Read lunyore OKHUKALUKHILA MUMALAKO 29 Bible Online

OKHUKALUKHILA MUMALAKO 29 - lunyore bible

OKHUKALUKHILA MUMALAKO 29

¹Kano niko amang'ana ke Indakano ako MWAMI yalaka Musa alombe nende abandu ba Isiraeli nibali musibala sia Moabu. Kano kosi kali okhumeeta khu Indakano yo MWAMI yalomba nende Abaisiraeli hasikulu sia Sinai.

²Musa yalanga abandu ba Isiraeli bosi halala ma nababool'la mbu, “Inywe abene mwali okhulola ako MWAMI yali okhukhol'la omuruchi we Misiri, khubemeli baabe nende khusibala siosi esie Misiri.

³Inywe mwalola amakhupako amabi, nende akamangalimwa halala namang'ana kokhuchenyia ako MWAMI yali okhukhola.

⁴Nebutswa okhwola khwitukhu lino OMWAMI asili okhumukhola mumanyilisie kosi akamwabir'ramwo.

⁵Khulwemihika amakhumi kane, OMWAMI yamwemel'la okhubir'ra musitsiimi; ne tsingubo tsinywe nende ebilaaro bienywe siabiakhunguhakhwo tawe.

⁶Inywe simwali nemikaati chiokhulia nohomba ewaini nohomba amalwa kokhunywa tawe, nebutswa OMWAMI yali okhumuhelesia ebiamulia khulwo khumanyia mbu niye Nyasaye wenywe.

⁷Ne Olwa khwetsa habundu hano, omuruchi Sihoni wa Heshiboni nende omuruchi Ogu wa Bashani beetsa okhukhulwana ifwe. Nebutswa khwali okhubaleka,

⁸ma nikhubukula esibala siabwe esiakabul'lwa tsinzibulo tsia Rubeni nende Gadi nende enusu yolwibulo lwa Manase.

⁹Mulonde amang'ana kosi akali mundakano nobusubilwa kho mube abanyala okhunyoola ol'lahi mu kosi akamukholanga.

¹⁰“Olwaleelo musinjiye imbeli wo MWAMI Nyasaye wenywe, inywe mwesi abemeli benywe nende abalindi benywe, abasaatsa benywe,

¹¹abakhasi nende abaana, halala nabacheni abamwamenyia khulwo khumuremela emisaala nende okhumusombela amaatsi.

¹²Inywe muli hano olwaleelo khulwo khusanjilana mundakano ino eyo MWAMI Nyasaye wenywe alombanga nenywe nende okhuhuchil'la khu kosi akeboolanga,

¹³kho OMWAMI abe onyala okhuba nobwatooto mbu inywe muli abandu baabe, naye abe Nyasaye wenywe singa obwa yamusubisia khandi obwa yasubisia abakuka benywe, Aburahamu, Isaka nende Yakobo.

¹⁴Inywe simuli mwenyene abo MWAMI alombanga Indakano ino n'nabo halala nende akakhoyele khulondwa tawe.

¹⁵OMWAMI alombanga indakano nende ifwe fwesi abasinjiye hano imbeli uwe olwaleelo nende abolwibulo lwefwe abasili okhwibulwa.

¹⁶“Mwitsul'le singa obulamu bwali obutinyu olwa mwali Emisiri, khandi singa obulamu bwali olwa mwabir'ranga mubibala bia bamahanga kandi.

¹⁷Mwalola ebiniini biabanyasaye bes'sinyo ebialombwa khumisaala, khumachina, khutsahabu nende khufetsa.

¹⁸Muhengelesie okhulola mbu omusaatsa wosi, omukhasi wosi, abeinyumba bosi, nohomba olwibulolwosi olusinjiye hano olwaleelo silumukalukhan'ne OMWAMI Nyasaye wenywe khulwo khwekayakaya abanyasaye betsinzibulo tsindi tawe. Kano kakhafwananibwa singa omusi okukhulanga khulwo khuba omululu ma kuba esumu khusiraakwa.

¹⁹Muhengelesie okhulola mbu sialikhwo hano omundu mulala litukhu lino ohul'langa amesuho kano ne apaale mumwoyo kukwe mbu kosi kakhaba amalahi khuye, kata narakhahesia amesuho yako tawe. Yako kakhamukhuya inywe mwesi, abalahi nende ababi bakherwa.

²⁰OMWAMI siyakhamulekhela omundu weimbila yiyi tawe. Musilenje siene yisio lirima liibi lio MWAMI liakhamusamba singa omul'lo, ne amakhupako kosi akahandikwa musitapu yisi kakhamukwila okhwola olwo MWAMI yakhamwira mwesi.

²¹OMWAMI yeetsa okhumukhola singa esifwanani imbeli wetsinzibulo tsiosi etsia Baisiraeli ma aleere amanyakhano khumundu uyo okhulondokhana nebilaamo ebiahandikwa mu Indakano singa kahandiikwa musitapu siamechesio ko MWAMI yisi.

²²“Mutsinzibulo tsiamatukhu aketsanga, abaana benywe nende abacheni bokhurula mubibala biehale bakhalole amakhupako nende amanyakhano ako MWAMI yakhabe naleer're musibala sienywe.

²³Esibala siakhabe esiomu esiralimwo ebiamo, esietsulamwo elaamu nende echumbi; sibulaho esiakharakwamwo kata obulimo sibunyala okhumelamwo tawe. Liloba lienywe liakhafwane singa amatookho ka Sodoma nende Komora khandi aka Adima nende Seboimu, ako MWAMI yali okhumuma olwa yali nali nelirima liibi.

²⁴Kho esibala siosi siakhareebe mbu, ‘Esiachila OMWAMI nakhola yaka khwiloba liabwe nisina? Nisina esiachila naba nelirima likali?’

²⁵Ne likalusio liakhabe mbu, ‘Sichila abandu bo MWAMI bali okhufunaka Indakano eyabali okhulomba n'naye, Nyasaye wabakuka babwe, olwa yabahinia musibala sie Misiri.

²⁶Bali okhurumikhila abanyasaye bandi aba bali nibasili okhwekayakayakhwo tawe, abanyasaye bo MWAMI yali niyabakaya mbu balekhe okhwekayakaya.

²⁷Kho OMWAMI yasinyikhila abandu baabe ma naleera khusibala siabwe amakhupako akahandikwa musitapu yisi.

²⁸OMWAMI yahambwa nelirima likali ne mwirima liibi yilio yabahinia musibala siabwe ma nabafuuba musibala siabandu abacheni ne ebwene yiyo niyo ahabali okhwola olwaleelo.’

²⁹“Bilikhwoho ebindu bindi ebio MWAMI Nyasaye wefwe yabiikha ebiamasilisi; nebutswa wabisula Amalako kaake ne ifwe nende abaana befwe okhwola khukalonde amatukhu kosi.