Read lunyore OKHUKALUKHILA MUMALAKO 21 Bible Online

OKHUKALUKHILA MUMALAKO 21 - lunyore bible

OKHUKALUKHILA MUMALAKO 21

¹“Haundi kakhaba mbu omundu yakhanyoolekha nafwiye musibala sio MWAMI Nyasaye wenywe yenyanga okhumuhelesia ne simumanyile niwina omwir're tawe.

²Kho abemeli benywe halala nabakhalachi beetsa okhutsia okhupima olurambukho okhurula homundu uyo afwiliye okhwola khubuli litookho elili ahembi habwene yaho.

³Ma abemeli belitookho elili ahembi ahomubili kwofwiye kuli, beetsa okhwela esimoosi esimooli esisili okhurumikhilwakhwo khumulimo kwosi tawe.

⁴Beetsa okhusihila ahembi nomuchela okurakhamangakhwo tawe, khandi habundu ahasili okhulimwakhwo nohomba okhurakwakhwo esindu siosi tawe. Ne yaho beetsa okhufunaka likosi liesimoosi.

⁵Abesaalisi benyekhanga batsieho khandi, sichila beetsa okhuhaana obukhalachi khumang'ana akeletanga khubukhupane. OMWAMI Nyasaye wenywe wabahula khulwo okhumurumikhila nende okhuhaana tsikhabi muliira lilie.

⁶Ma abemeli bosi okhurula mwitookho elili ahembi nende ahomundu yali okhwir'rwa yaho, besaabile amakhono kabwe ikulu wesimoosi esiali okhufunakwa likosi,

⁷ma baboole mbu, ‘Sikhuli nifwe aber're omundu uyu tawe khandi sikhumanyile omwir're tawe.

⁸OMWAMI, obelel'le abandu baabo Abaisiraeli, abawali okhuhiinia Emisiri. Okhubeele ne orakhukhola ifwe okhuba abeeri bomundu obula esikha uyu tawe.’

⁹Kho khulwo khukhola ako MWAMI yenyanga, simwakhabalwa okhuba abeeri tawe.

¹⁰“Olwo MWAMI Nyasaye wenywe namuhelesia obulechi mwihe ma namufumile abasumba,

¹¹onyala okhukoola mubo omukhasi welikondo lilahi elikhuyanzisisie owonyala khuteesia.

¹²Omubukule ma omuhile ingo uwo ma abeke liswi khumurwekwe, ma akhalake amasanda khubitere bibie,

¹³ma yebiikhe tsingubo tsindi. Yetsa okhumenya hango haho niyekhuulanga abebuli baabe khulwomwesi mulala; yako nikakhahwa onyala okhukona n'naye ma abe omukhasi uwo.

¹⁴Olunyumakhwo, niwakhalola mbu siomwenya tawe, omulekhe atsie singa omulakhuule; kho sionyala okhumukhol'la singa omusumba ma omukusie amapesa tawe sichila wali okhumufwabia.

¹⁵“Nikakhaba omundu ali nabakhasi babili ne bosi mbwo bamwibul'la abaana abasiani, ne omusiani wokhuranga okhwibulwa siali omusiani womukhasi owayayanza okhuyomba oundi tawe;

¹⁶olwomundu uyo akhalaka okhubakabul'la abasiani yabo emiandu, arakhateema okhuyanzisia omusiani womukhasi owayayanza khulwo okhumuhelesia esitonye siomusiani owebulwa mbeli tawe.

¹⁷Okhwola ahaane esitonye hali khabili khumusiani owebulwa mbeli kata nikaba nikali mbu siali omusiani womukhasi owayayanza tawe. Okhwola omundu musaatsa ahuchil'le omusiani uwe wambeli okhwibulwa; ma amuhelesie ebikhoyele okhuhebwa omusiani wambeli okhwibulwa.

¹⁸“Nikakhaba omusaatsa ali no mwana omusiani womurwe mukali, khandi oweinduli, omwana orahul'langa abebuli baabe kata nikali bamuhetsanga esinyasiotawe,

¹⁹abebuli baabe bamuhile imbeli wabemeli belitookho liamenyangamwo khulwo okhumuyaala.

²⁰Beetsa okhubool'la abemeli belitookho mbu, ‘Omusiani wefwe uno nowomurwe mukali, akhulwananga, ma asuula khuhul'la amalako kefwe, akosianga amapesa amenji ma khandi nomunywi.’

²¹Kho abandu bomwitookho beetsa okhumulasa namachina okhwola olwafwa, kho mwitsa okhuba mwakhahiinia imbi yiyi. Buli mundu wosi Omuisiraeli yeetsa okhuhul'la amang'ana yaka ma abe noburi.

²²“Omundu namal'le okhwirwa khulwe esikha nalebe ma omubili kukwe kusungwe khumusaala,

²³omubili yikwo kurakona khumusaala yikwo litukhu yilio tawe. Okhwola kuyabilwe litukhu liene yilio, sichila omubili kwomundu ofwiye nikusunjilwe khumusaala kuleeranga esilaamo sia Nyasaye khusibala. Muyabile omubili yikwo kho kulekhe okhuleera esilaamo siobubi khusibala sio MWAMI Nyasaye amuhelesinjia.