Read lunyore OKHUKALUKHILA MUMALAKO 22 Bible Online

OKHUKALUKHILA MUMALAKO 22 - lunyore bible

OKHUKALUKHILA MUMALAKO 22

¹“Noba nolola ing'ombe noho likondi lio Muisiraeli wasio nibiba nibikor're, orabuna ma obilekhe tawe. Obibukule ma obikalusie khumwenebio.

²Nebutswa mwenebio naba amenyanga ehale nohomba noba noramumanyile tawe, kho obihile ingo uwo. Olwa mwenebio nayetse nabikhaabanga omuhelesie.

³Khandi okhole mbwo noba nonyoola epunda, kata esilaka sieingubo nohomba esindu sindi siosi esio Muisiraeli wasio aba nakosisie.

⁴“Epunda nohomba ing'ombe yo Muisiraeli wasio neba nekwa khunjila hasi, orachibirakhwo tawe; omukhonye okhuchisinjisia.

⁵“Abakhasi barebiikha ebichendelwa biabasaatsa tawe; kata abasaatsa nabo barebiikha ebichendelwa biabakhasi tawe. OMWAMI Nyasaye wenywe abihil'lwanga abandu abakholanga ebindu singa yibio.

⁶“Noba niwakhanyoola esitsu sielinyonyi mumusaala, nohomba hasi, ne linyina nilikon'ne khumayayi nohomba nilili khubiminywi bialio orabukula linyina halala nebiminywi tawe.

⁷Onyala okhubukula ebiminywi nebutswa okhwola olekhe linyina litsie, kho nawe nomenye amatukhu amenji akobuhinda mubulamu bubwo.

⁸“Olwa wombokha inyumba imbia, olole mbu ubotokhanisie elelwe khusilama siayo. Nokhola mbwo, esiina sinasikhufwile omundu niyakharel'la nakwa okhurula khuyo ma afwe tawe.

⁹“Muraraakakhwo esiraakwa sindi mumukunda mulala okwa mwaraakamwo emisabibu tawe; nimukhola mbwo, nomusilo khwinywe okhulia emisabibu nohomba ebiamo biesiraakwa sindi yisio.

¹⁰“Murabohela ing'ombe yokhulimila nende epunda halala mwikokolo elala tawe.

¹¹“Murebiikha ingubo eyalukhilwa obusi obwachokana obwoya bwelikondi nende ekatani tawe.

¹²“Onabile khutsimbeka tsine tsieinguboyo amayebeyo.

¹³“Haundi omundu wosi ateesia omukhasi ma akone n'naye ma olunyuma akhalake mumwoyokwe mbu samwenyanga tawe.

¹⁴Kho amuchiikhe namang'ana ketsisoni, naboola amang'ana amabi khuye mbu olwa yamuteesia siyali nali omukhaana omuchima tawe.

¹⁵“Yaka nikakhekhola, kho abebuli bomukhaana uyo baleere amashiti akalikhwo amatsahi akobutesani akamanyianga mbu omukhaana wabwe yali omuchima, ma bakare imbeli wesiina khubakhongo belitaala yilio.

¹⁶Ma samwana omukhaana ababool'le mbu, ‘Ndali okhubakha omukhaana wanje khumusiani uyu ne luno omusiani uyu samwenyanga tawe.

¹⁷Ubooye amang'ana kokhumuchiikha mbu omukhaana wanje siyali omuchima, olwa bateesania tawe. Nebutswa buno nobukokheli mbu omukhaana wanje yali omuchima, lola amatsahi akali khumashiti kobutesani bwabwe!’

¹⁸Kho abakhongo belitaala balabukula omusaatsa uyo ma bamutiabe.

¹⁹Okhwola khandi bamurungie ebitonye biefetsa emia ndala ma babihaane khu samwana omukhaana, sichila omusaatsa uyo uler're es'simba murwe khumukhaana Omuisiraeli. Okhumeetakhwo, alatsilil'la okhuba omukhasiwe ne sanyala okhumukhunga omukhasi uyo oluhono lwomusaatsa uyo asili mwoyo tawe.

²⁰“Nebutswa amang'ana yako nikakhaba akatooto ne obukobokheli bwokhumanyia mbu omukhaana yalinji omuchima niburaliho,

²¹kho balamuhila esioba habwinjil'lo bweinyumba ya samwana, ahabasaatsa belitaala yilio balamulasa namachina ma bamwire. Aba naleereye abandu befwe es'simba murwe khulwo okhuba nomusaatsa nasili okhuteesibwa olwa yali nasimenyele munyumba ya samwana. Munjila yiyi mulahinia obubi yibu mwinywe.

²²“Omusaatsa wosi niyakhanyoolwa nali nomukhasi womundu undi, bombi okhwola berwe. Munjila yiyi mulahinia obubi yibu mwinywe.

²³“Kakhaba mbwena omusaatsa nanyoolwa mwitaala natil'le ma nakon'ne nomukhaana owahambwa nomundu undi!

²⁴Okhwola mubahile esioba welitaala ma mubere bosi khulwo khubalasa amachina. Omukhaana yerwe sichila sakhupile ekhwisi mbu akhonywe tawe, sichila yali mwitaala omwa yakhahuliywe nakhupanga ekhwisi. Omusaatsa naye yerwe sichila yali okhufwabia omukhaana owahambwa nomundu undi. Munjila yiyi mulahinia obubi yibu mwinywe.

²⁵“Nikakhaba omundu ahachia okhuba nomukhaana owahambwa netsingugu ma naba n'naye mubulimo. Kho omusaatsa yenyene abe niye owirwa;

²⁶esindu siosi sirakholwa khumukhaana tawe, sichila ye siyakhol'le tsimbi etsiakhachila yerwe tawe. Ling'ana yili lihelana nende obwomundu yenjil'la omundu undi ma amwire.

²⁷Omusaatsa uyo atiliye omukhaana owahambwa mubulimo netsingufu, ne kata olwa omukhaana uyo akhupile ekhwisi, abulaho owali okhumuhabina.

²⁸“Ne kakhaba mbwena omusaatsa naba nanyoolwa natilanga omukhaana omuchima osili okhuhambwa ma akone n'naye netsingufu,

²⁹okhwola omusaatsa arunge samwana omukhaana ikhwe yebitonye biefetsa amakhumi karano, ne omukhaana uyo abe omukhasi uwe, sichila yali okhumufwabia. Sanyala okhumukhunga oluhono lwa asili mwoyo tawe.

³⁰“Omusaatsa wosi arasimbia samwana omurwe khulwo okhuba nomukhasi wa samwana wosi wosi tawe.