Read lunyore OKHUKALUKHILA MUMALAKO 27 Bible Online

OKHUKALUKHILA MUMALAKO 27 - lunyore bible

OKHUKALUKHILA MUMALAKO 27

¹Kho Musa halala nabemeli ba Baisiraeli, babool'la abandu mbu, “Mulonde amalako kosi akamuhelesianga litukhu lio lwalelo.

²Litukhu elia mwakhambukhe omuchela kwa Yorodani ma mulenjile musibala sio MWAMI Nyasaye wenywe namuhelesie mwombokhe amachina amakali ma mukomelekhwo esimiti,

³ma muhandiikekhwo amalako kosi nende amachetsiyio yaka. Olwa namube nimwinjiye musibala siobuhinda nende mwiloba elilimwo obunolu elio MWAMI Nyasaye wabakuka benywe yamusubisia

⁴ne nimusili elubeka lundi lwomuchela kwa Yorodani, mwombokhe amachina yaka khusikulu sia Ebali singa obwa mulakanga okhukhola olwaleelo ma mukomelekhwo esimiti.

⁵Mwombokhe olusambwa habwene yaho olwalombwa khumachina akararumikhilwa okhutuywakhwo nebichuma tawe.

⁶Olusambwa lwosi olwa namwombokhele OMWAMI Nyasaye wenywe lulombwe khumachina akasili okhwaranibwamwo. Habwene yaho niho aha namuhan'ne emisango chiokhusambwa,

⁷ne yaho niho aha namuhan'ne omusango ma mulie omusango kwobuhambani ma mube nende okhwekhoya imbeli wo MWAMI Nyasaye wenywe.

⁸Khumachina akahomelwakhwo esimiti muhandiikekhwo bulahi buli ling'ana liamalako ko MWAMI.”

⁹Ma Musa nende abesaalisi Abalawi, nibabool'la abandu ba Isiraeli bosi mbu, “Hulile akanzia okhuboola, inywe abandu ba Isiraeli; mureke amarwi khumang'ana kanje. Litukhu liolwaleelo mumal'le okhukwa abandu bo MWAMI Nyasaye wenywe;

¹⁰kho muhulile ma mulinde amalako kosi akamuhetsanga litukhu liolwaleelo.”

¹¹Ma Musa nabool'la abandu ba Isiraeli mbu,

¹²“Nimumal'le okhwambukha omuchela kwa Yorodani tzinzibulo, tsino natsisinjile khusikulu sia Kerisimu olwetsikhabi natsibe nitsilaamilwanga abandu; Abasimioni, Abalawi Abayuda, Abaisakari Abayusufu nende Ababenjameni

¹³Ne tsinzibulo tsino natsio natsisinjile khusikulu sia Ebali olwesilaamo siobubi nasibe nisiboolwanga; Abarubeni, Abagadi, Abaasheri, Abasabuloni, Abadani nende Abanafutali.

¹⁴Abalawi nababoole amang'ana kano nomwoyo omukali.

¹⁵“ ‘Esilaamo sia Nyasaye sibe khumundu wosi owakhalomba esiniini okhurula khwichina, khumusaala nohomba khusibia ma asiekakayenje masilisi; OMWAMI wasuula abekayakayanga ebiniini.’ “Ne abandu bosi bakalusie mbu, ‘Amina!’

¹⁶“ ‘Esilaamo sia Nyasaye sibe khumundu wosi orahaananga oluyali khu papa uwe nende mama uwe!’ “Ne abandu bosi bakalusie mbu, ‘Amina!’

¹⁷“ ‘Esilaamo sia Nyasaye sibe khumundu wosi oba nasunda esikhoni siolwakho lwomukunda kwomurende uwe.’ “Ne abandu bosi bakalusie mbu, ‘Amina!’

¹⁸“ ‘Esilaamo sia Nyasaye sibe khumundu wosi onyala okhwemel'la omubofu munjila erali eyahabwene.’ “Ne abandu bosi bakalusie mbu, ‘Amina!’

¹⁹“ ‘Esilaamo sia Nyasaye sibe khu uyo wosi owakhanuula omucheni wamenyibwa nohomba kata omukhasi omulekhwa, ebindu biabwe.’ “Ne abandu bosi bakalusie mbu, ‘Amina!’

²⁰“ ‘Esilaamo sia Nyasaye sibe khumundu wosi onyala okhusimbia papa uwe omurwe khulwokhuheya nende mulala khubakhasi ba papa uwe.’ “Ne abandu bosi bakalusie mbu, ‘Amina!’

²¹“ ‘Esilaamo sia Nyasaye sibe khumundu wosi owakhaheya nomuruko.’ “Ne abandu bosi bakalusie mbu, ‘Amina!’

²²“ ‘Esilaamo sia Nyasaye sibe khumundu wosi owakhaheya nambotso nyene nohomba omukhaana wa papa uwe.’ “Ne abandu bosi bakalusie mbu, ‘Amina!’

²³“ ‘Esilaamo sia Nyasaye sibe khumundu wosi owakhaheya nanyakhusala nyene.’ “Ne abandu bosi bakalusie mbu, ‘Amina!’

²⁴“ ‘Esilaamo sia Nyasaye sibe khumundu wosi owokhwira abandu masilisi.’ “Ne abandu bosi bakalusie mbu, ‘Amina!’

²⁵“ ‘Esilaamo sia Nyasaye sibe khumundu wosi ohuchil'langa okhuhebwa amapesa khulwo okhwira omundu orali nesikha tawe.’ “Ne abandu bosi bakalusie mbu, ‘Amina!’

²⁶“ ‘Esilaamo sia Nyasaye sibe khumundu wosi oralondanga amalako ka Nyasaye kosi nende amebaalo kaake kosi.’ “Ne abandu bosi bakalusie mbu, ‘Amina.’