Read lunyore OKHUKALUKHILA MUMALAKO 20 Bible Online

OKHUKALUKHILA MUMALAKO 20 - lunyore bible

OKHUKALUKHILA MUMALAKO 20

¹“Olwa muba nimurula okhutsia okhulwana lihe nende abasuku benywe ma mulole amakaari kobulwani netsisululi nende abasikari abenji okhuyomba abenywe, murarimukhwa ikholo khulwabo tawe. OMWAMI Nyasaye wenywe, owamununula okhurula Emisiri alabetsanga n'nenywe.

²Nimusili okhuchiaka okhulwana, omwesaalisi yetsenje imbeli wenywe ma abool'le abasikari mbu,

³‘Abasaatsa ba Isiraeli, hulile! Olwaleelo mutsitsanga mwihe. Muratechesibwakhwo nabasuku benywe nohomba okhurimukhwa ikholo nohomba okhuba neindenga khulwabo tawe.

⁴OMWAMI Nyasaye wenywe atsitsanga halala n'nenywe, ne alamuha obulechi.’

⁵“Nilwo olwabemeli nabo balabool'la abasikari mbu, ‘Alikhwoho omusaatsa wosi hano owabeye okhwombokha inyumba bwangu mbu, nebutswa asili okhuchinjisia? Naba naliho, kho atsie ingo. Nikarali mbwo, naba niyer'rwa mwihe, omundu undi nayenjisie inyumba yiyo.

⁶Alikhwoho omusaatsa hano owabeye okhusimikha omukunda kukwe kwemisabibu bwangu mbu, nebutswa asili okhunyoolakhwo obweyangu okhunoka emisabibu chiakwo? Naba naliho, kho atsie ingo. Nikarali mbwo, yetsukhila niyer'rwa mwihe, ma omundu undi alanoka emisabibuchie nasangala.

⁷Alikhwoho omundu wosi hano owahambile omukhaana wokhuteesia ne nasili okhumuteesia? Naba nali ho, kho atsie ingo. Khase naba niyer'rwa mwihe, omundu undi alateesia omukhaana owayahamba.’

⁸“Abemeli yabo khandi balabool'la abasikari mbu, ‘Alikhwoho omundu wosi wosi womusi kukwe kwakhalikhile ma ali muburi? Naba naliho, atsie ingo. Khase alakoyania olutswoni lwabasie.’

⁹Olwa abemeli baba nibamal'le okhubool'la abasikari amang'ana yaka, etsisawoni tsiahulwe khusiomukanda kwabasikari.

¹⁰“Olwa murula nimutsia okhuseera litookho, murange muhelesie abandu balio obweyangu bwokhwehana abene khwinywe.

¹¹Nibaba nibekula ebilibwa ma nibachinga amakhono okhwehaana khwinywe, bosi babe abasumba benywe ma bamukhol'le emilimo emitinyu.

¹²Nebutswa abandu belitookho yilio nibarachinga amakhono okhwelakhuula, nebutswa nibahula okhulwana, mulifumbile nabasikari benywe.

¹³Ma, olwo MWAMI Nyasaye wenywe amuhuchil'la okhuseera litookho yilio nende okhulihamba, mwire abasaatsa bosi abali mulio.

¹⁴Habula munyala okhwebukul'la abakhasi bamwo, nabaana, nemiruko nende siesindu siosi esiabasuku benywe bali n'nasio. OMWAMI omuheye siesindu esilimwo.

¹⁵Nimbwo mukhoya okhukhol'la amatookho akali ehale okhurula musibala esia namumenyenjemwo.

¹⁶“Nebutswa olwa muhamba amatookho musibala esio MWAMI Nyasaye namuhelesie, mwire abandu bosi abalimwo.

¹⁷Mwire kupu abandu bosi mbu Abahiti, Abaamori, Abakanaani, Abaperisi, Abahiwi, nende Abayebusi singa OMWAMI yamulaka okhukhola.

¹⁸Mubere kho babule okhuchila inywe mwon'ne OMWAMI khulwo khumwibaal'la okhukhola ebindu bies'sinyo biosi ebia bakholanga mukhwekayakaya abanyasaye babwe.

¹⁹“Olwa muteemanga okhuhamba litookho, muraremachila hasi emisaala chialio chiamatunde tawe, kata nikakhaba mbu mwakhalifumbila khulwo oluhono olurambi. Mulie amatunde, ne murononia emisaala tawe, sichili nobusuku n'nenywe tawe.

²⁰Munyala okhuremaka emisaala chindi chiosi ma muchirumikhile okhusira litookho okhwola olwa mulihamba liosi.