Read lunyore OKHUKALUKHILA MUMALAKO 25 Bible Online

OKHUKALUKHILA MUMALAKO 25 - lunyore bible

OKHUKALUKHILA MUMALAKO 25

¹“Nikakhaba Abaisiraeli babili banyala okhutsia musiina khulwokhuloosia oburambane bwabwe ne mulala niyakhanyoolekha nabula esikha ne oundi omuse nikumufwila,

²ne nikakhaba mbu owomuse kufwiliye yakhakhalachilwa okhutiabwa ebiboko, omukhalachi yeetsa okhumulaka akone nakhupile inda hasi ma atiabwe. Amabalo kebiboko keetsa okhweleta khumabi komundu uyo akhol'le.

³Anyala okhuhebwa ebiboko ebihela amakhumi kane, ne birayomba yibio tawe, nibiyomba yaho bitsa okhumusimbia omurwe imbeli womukanda.

⁴“Orakhaboha ehili omunwa olweba nehulanga obuswache tawe.

⁵“Nikali abasiani bomundu mulala nibaba nibamenyanga habundu halala, ne mulala khubo naba nafwa, naraibulakhwo omusiani wosi, kho sikahel'le omukhasi owalekhele aleerwe nende omundu orali weinyumba yiyo tawe; nomulimo kwomusiani wanga owafwa ula okhukalusia omulekhwa.

⁶Omusiani womukhasi omulekhwa uyo aranga okhwibulwa nomulekhwa uyo yakhabalwa okhuba omusiani womundu owali okhufwa, kho olwibulolwomundu wafwa uyo lutsilil'le musibala sia Isiraeli.

⁷Ne nikakhaba omusiani owa ahabwe nyene yafwa siyenya okhukabusia omukhasi wamwabo tawe, okhwola omulekhwa uyo atsie habemeli belitookho babukan'nanga ma aboole mbu, ‘Mulamwa wanje usuye okhungalusia; usuye okhuhelesia omusiani wabwe omwana omusiani wokhutsitsachisia olwibulo lulwe mubandu ba Isiraeli.’

⁸Kho abemeli belitookho beetsa okhulanga mulamu nyene ma bal'lome khuye. Niyakhatsilil'la okhusuula okhumukabusia,

⁹omukhasi mulekhwa uyo yetsa okhutsia khumulamu nyene imbeli wabemeli belitookho, ma ahiinie esilaaro silala esiamulamu nyene ma amufutsire amare m'moni, ma aboole mbu, ‘Kano niko akekholekhanga khumusaatsa wosi osuulanga okhuhelesia omusiani wabwe omundu wokhutsitsachisia olwibulo lulwe.’

¹⁰Abeinyumba yiye bakhamanyikhe mu Isiraeli singa ‘abeinyumba yomusaatsa owesilarosie siahinibwa musilenje.’

¹¹“Nikakhaba abasaatsa babili bakhupananga ne omukhasi mulala owabasaatsa yabo nateema okhukhonya omusaatsa uwe khulwo okhukhwesa imbeli yomusaatsa undi,

¹²muramubeela tsimbabasi tawe; mukhalake omukhono kukwe.

¹³“Murabbakhwo netsilatili tsiokhwibilamwo abandu tawe.

¹⁴Kata murabbakhwo nebichelo biokhukat'tamwo abandu tawe.

¹⁵Murumikhile etsiratili tsiahabwene nende ebipimo biahabwene, kho mube abanyala okhumenya amatukhu amenji musibala sio MWAMI Nyasaye wenywe amuhetsanga.

¹⁶OMWAMI asinyikhilanga yabo abakaatanga.

¹⁷“Mwitsul'le aka Bamaleki bamukhol'la olwa mwali nimurulanga Emisiri.

¹⁸Sibalikhwo noburi khu Nyasaye tawe, kho bamala nibamuseera okhurula inyuma wenywe olwa mwali nimuchonyele nimuhweye tsingufu ma nibeera yabo bosi abali nibasikaye inyuma.

¹⁹Khulwe yako olwo MWAMI Nyasaye wenywe nabe namuhelesisie esibala ma namusingile okhurula khubasuku benywe abamenyele ahembi n'nenywe, mube subi okwira Abaamaleki bosi kho abuleho onyala okhubetsul'la khandi. Murakhebil'la akene yaka tawe.