Read lunyore OKHUKALUKHILA MUMALAKO 19 Bible Online

OKHUKALUKHILA MUMALAKO 19 - lunyore bible

OKHUKALUKHILA MUMALAKO 19

¹“OMWAMI Nyasaye wenywe namal'le okhumulula abandu bomusibala esiayenyanga okhumuha, khandi nimumal'le okhubukula amatookho kabwe halala netsinyumba tsiabwe ma mimumenyelemwo,

²mure sibeka amatookho kataru musibala esio MWAMI namuhelesie.

³Mwaremwo emihanda ma mukabule liloba yilio mubitonye bitaru, kho omundu owakheera oundi abe onyala okhwilukhila mwitookho elala khukene yako khulwokhwesoola.

⁴Omusaatsa niyakhetsukhan'na niyeera omundu orali omusuku uwe, anyala okhwilukhila khu elala khumatookho yako khulwokhwesoola.

⁵Lekha mumanyie esifwanani, nikakhaba abasaatsa babili batsia m'mutsuru halala okhurema emisaala, ne nikakhaba olwa mulala khubo yakhaba naremanga omusaala, omurwekwe imbatso kurule khumuhini ma kwire owa bali n'naye, kho kakhoyele okhol'le ling'ana yili yelukhile khu elala khumatookho kataru yako khulwokhwesoola.

⁶Niliakhabeyeho litookho elala lionyene, oluchendo lwokhutsia khulio lwakhaba olurambi okhusila, ne omwikho uwe owakhenya okhubanza es'sialia siokhwira, anyala okhumutiila ma yeere omundu obulakhwo esikha uyo. Yako kali butswa amarabba okhwira omundu orali omusuku uwe.

⁷Yaka niko akachil'le nimubool'la mure sibeka amatookho kataru.

⁸“Olwo MWAMI Nyasaye wenywe yeetsa okhumumeeta liloba, singa obwa yesuhila abakuka benywe, ma olwa aba namuhelesie esibala siosi esia yamusubisia, kho kakhoyele inywe okhwahula amatookho kandi kataru okhumeetakhwo.

⁹(Namuhelesie liloba yili nimuba nimwakhakhola kosi akaamulakanga olwaleelo khandi nimwakhayanza OMWAMI Nyasaye wenywe khandi nimumenyanga okhulondokhana nobuchetsiyi bubwe.)

¹⁰Mukhole yaka kho abandu ababula esikha babule okhufwa khandi mulekhe okhunyoolekha nesikha siokhwir'rwa musibala sio MWAMI namuhelesie.

¹¹“Ne nikakhaba omundu yakheera omusuku oralikhwo nesikha ma yelukhile khu elala khumatookho kobwilukhilo,

¹²kho abemeli bomwitookho mumwe barumanie amang'ana aleerwe ma bamure mumakhono kabekho bomundu owir'rwe khulwokhurunga es'sialia siobwiri ma yerwe.

¹³Murakhamubeela tsimbabasi tawe. Muhinie omwiri uyu okhurula mu Isiraeli kho kosi kabe akanyala okhuba amalahi khwinywe.

¹⁴“Orakhasunda olwakho lwomurende uwo, olwali nilwarebwaho khale musibala sio MWAMI Nyasaye wenywe namuhelesie tawe.

¹⁵“Obukobokheli bwomundu mulala sibuhel'le okhukhalachila omundu khumabi tawe; nebutswa obukobokheli bwabandu babili nohomba bataru nibwo obuhela okhukhalachila omundu okhuba nesikha.

¹⁶Omundu mulala niyakhenya okhusaalisia oundi khulwo khumuchiika ukhol'le amabi,

¹⁷bombi babili batsie habundu halala hokhwekayakayila ma bakhalachilwe nomwesaalisi nende abakhalachi ababa nibali khumulimo olwene yilwo.

¹⁸Abakhalachi betsa okhurunilisia amang'ana bulahi, ne omundu uyo nachikhile Omuisiraeli wasie,

¹⁹yeetsa okhuhebwa esinyasio esiali nasihebwe omundu owa yali nasitachile. Munjila iyo mulahiniaho amabi yaka.

²⁰Kho abandu bosi beetsa okhuhul'la akaba nikekholekhele, ma beetsa okhuba noburi ma sialikhwoho owakhakhola esindu esibi yisio tawe.

²¹Mukene yaka murakhamanyia tsimbabasi tawe; esinyasio sienyanga sibe obulamu khubulamu, imoni khumoni, elino khulino, omukhono khumukhono kata esilenje khusilenje.