Read lunyore OKHUKALUKHILA MUMALAKO 24 Bible Online

OKHUKALUKHILA MUMALAKO 24 - lunyore bible

OKHUKALUKHILA MUMALAKO 24

¹“Omusaatsa naba nateesia omukhasi ma olunyuma nakhalaka mbu samwenya tawe sichila anyoolanga ling'ana muye eliramuyanzisianga, kho ahandike etsibarwa tsiokhumukhunga, atsihaane khuye ma amukhunge okhurula hango hahe.

²Ne nikakhaba omukhasi uyo yakhateesibwa nomusaatsa undi,

³khandi naye nakhalaka mbu samwenya tawe, ma naye khandi ahandike etsibarwa tsiokhumukhunga ma atsihaane khuye ma amukhunge okhurula hango hahe. Nohomba kata omusaatsa uwe wakhabili naba nafwa.

⁴Kata kabe mbwena, omusaatsa uwe owokhuranga aramuteesia khandi tawe; amubale omukhasi uyo singa owomusilo. Ne naba namuteesia khandi, kalaba akes'sinyo khu MWAMI. Murakholakhwo tsimbi tsies'sinyo yitsi musibala esio MWAMI Nyasaye wenywe amuhelesianga tawe.

⁵“Olwomusaatsa aba nateesisie omukhasi omweha, arahachibwa okhutsia mwihe nohomba okhukhola emilimo chindi chiosi chiesioba tawe. Ahebwe okhuhuluukha omuhika mulala kho abe onyala okhuba hango nasangasia omukhasi uwe.

⁶“Noba nokopia omundu esindu orabukula oluchina lwokhuselakhwo obuswache bubwe kho lube singa esisingo khulwe likobi okhurungwa tawe; okhuba wakhaba nabukuye esia abeinyumba barumikhilanga okhunyoola esiokhulia kho babe mwoyo.

⁷“Omundu wosi owakhanyol'lokha ma yebe Omuisiraeli wasie ma amukhole omusumbawe nohomba amukusie okhuba omusumba, okhwola omwibi uyo yerwe. Munjila yiyi mulahinia obubi yibu mwinywe.

⁸“Noba nolwalanga obuchele, olole mbu okholanga kosi aka Balawi bakhubool'langa. Olonde amebaalo aka mbahelesisie.

⁹Mwitsul'le ako MWAMI Nyasaye wenywe yali okhukhol'la Miriamu olwa mwali nimurulanga Emisiri.

¹⁰“Olwa okopianga omundu esindu, orenjila munyumba yiye okhubukula ingubo eya yetsa okhukhuhelesia ebe singa omusingo tawe;

¹¹olindil'le esioba ma olekhe akhuler're omwene.

¹²Naba nali omumanani, orabba n'nayo okhwola litukhu lindi tawe;

¹³omukalusisie buli khubwile bwa bulitukhu kho achiebiikhe ma akone n'nayo. Kho alasangala ne OMWAMI Nyasaye wenywe alasangasibwa n'nenywe.

¹⁴“Orakaata omurumikhi omumanani khandi omutakha owa wahandika kata abe Omuisiraeli wasio nohomba omucheni owamenyibwa mu elala mumataala kenywe tawe.

¹⁵Sielitukhu eliuba nisili okhuyeela omuhe omurungo khubukholibwe bwelitukhu yilio; atakhanga amapesa yako ne anaayanga mumwoyo kukwe okhukanyoola. Noramurunga alalakaya khu MWAMI khulwe ibe, nawe olaba nesikha sietsimbi.

¹⁶“Abebuli barerwa khulwo obubi bwabaana babwe tawe, ne abaana bareerwa khulwobubi bwabebuli babwe tawe; omundu yeerwe khulwobubi bubwe omwene.

¹⁷“Muralilil'la abacheni abamenyibwa nende ababisandu tawe; kata murabukula ingubo yomulekhwa ebe singa omusingo tawe.

¹⁸Mwitsul'le mbu mwalinji abasumba musibala sie Misiri khandi mbu OMWAMI Nyasaye wenywe niye owamununula okhurula mubusumba; nisio esichil'le nimuha lilako yili.

¹⁹“Olwa muchesanga ebiamo bienywe ma mubula okhuleera bulala khubuswache bwenywe obwa mufun'ne, murakalukha okhuburuluma tawe; bulekhelwe abacheni abamenyibwa, nababisandu nende abalekhwa kho OMWAMI Nyasaye wenywe naye amulaamile ikhabi mukosi akamukholanga.

²⁰Olwa mubetsanga nimunochele emiseituni chienywe olwokhuranga, murakalukha okhuruluma etsisikaye tawe; yitsio netsiabacheni abamenyibwa, nababisandu nende abalekhwa.

²¹Olwa mubetsanga nimunochele emisabibu chienywe olwokhuranga, murakalukha okhuruluma etsisikaye olwakhabili tawe; emisabibu etsibetsanga nitsisikaye netsiabacheni abamenyibwa, nababisandu nende abalekhwa.

²²Murebil'lakhwo mbu mwalinji abasumba musibala sie Misiri tawe; nisio esichil'le nimuha lilako yili.