Read lunyore OKHUKALUKHILA MUMALAKO 28 Bible Online

OKHUKALUKHILA MUMALAKO 28 - lunyore bible

OKHUKALUKHILA MUMALAKO 28

¹“Noba nohulila OMWAMI Nyasaye uwo ma olonde amalako kaake kosi aka khuhelesianga olwaleelo, alakhukalihia okhuyomba lihanga lindi liosi khusibala.

²Olonde OMWAMI Nyasaye uwo ma tsikhabi yitsi tsiosi tsilaba etsisaio:

³“OMWAMI akhulaamile tsikhabi mwitookho nende mumikunda.

⁴“OMWAMI akhulaamile tsikhabi okhunyoola abaana abenji, nebiamo ebinji halala netsing'ombe tsinyinji nende amakondi amenji.

⁵“OMWAMI akhulaamile tsikhabi khubiraakwa biobuswache bubwo nende ebiokhulia ebiolombanga okhurula mubwo.

⁶“OMWAMI alaamile siesindu esiokholanga tsikhabi.

⁷“OMWAMI alaleka abasuku baabo olwa bakhuseeranga. Balakhuseera okhurula elubeka l'lala, nebutswa balelukhila mutsimbeka tsine natsitaru okhurula khuibe.

⁸“OMWAMI Nyasaye uwo alakaasia emilimo chichio khandi aleetsusia ebiachi bibio nende obuswache. Alakhukaasisia musibala esia akhuhelesianga.

⁹“Nimuba nimuhulila OMWAMI Nyasaye wenywe nimukhola kosi aka amulakanga, namulombe okhuba abandu baabe omwene singa yali okhwesuha.

¹⁰Nilwo olwa abandu bosi khusibala nabalole mbu OMWAMI umal'le okhumwahula inywe okhuba abandu baabe omwene, ma nabamurie inywe.

¹¹OMWAMI namuhe abaana abenji, tsing'ombe tsinyinji, nende ebiamo ebinji musibala esia yasubisia abakuka benywe okhumuhelesia.

¹²Narume ifula munyinga indahi okhurula mubiachi biobuhinda bubwe mwikulu ma nakaasie emilimo chienywe ma kho mube abanyala okhukopia amahanga kandi, nebutswa mubule okhukopakhwo okhurula khwihanga liosi liosi.

¹³OMWAMI nakhukhole ibe okhuba omwemeli mumahanga kandi kosi ne tawe omulondi; namuhindihalenje khasotso ne sinamuramwekhwo tawe nimuba nimulonda mubusubilwa amalako kosi akamuhelesianga olwaleelo.

¹⁴Nebutswa murakakhol'lakhwo esikala marwi munjila yosi tawe, kata murekayakayakhwo nende okhurumikhila abanyasaye bandi tawe.

¹⁵“Nebutswa nimuba nimukhol'la OMWAMI Nyasaye wenywe esikala marwi, khandi nimubula okhulonda mubusubilwa amalakoke ke kosi nende amebaalo kaake aka muhelesianga olwaleelo, kho ebindu ebibi yibi biosi bilekhola khwinywe:

¹⁶“OMWAMI alalaama amataala kenywe kosi nende emikunda chienywe chiosi esilaamo siobubi.

¹⁷“OMWAMI alalaama esilaamo siobubi khubiraakwa bienywe biobuswache nende khubiokhulia ebia mulombanga khubuswache tsana.

¹⁸“OMWAMI alamulaama esilaamo siobubi khulwo okhumuhelesia abaana bati nende ebichese bitititi nende tsing'ombe tsindititi nende amakondi matititi.

¹⁹“OMWAMI alalama esilaamo siobubi khusiesindu siosi esia mwakhakhola.

²⁰“Nimuba nimukhola obubi ne nimusuula OMWAMI, alamuleer'ra likhupako, okhukoyana nende amanyakhano mu siesindu esia mwakhakhola, okhwola olwa muba nimumumilwe bwangu mwesi pe.

²¹Namuleer're obulwaye khubulwaye bundi, okhwola olwa mwesi namube nimumuluywe narasikalakhwo kata mulala musibala esia namubukule tawe.

²²OMWAMI namukhuye nobulwaye bwokhuhambania, nokhusimba nende emirengo; narume esimi nende obusindu obululu okhusamba ebiraakwa bienywe. Amakhupako yaka kakhabe mwinywe okhwola olwa mufwa.

²³Ifula sinekwekhwo tawe, ma liloba lienywe naliome k'ka singa lichina.

²⁴Musilenjesie ifula, OMWAMI narume esihutsutsu nende imbumbuyeka okhwola olwa muba nimumumilwe mwesi.

²⁵“OMWAMI nakhole abasuku benywe okhuba nobulechi khwinywe. Namubaseera okhurula elubeka l'lala nebutswa namwilukhile mutsimbeka tsiosi okhurula khubo, ne abandu bosi abokhusibala nabarimukhwe ikholo olwa nabalole yaka nikekholekhanga khwinywe.

²⁶Olwa mwakhafwa, amanyonyi nende etsisolo tsiomubulimo natsitse nitsilia emibili chienywe, ne sinabeho kata mulala owokhutsikhunga tawe.

²⁷OMWAMI namurumile amasunguri khumibili chienywe singa aka yarumila Abaamisiri. Nakhole emibili chienywe nachiatikhekhwo amakhwaku. Nachitsulekhwo amabondo ma nakamutsinzine nebutswa indesi sinebeho tawe.

²⁸OMWAMI namukhole namukosie okhumanyilisia khwenywe; namukhuye nobubofu nende indenga.

²⁹Namuhutume mumubasu hakari singa ababofu, ne sinamutoole injila yenywe tawe. Sinamuhindihale musiesindu esia mwakhakhola tawe. Namumenye nimusandibwanga nende mukhubatswa ne sinabeho owokhumukhonya tawe.

³⁰“Nohambe omukhaana nebutswa omundu undi namuteesie. Nawombokhe inyumba nebutswa sinomenyemwo tawe. Noraake omukunda kwemisabibu nebutswa sinotsiliekhwo tawe.

³¹Tsing'ombe tsienywe natsisinzwe nimureyekhwo imoni, nebutswa sinamuliekhwo inyama yatsio tawe. Etsipunda tsienywe, natsibukulwe nimureyekhwo imoni ne sinatsikalusibwe khwinywe tawe. Amakondi kenywe nakahebwe abasuku benywe ne sinabeyo owokhumukhonya tawe.

³²Abasiani benywe nabakhaana nabakusibwe singa abasumba khubacheni behale nimureyekhwo imoni. Sielitukhu tsimoni tsienywe natsichonye nimuhenganga okhuchelela khwabaana benywe nebutswa ninamubalole tawe.

³³Lihanga licheni nalibukule ebiraakwa biosi ebia mwatitikhana okhuraaka, nenywe sinamunyoolekhwo esindu siosi nikhurali okhusandibwa nende okhukhol'lwa obubi buli khase.

³⁴Okhusaalila khwenywe nakhuchile namukosie okhumanyilisia khwenywe.

³⁵OMWAMI nayetsusie ebilenje bienywe nende amakhwaku amalulu; amasunguri nakaame khumubili kukwo okhurula khumurwe okhwola khubilenje.

³⁶“OMWAMI namuhile halala nomuruchi wenywe musibala siehale, ahamusili okhumenyakhwo kata abakuka benywe; ebwene yiyo namurumikhile abanyasaye ababaatswa khumisaala nende khumachina.

³⁷Mumahanga ako MWAMI namusalaniemwo, abandu bakhahuke khu akekhol'le khwinywe; nabamukhol'le inzekhelesi ma nabamutsekule.

³⁸“Namuraake imwo inyinji, nebutswa namuchese bitititi, sichila tsisiche natsilie ebiraakwa bienywe.

³⁹Namusimikhe emikunda chiemisabibu nimuchilinda bulahi nebutswa sinamunoke emisabibu chiachio kata okhunywa khuwaini yachio tawe, sichila ebikoko nabichilie.

⁴⁰Emiseituni nachimele habundu hosi musibala sienywe, nebutswa sinamube namafura kemiseituni tawe, sichila emikhuyu chiemiseituni nachibungulukhe.

⁴¹Namube nabasiani nende abakhaana, nebutswa namubakosie sichila nababukulwe singa ababohe bomwihe.

⁴²Emisaala chienywe chiosi nende ebiraakwa nabilibwe nebikoko.

⁴³“Abacheni abamenyanga mwinywe nabameetekhe mubunyali obwinji olwa nenywe namutsilil'le okhukosia obunyali bwenywe sikalaha.

⁴⁴Nababe namapesa kokhumukopia, nebutswa nenywe sinamubekhwo n'nako okhubakopia tawe. Mukhumalila nababe abaami benywe.

⁴⁵“Amakhupako yaka kosi naketse khwinywe khandi nakabetsenje n'nenywe okhwola olwa mulamumwa, sichila simwahulila OMWAMI Nyasaye wenywe nimulonda amalako kosi aka yamuha tawe.

⁴⁶Kakhabe obukobokheli bwobukhalachi bwa Nyasaye khwinywe nende khutsinzibulo tsienywe inziayo.

⁴⁷OMWAMI yamulaamila tsikhabi munjila tsiosi, nebutswa simwamurumikhila nemioyo emilahi nende etsiobusangali tawe.

⁴⁸Kho, khulwe yako, namurumikhilenje abasuku abo MWAMI atsitsanga okhumurumila. Namube neinzala nobuluho esihechenye nimutakhanga siesindu. OMWAMI namusandie obululu okhwola olwa namumumwe.

⁴⁹OMWAMI namuleer're lihanga okhurula ehale okhumuseera, elia muramanyile ol'limi lwalio. Naliyele khwinywe singa inditsu.

⁵⁰Abandu belihanga yilio nababe abalulu sila tsimbabasi khumundu wosi, omwana kata omusakhulu.

⁵¹Bakhalie emiruko chienywe nende ebiraakwa bienywe, nenywe namufwe khulwe inzala. Sinabamulekhelekhwo obuswache bwosi, kata ewaini, noho amafura kemiseituni, nemiruko, kata likondi liosi tawe; nenywe namufwe.

⁵²Nabaseere sielitaala musibala esio MWAMI Nyasaye wenywe namuhelesie, ne amasisi akasirwe amarambi aka mwelayil'langamwo nakakwe.

⁵³“Olwa abasuku benywe baba nibafumbiye amataala kenywe, namube musibi sieinzala yebiokhulia mbu namulie kata abaana abo MWAMI Nyasaye wenywe nabe namuheye.

⁵⁴Kata omundu wolukoosi owebulwa bulahi sinakabul'le amwabowe, nohomba omukhasiwe kata abaanabe ebiokhulia tawe.

⁵⁵Sinakabul'lekhwo kata mulala khubo inyama yomwanawe owanabe naliitsanga tawe, sichila naabe musibi esikali olwa namuseerwe.

⁵⁶Kata omukhasi wolukoosi owebulwa bulahi, owahindihala okhusila mbu arachendakhwo khubilenje habundu hosi, naye khandi nabe singa mbwo. Sinalekhelekhwo omusaatsawe owa yayanza nohomba kata abaana babe tawe.

⁵⁷Olwomusuku naseere litala lilie, nabe musibi sieinzala ma nalie omwana uwe omutoro masilisi halala netsingobi tsiosi.

⁵⁸“Nimuba nimuralonda mubusubilwa amebaalo ka Nyasaye kosi akahandichilwe musitapu sino khandi nimubula okhuhaana oluyali khuliira elilahi khandi eliokhurisia elio MWAMI Nyasaye wenywe,

⁵⁹alaruma khwinywe nende khutsinzibulo tsienywe obulwaye oburali neindesi nende olumbe oluranyala okhwikal'lwa.

⁶⁰Alakalusia khwinywe obulwaye bwokhurisia obwa mwalikhwo n'nabwo Emisiri, ne simulahona tawe.

⁶¹Khandi yakhaleere khwinywe amalwaye tsimbila tsiosi nende olumbe tsimbila tsiosi etsiraral'lwekhwo musitapu sino esia amalako nende amebaalo ka Nyasaye, ne nenywe namumumwe.

⁶²Kata nimwakhaba abenji singa tsinyininyini tsiokhwikulu, nabandu bati bonyene abanabasikale khwinywe, sichila simwahulila OMWAMI Nyasaye wenywe tawe.

⁶³Singa butswa OMWAMI yayanza ma namuhindihasia khandi namwinjihia okhuba abenji, kho nimbwo khandi nayanze okhumumuma nende okhumuleer'ra esibi. Namuhinibwe musibala esia muli ahembi okhwinjilamwo.

⁶⁴“OMWAMI yakhamusalanie mumahanga kosi okhurula khundulo khwesibala okhwola khundulo khundi, ne ebwene iyo namurumikhile abanyasaye ababaatswa khumisaala nende khumachina, abanyasaye abe inywe kata abakuka benywe barayekayakayakhwo tawe.

⁶⁵Sinamunyole omulembe habundu hosi tawe; sinamulangekhwo habundu hosi ahenywe tawe; OMWAMI namutsukhil'lekhwo esihenda mwoyo, nesibeela nende oburi.

⁶⁶Obulamu bwenywe nabubetsenje musibi khasotso. Om'basu nobutukhu namubetsenje muburi obukali khandi namumenye muburi bwolufu.

⁶⁷Emioyo chienywe nachitechele khulwoburi khukosi akamulola. Siomukamba namwekombenje bwile bwangu; ne siobwile namwekombenje busie bwangu.

⁶⁸OMWAMI namukalusie Emisiri mutsimeeli kata olwa yali niyaboola mbu simwakhakalukhekhwoyo tawe. Ebwene yiyo mwakhateeme okhwekusia abene singa abasumba khubasuku benywe nebutswa abulaho owakhenye okhumukula tawe.”