Read lunyore OKHUKALUKHILA MUMALAKO 3 Bible Online

OKHUKALUKHILA MUMALAKO 3 - lunyore bible

OKHUKALUKHILA MUMALAKO 3

¹“Olwalondakhwo khwesunda okhutsia elubeka lwesinyolu musibala sia Bashani, ne omuruchi Ogu niyetsa nabasikaribe bosi khulwo khulwana n'nefwe ahembi khwitookho lia Edirei.

²Nebutswa OMWAMI niyambool'la mbu, ‘Oramuria tawe. Ise nzia okhumuhaana ye omwene nabandu baabe nesibala sisie siosi mumakhono kenywe. Mumukhol'le singa mwakhol'la Sihoni omuruchi wa Baamori owarukanga esibala sia Heshiboni.’

³“Kho OMWAMI khandi yara omuruchi Ogu nabandu baabe mumakhono kefwe ma nikhubeera bosi pe.

⁴Munyinga yene iyo khwabukula amatookho kaake kosi; silialikhwoho litookho eliakhurabukula tawe. Amatookho kosi akakhwabukula kali amakhumi kasasaba akali musibala siosi sia Arigobu, esiomuruchi Ogu wa Bashani yarukanga.

⁵Amatookho y aka kali nikasirwa nende tsiminga tsiamasisi amarambi, nebilibwa ebirambi, nebichuma biokhwikala ebilibwa, khandi kaliho amatookho kandi akarassirwa namasisi tawe.

⁶Khwali okhusasia amatookho kosi khandi nikhwira abasaatsa bosi nabakhasi nende abaana, singa khwakhola mumaatala komuruchi Sihoni wa Heshiboni.

⁷Khwabukula tsing'ombe khandi nikhuyaaka amatookho.

⁸“Olwene yilwo khwabukula okhurula khubaruchi babili ba Baamori liloba liosi elili ebukwe womuchela kwa Yorodani, okhuchiakila khumuchela kwa Arinoni okhwola khusikulu sia Herimoni.

⁹(Esikulu sia Herimoni silangwanga Sirioni nende abandu ba Sidoni, khandi silangwa Seniri nende Abaamori.)

¹⁰Khwabukula esibala siosi siomuruchi Ogu wa Bashani: amatookho kali hekulu wesibala esiahelana, esibala sia Gileadi nende Bashani, okhwola khumatookho akali elubeka lwebukwe singa Saleka nende Edirei.”

¹¹(Omuruchi Ogu niye owali wokhumalilikha mubeinzu ya Refaimu. Esitanda sisie siali nisialombwa nebichuma, siali noburambi etsimiita tsine ne obuchiikha bwasio bwali ahembi etsimiita tsibili okhulondokhana nesichelo esiahuchil'lwa. Esitanda yisio sinyala okhulolekha luno mwitookho lia Baamoni elilangwa Rabba.)

¹²“Olwa khwali nikhubukuye esibala yisio ndahelesia abolwibulo lwa Rubeni nende Gadi olusoma lwosi eluli esinyolu welitookho lia Aroeri ahembi nomuchela kwa Arinoni nende esitonye siebikulu biesibala sia Gileadi, halala nelitookho liasio.

¹³Enusu yolwibulo lwa Manase ndabahelesia liloba lia Gileadi eliali nilisikaye, khandi nimbahelesia esibala sia Bashani siosi, ha Ouu yali narukanga, yako nokhuboola liloba lia Arikobu liosi.” (Bashani siamanyikha singa esibala sia Refaimu.

¹⁴Yairi, okhurula mulwibulo lwa Manase yabukula liloba liosi elia Arikobu, yako nokhuboola, liloba liosi elia Bashani, okhwola khulwakho lwa Geshuru nende Makahi. Yakulikha amatookho yako eliira lilie, ma okhwola luno kamanyikha singa amatookho ka Yairi.)

¹⁵“Ndahelesia abeinyumba ya Makiri okhurula mulwibulo lwa Manase esibala sia Gileadi.

¹⁶Ne abolwibulo lwa Rubeni nende Gadi ndabahelesia liloba okhurula Gileadi okhwola khumuchela kwa Arinoni. Hakari homuchela yikwo niho haboolanga khulubeka lwenandete, ne elubeka lwesinyolu boolanga khumuchela kwa Yaboku, esitonye siene yisio nisio esibabukhanianga nende Abaamori.

¹⁷Elubeka lwemasaba, liloba liabwe liolanga khumuchela kwa Yorodani, okhurula khu Nyanza ya Galilaya eyali esinyolu okhwola khu Nyanza ye Chumbi[1] eli enandete ma siola ahesikulu sia Pisiga sichaakilanga elubeka lwebukwe.

¹⁸“Mutsinyinga tsiene yitsio ndabahelesia amalako kano: ‘OMWAMI Nyasaye wefwe umuhelesisie liloba elili ebukwe womuchela kwa Yorodani mumenyemwo. Muhelesie abasaatsa benywe ebilasan'nwe ma mubarume okhukhalania omuchela kwa Yorodani imbeli wetsinzibulo tsindi etsia Baisiraeli, khulwo khubakhonya okhubukula liloba liabwe.

¹⁹Abakhasi benywe, abaana benywe netsing'ombe tsienywe - manyile muli netsing'ombe tsinyinji — bionyene bisikale mumatookho ake ise mal'le okhumuhelesia.

²⁰Mukhonye Abaisiraeli basienywe okhwola olwa babukula liloba lio MWAMI abahelesianga elubeka lwe masaba womuchela kwa Yorodani khandi okhwola olwo MWAMI ahuchil'la bamenyemwo nomulembe, singa obwamukholeye inywe hano. Olunyuma namukalukhe mwiloba yili eliamal'le okhumuhelesia.’

²¹“Kho ndalaka Yoshwa nimubool'la mbu, ‘Ibe umal'le okhulola kosi ako MWAMI Nyasaye uwo akhol'le khubaruchi, Sihoni nende Ogu; khandi yetsa okhukhola mbwo khumundu undi wosi owa mwitsa okhuseera esibala sisie.

²²Murakhabaria tawe sichila OMWAMI Nyasaye wenywe yetsa okhumulwan'na.’

²³“Munyinga yitsio ndasaaya okhusila nimboola mbu,

²⁴‘OMWAMI Wokhunyala Biosi, manyile mbu umanyisie obuchiakilo bwebindu ebikali nende ebiokhuhuka ebiawitsa okhukhola. Abulaho omunyasaye mwikulu nohomba musibala onyala okhukhola ebindu biokhuchenya singa ebiokhol'le yibi!

²⁵Noyanza OMWAMI lekha khalanie omuchela kwa Yorodani, ndole liloba linolu elili elubeka lundi lwa Yorodani, khandi ndole esibala siebikulu esikaasu nende Ebikulu bia Lebanoni.’

²⁶“Nebutswa khulwo obubi bwenywe OMWAMI yali nelirima n'nase kho siyali onyala okhumbulila tawe. Musilenje yisio yaboola mbu, ‘Yako kahel'le! Orakhakaralakhwo khandi tawe!

²⁷Tsia khubutenje bwesikulu sia Pisiga ma ohenge elubeka lwesinyolu, nende enandete khandi ohenge ebukwe khandi ohenge emasaba. Ohenjelesie bulahi esionyala okhulola, sichila siolitsiakhwo okhwambukha omuchela kwa Yorodani tawe.

²⁸Helesia Yoshwa amalako kaake. Omutinyilisie ikholo yiye, sichila niye owanawemel'le abandu okhwambukha injelekha nokhubukula esibala esiololanga sila.’

²⁹“Kho khwasikala mwibanda lihengan'ne nelitaala lia Betsipeori.”