Read lunyore OKHUKALUKHILA MUMALAKO 2 Bible Online

OKHUKALUKHILA MUMALAKO 2 - lunyore bible

OKHUKALUKHILA MUMALAKO 2

¹olunyuma khwebera nikhutsia musitsiimi, khunjila ehengele khumukhonokwe Inyanza Inzakhanyu okulangwanga Akaba, singa OMWAMI yali nalachile, ne khwamenya oluhono olurambi nikhuboyaboyanga musibala siebikulu sia Edomu.

²“Ma OMWAMI niyambool'la

³mbu khwali nikhuboyaboyele mubikulu oluhono oluhel'le khandi mbu khukwana okhutsia esinyolu.

⁴Yambooleye mubool'le amang'ana kano: ‘Muli ahembi okubir'ra musibala siebikulu sia Edomu, esibala sia abekho benywe, abolwibulo lwa Esau. Abandu ba Edomu nabamurie,

⁵nebutswa murachaaka lihe n'nabo tawe sichila sinamuhekhwo esibala siabwe kata ahokhusena esilenje honyene tawe. Ndahelesia Esau esibala sia Edomu halala nolwibulo lulwe.

⁶Munyala okhukula ebiokhulia nende amaatsi okhurula khubo.’

⁷“Mwitsul'le obwo MWAMI Nyasaye wenywe yamulaamiye tsikhabi mubuli esindu esia mumal'le okhukhola. Yabeye okhumulinda olwa mwaboyaboyelenje musitsiimi sino. Yabeyenje n'nenywe emihika amakhumi kane yitsi, nenywe mwanyooyenje kosi akamwatakhilenje.

⁸“Kho khwakhuraho nikhulekha injila etsitsanga khumataala ka Elatsi nende Esionigeberi okhwola khu Nyanza ye Chumbi, ma nikhwebera khunjila yesinyolu khumukhono musaatsa ehengele Moabu.

⁹OMWAMI niyambool'la mbu, ‘Muranyasia abandu ba Moabu, abolwibulo lwa Loti tawe, kata murachaaka lihe n'nabo tawe. Bo ndali okhubaha litookho lia Ari, ne sinamuhekhwo esibala siabwe kata esiti tawe.’ ”

¹⁰(Olwibulo olukufu olwemindu emikali olulangwanga Emimu lwamenyanga mwitookho lia Ari. Abandu bolwibulo yilwo bali abarambi singa Anakimu, olwibulo lundi olwali lwemindu emikali.

¹¹Singa Anakimu, bali nibamanyikha singa Refaimu, khandi nabo bamanyikha khuliira yilio. Nebutswa Abamoabu babalanganga Emimu.

¹²Abahori bamenyanga Edomu khale, nebutswa abolwibulo lwa Esau babakhunga nibabahiinia Edomu, nibamuma lihanga liabwe, ma nibamenyamwo abene, singa butswa obwa Abaisiraeli bakhunga abasuku babwe okhurula musibala esio MWAMI yali okhubahelesia.)

¹³“Ma nibakhalania omuchela kwa Seredi singa OMWAMI yali nababooleye.

¹⁴Yaho khwali nikhwamal'le emihika amakhumi kataru namunane nikhwarul'le Kadeshi Barinea. Abandu belihe abolwibulo yilwo bali nibafwiye, singa OMWAMI yali niyaboola mbu bakhafwe.

¹⁵OMWAMI yatsilil'la okhubalwana okhwola olwa yabamuma bosi pe.

¹⁶“Olwa bali nibamal'le okhufwa bosi,

¹⁷OMWAMI yakhubool'la mbu,

¹⁸‘Leelo mwitsa okhubir'ra musibala sia Moabu khunjila erulanga Ari.

¹⁹Yaho mwitsa okhuba nimuli ahembi okhwola khusibala sia Abaamoni, abolwibulo lwa Loti. Murabbanyasia kata okhubusia lihe n'nabo tawe, sichila sinzia okhumuhakhwo esibala esia ndamala okhubaha tawe.’ ”

²⁰(Esibala yisi khandi silangwanga esibala sia Refaimu, eliira liabandu abamenyangamwo khale; Abaamoni babalanganga Abasamu Sumimu emindu emikali.

²¹Bali abarambi okhusila singa Abanakimu. Bali abandu abenji, ne lwali olwibulo lwetsingufu. Nebutswa OMWAMI yabamuma, ma Abaamori nibabukula esibala siabwe nibamenyamwo.

²²OMWAMI yali niyakhola amatelwa khu Abaedomu, abolwibulo lwa Esau, abamenyele musibala siebikulu sia Edomu. Yamuma Abahori, ma kho Abaedomu nibabukula esibala siabwe nibamenya yo, ne basimenyelemwo okhwola leelo.

²³Esibala esili khuluchinga lweinyanza ya Mediterenia siali nisiabukulwa nabandu okhurula khusikhala chinga sia Kurete ma nibamenyayo. Abandu yabo bamuma Abaavimu, abalinji bene esibala yisio, ma bali nibabanuula esibala siabwe siosi okhwola kata enandete ahelitookho lia Gasa liali.)

²⁴“Nikhumal'le okhubir'ra musibala sia Moabu, OMWAMI yakhubool'la mbu, ‘Luno, rule muchiake oluchendo ma mukhalanie omuchela kwa Arinoni. Retsanga mumakhono kenywe Sihoni Omwaamori, owali omuruchi wa Heshiboni halala nesibala sisie. Mumuseere ma muchiake okhumenya musibala sisie.

²⁵Okhurula olwaleelo okhutsia imbeli nakhole abandu siahabundu hosi okhumuria inywe. Siomundu narimukhwenje ikholo olweliiralienywe naliralwenje.’

²⁶“Ndamala niruma abarume okhurula musitsiimi sia Kedemotsi okhutsia khu Sihoni omuruchi wa Heshiboni nimbananga omulembe kuno:

²⁷‘Okhuhuchil'le khubir're musibala sisio. Nakhukhalanie hakari ne nakhulonde butswa khumuhanda kwonyene.

²⁸Nakhurunge ebiokhulia bianakhulie nende amaatsi akanakhunywe. Esia khwenyanga butswa nokhubir'ra hakari wesibala sisio,

²⁹okhwola olwa khukhalania omuchela kwa Yorodani okhutsia musibala esio MWAMI Nyasaye wefwe akhuhelesianga. Abolwibulo lwa Esau, abamenyele Edomu, nende Abamoabu abamenyele Ari, bakhuhuchil'la okhubir'ra mutsisoma tsiabwe.’

³⁰“Nebutswa omuruchi Sihoni siyakhuhuchil'la ifwe okhubir'ra musibala sisie tawe. OMWAMI Nyasaye wenywe yatinyia omwoyo kukwe namukhola oweindiri mbu khube abanyala okhumuleka ma khubukule esibala sisie esia khumenyelemwo okhwola leelo.

³¹“Ma OMWAMI niyambool'la mbu, ‘Lola, khol'le omuruchi Sihoni halala nesibala sisie okhubula tsingufu imbeli wenywe; mubukule esibala sisie ma mumenyemwo.’

³²Sihoni yarula halala nabasikari babe okhulwana n'nefwe ahembi nelitaala lia Yahasi,

³³nebutswa OMWAMI, Nyasaye wefwe yamura mumakhono kefwe, nefwe nikhumwira, halala nabasianibe nende abasikaribe bosi.

³⁴Olwene yilwo nilwo olwa khwafumila amataala kosi nikhukasasia, ma nikhwira abandu bosi, abasaatsa, nabakhasi nende abaana bati. Abulaho owakhwalekha nali mwoyo.

³⁵Khwabukula tsing'ombe nikhuyaka amataala.

³⁶OMWAMI Nyasaye wefwe yakhuha obunyali ma nikhufumila amataala kosi okhurula Aroeri, khundulo khwelibanda lia Arinoni, nende litookho elili hakari mwibanda tsana, okhutsia okhwola Gileadi.

³⁷Nebutswa sikhwayesundakhwo ahembi khulusoma lwa Baamori nohomba khutsinjinga tsiomuchela kwa Yaboku nohomba khumataala kesibala siebikulu nohomba habundu handi hosi aho OMWAMI Nyasaye wefwe yali nakhukayile tawe.