Read lunyore OKHUKALUKHILA MUMALAKO 23 Bible Online

OKHUKALUKHILA MUMALAKO 23 - lunyore bible

OKHUKALUKHILA MUMALAKO 23

¹“Omusaatsa wosi owalatwa nohomba owe imbeli yiye yakhalakwa arakhenjisibwakhwo mumukanda kwa abandu bo MWAMI tawe.

²“Omwana wosi owebul'lwa musimba, nohomba olwibulo lwomundu uyo, kata niyakhaba okhwola khulwibulo lwelikhumi arakhenjisibwakhwo mumukanda kwabandu bo MWAMI tawe.

³“Omuamoni nohomba Omumoabu nohomba wosi owolwibulo lwabwe, kata okhwola khubolwibulo lwelikhumi arakhenjisibwakhwo mumukanda kwabandu bo MWAMI tawe.

⁴Bali okhusuula okhumuhelesia amaatsi nende ebiokhulia olwa mwali nimuli khuluchendo lwokhurula Emisiri, khandi barunga amapesa khu Balaamu omusiani wa Beori okhurula mwitookho lia Patsori musibala sia Mesopotamia okhumulaama esilaamo siobubi.

⁵Nebutswa OMWAMI Nyasaye wenywe siyahuhia khuka Balaamu tawe; nebutswa yamala akalukhanie esilaamo yisio okhuba tsikhabi; sichila yali niyamuyanza.

⁶Murakhakholakhwo esindu siosi okhukhonya abetsinzibulo nohomba okhubakhola abahinda tawe.

⁷“Murakhachaayakhwo Abaedomu tawe, nabekho benywe. Khandi murakhachaayakhwo Abaamisiri tawe sichila mwamenyangakhwo musibala siabwe.

⁸Okhuchiaka nolwibulo lwakhataru okhutsia imbeli abaana babwe bakhenjisibwe mumukanda kwabandu bo MWAMI.

⁹“Nimumenyele mukambi mumatukhu kelihe, okhwola mwikal'le esindu siosi esinyala khumukhola okhuba abomusilo.

¹⁰Omundu musaatsa niyakhaba owomusilo khulwo khweloorela okhwola atsie esioba wekambi ma abutseyo.

¹¹Khumukolooba yesinge omubili ne olweliuba liyelanga akalukhe mukambi yimwo.

¹²“Okhwola mube nende habundu esioba wekambi ahamunyala okhutsia nimwenyanga okhwekhonya.

¹³Muchinge elabusi singa silala khubiokhurumikhila, kho nimwenya okhwekhonya muyabe obuko ma mufunikhe nimwakhamala okhwekhonya.

¹⁴Mulole mbu ekambi neyisiyikhu, sichila OMWAMI Nyasaye wenywe ali nenywe mukambi iyo khulwo khumulinda nende okhumuhelesia obulechi khubasuku benywe. Murakhakholakhwo esindu siosi esibi esiakhachila OMWAMI amukhupe omukongo tawe.

¹⁵“Omuhambe niyakhelukha okhurula khu mwamiwe ma yeetse khuibe khulwokhumusoola, orakhamukalusia khumweneye tawe.

¹⁶Anyala okhumenya mwitookho liosi eliaba niyenyele ne orakhamusandia tawe.

¹⁷“Omuisiraeli wosi omusaatsa nohomba omukhasi arakhabakhwo omusambale muhekalu tawe.

¹⁸Khandi amapesa kosi akakhanyoolekha okhurula mubusambale singa yibu karakhaleerwakhwo munyumba yo MWAMI Nyasaye wenywe khulwo okhuhesia esiesuho tawe. OMWAMI wasuula abasambale bomuhekalu.

¹⁹“Niwakhakopia amapesa nohomba ebiakhulia nohomba esindu siosi khu Muisiraeli wasio orakhamureeba injelesio tawe.

²⁰Onyala okhureeba injelesio khusindu siosi esiokopisie omucheni owamenyibwa, tawe isio esiokopisie Omuisiraeli wasio. Mulonde lilako yili ne OMWAMI Nyasaye wenywe yeetsa khumulamila tsikhabi khubindu biosi ebia mwitsa okhuba nimukholanga musibala esia mwitsa okhumenyamwo.

²¹“Olwa mwesuhanga esiokhol'la OMWAMI Nyasaye wenywe, murebil'la okhusihesia tawe. OMWAMI Nyasaye wenywe alamubanza, ne netsimbi okhubula okhuhesia siesuho sisio.

²²Netsimbi norahesia esiesuho yisio khu MWAMI,

²³nebutswa niwesuha norahachibwe, okhwola olole uhesisie esiesuho yisio.

²⁴“Ne nikaba obir'ra khunjila ebir'ranga m'mukunda kwemisabibu chiomundu, onyala okhulia emisabibu chiosi echia wenya, nebutswa orakhachinjilakhwo musikapo tawe.

²⁵Olwoba nochendanga khunjila ebir'ranga m'mukunda kwobule kwomundu, onyala okhulia ebisalu biobule obwonyala okhwiya namakhono kaako, nebutswa orabukhalaka neinjeso tawe.