMI ne aka yakhaboola nikaba nikarekholekha tawe, kho sikali amang'ana ko MWAMI tawe. Omuroobi uyo aba nal'lomeye mubunyali bubwe omwene, nenywe simutakha okhumuria tawe.