Read lunyore OKHUKALUKHILA MUMALAKO 26 Bible Online

OKHUKALUKHILA MUMALAKO 26 - lunyore bible

OKHUKALUKHILA MUMALAKO 26

¹“Nimumal'le okhubukula esibala esio MWAMI Nyasaye wenywe namuhelesie ma nimumal'le okhumenyamwo,

²simulala khwinywe okhwola abikhe musimwelo ebiamo biokhuranga khubiraakwa ebia namuchese ne okhwola muhile habundu halala aho MWAMI Nyasaye wenywe nayahule khulwo okhwekayakayilwaho.

³Atsie khumwesaalisi oli khuburumikhi bwomulimo olwene yilwo ma amubool'le mbu, ‘Luno manyianga OMWAMI Nyasaye wanje mbu mal'le okhwinjila musibala esia yali okhwesuhila abakuka befwe mbu yakhabahelesie.’

⁴“Omwesaalisi nabukule esimwelo yisio okhurula khuye ma asire imbeli wolusambwa lwo MWAMI Nyasaye wenywe.

⁵Ma, imbeli wo MWAMI muboole amang'ana kano: ‘Kuka wanje yali Omuaramai omuhuyahuyi owatsia Emisiri nende abeinyumba yiye okhumenya Emisiri. Bali abandu batititi mumabalo olwa batsiayo, nebutswa bameetekha nibakwa lihanga likali khandi elietsingufu.

⁶Abaamisiri bakhusandia obutinyu ma nibakhuhachia okhukhola emilimo singa abasumba.

⁷Nilwo olwa khwalakayila OMWAMI Nyasaye wabakuka befwe akhukhonye. Yakhuhulila, ma nalola esibi siefwe, nobutinyu bwefwe nende okhunyakhana khwefwe.

⁸Mutsingufu tsitsie nende obunyalibwe, yakhununula okhurula Emisiri. Yakhola akamangalimwa, ma nahuchil'la ebindu biokhurisia nibiekhola.

⁹Yakhuleera hano ma nakhuha esibala siobuhinda khandi esiebiamo ebinji yisi.

¹⁰Kho luno mbaananga khu MWAMI esitonye siokhuranga khubichese ebia yambelesisie.’ “Ma are esimwelo hasi imbeli wokhubaho khwo MWAMI ma yekayakayile habwene yaho.

¹¹Osangale khulwebindu ebilahi ebio MWAMI Nyasaye wenywe akhuheye ibe nende abeinyumba yiyo; ne ohuchil'le Abalawi, nende abacheni abamenyibwa mwinywe basangale halala n'nawe.

¹²“Siomuhika kwakhataru ahaane esielikhumi khu Balawi, nokhubacheni abamenyibwa, nokhubabisandu nende khubalekhwa, kho kabe mbu siabandu bosi babetsenje nende biosi ebia batakhanga okhulia. Olwa oba nokhol'le yaka,

¹³obool'le OMWAMI mbu, ‘Sibulakhwoho khusitonye siosi esielikhumi esitsienukhu esisikaye munzu yanje; mal'le okhusihaana khu Balawi, nokhubacheni abamenyibwa, nokhubabisandu nende khubalekhwa, singa waindachile okhukhola. Sikhol'le esikala marwi kata nohomba okhwibil'lakhwo elala khumalako kaako khuke sielikhumi tawe.

¹⁴Sindiyekhwo esitonye siosi khusio olwa ndali musibeela tawe; simbinisiekhwo esitonye siosi khusio esioba weinzu yanje olwa ndali m'musilo tawe; khandi simban'nekhwo kata esitonye siosi khusio singa omusango khumisambwa tawe. Ndali okhulonda amalako kaako E OMWAMI; khol'le kosi aka walaka khuke sielikhumi.

¹⁵Henga hasi okhurula mubutsienukhu bubwo Mwikulu ma olaamile abandu ba Isiraeli tsikhabi; khandi olaamile esibala siobuhinda nende esiebiamo esia ukhuheye tsikhabi, singa wali okhwesuhila abakuka befwe.’

¹⁶“Olwaleelo, OMWAMI Nyasaye wenywe amulakanga mulonde amalako kaake kosi; kho mukalonde mubusubilwa nomwoyo kwenywe kwosi.

¹⁷Olwaleelo mumal'le okhuhuchil'la OMWAMI Nyasaye wenywe; mwesuhile okhumulonda nende okhulonda amalako kaake kosi nokhukhola kosi aka amulakanga okhukhola.

¹⁸Olwaleelo OMWAMI amuhuchiliye inywe okhuba abandube omwene, singa yali okhumwesuhila; ne amulakanga okhulonda amalakoke kosi.

¹⁹Ye namukhole okhuba abakhongo okhubira lihanga lindi liosi eliayalomba, nenywe namuleere oluyali nende ifuma khuliira lilie. Namube abandube omwene singa yali okhwesuha.”