Read lunyore OKHUKALUKHILA MUMALAKO 30 Bible Online

OKHUKALUKHILA MUMALAKO 30 - lunyore bible

OKHUKALUKHILA MUMALAKO 30

¹“Luno mal'le okhumuha obweyangu okhukhalaka hakari wetsikhabi nende esilaamo siobubi. Olwe yaka kosi kaba nikekhol'le khwinywe ma olwa muba nimumenyanga mumahanga kandi aho MWAMI Nyasaye wenywe aba namusalanisie okhutsia, muletsul'la ling'ana elia ndamuha okhukhalaka.

²Inywe halala netsinzibulo tsienywe nimwakhakalukha khu MWAMI nomwoyo kwosi ma mulonde amalako aka muhelesianga olwaleelo,

³kho OMWAMI Nyasaye wenywe namubeele tsimbabasi. Namuchelesie okhurula mumahanga aka yali niyamusalaniamwo, ma alamuhindihasia khandi.

⁴Kata nimwakhaba nimwasalanibwa okhutsia mumbeka tsiehale tsiesibala, OMWAMI Nyasaye wenywe yakhamubunjelesie halala ma amuchelesie ingo,

⁵kho mube abanyala okhubukula khandi esibala esiabakuka bamenyangamwo. OMWAMI namuhindihasie okhusila khandi namuhinjihie okhuyomba obwabakuka benywe balinji khale.

⁶OMWAMI Nyasaye wenywe namuhelesie halala netsinzibulo tsienywe emioyo chiobuhulili, kho mbu mwakhamuyanze nomwoyo kwenywe kwosi ma namutsilil'le okhumenya musibala.

⁷Yakhasukhanie ebilaamo biobubi yibi biosi okhurula khwinywe nabihila khubasuku benywe, abamubihil'lwa nende okhumusandia inywe,

⁸nenywe namumuhulile khandi nimulonda amalako kaake kosi akamuhelesianga olwaleelo.

⁹OMWAMI namuhindihasie mukosi aka mwamukhukhol'la; namube nabaana abenji, nende nemiruko ne emikunda chienywe nachiame ebiamo ebinji. Nasangale okhusila okhumuhindihasia inywe singa obwa yasangala okhuhindihasia abakuka benywe,

¹⁰nebutswa okhwola mumuhulile ma mulonde amalako kaake kosi akahandikwa musitapu siamebaalo kaake yisi. Nakamukhoye okhukalukha khuye nomwoyo kwenywe kwosi.

¹¹“Lilako eliamuhelesianga olwaleelo silili litinyu okhusila nohomba elimuyombele tawe.

¹²Silili ikulu mwikulu tawe. Simukwana okhureeba mbu, ‘Niwina owanokhutsiile ikulu ma akhuleer're hasi, kho khulihulile ma khulilonde tawe?’

¹³Kata silili injelekha weinyanza tawe. Simukwana okhureeba mbu, ‘Niwina owanowambukhe inyanza ma akhuleer're, kho khulihulile ma khulilonde tawe?’

¹⁴Tawe, lili butswa hano n'nenywe. Inywe mulimanyile khandi munyala okhuliitsul'la, kho luno mulilonde.

¹⁵“Olwaleelo muhelesianga obweyangu okhukhalaka hakari wobulahi nende obubi, hakari hobulamu nende okhufwa.

¹⁶Nimwakhalonda amalako ko MWAMI Nyasaye wenywe akamuhelesianga olwaleelo, nimwakhamuyanza, nimumuhulila, ma nimulonda amalako kaake kosi, kho namuhindihale ma namube lihanga liabandu abenji. OMWAMI Nyasaye wenywe namulaamile tsikhabi musibala esia muli ahembi okhwinjilamwo ma mumenyemwo.

¹⁷Nebutswa nimwakhakhola esikala marwi ma nimusuula okhuhulila ma nimwekayakaya abanyasaye bandi,

¹⁸namumumwe mwesi muchetsiyianga hano luno. Sinamumenye amatukhu amenji musibala yisio esili injelekha wa Yorodani esia namwinjilemwo okhusibukula tawe.

¹⁹Luno muhelesianga obweyangu okhwahula hakari wobulamu nende okhufwa, hakari wetsikhabi tsia Nyasaye nende esilaamo sisie siobubi, ne nanjile esibala nende likulu okhukobokhela ling'ana eliamwahula. Mwahule obulamu.

²⁰Muyanze OMWAMI Nyasaye wenywe, mumuhulile, ma mube abasubilwa khuye, ma nilwo olwa nenywe halala netsinzibulo tsienywe namumenye amatukhu emenji musibala esia Nyasaye yesuha okhuha Aburahamu, Isaka, nende Yakobo abakuka benywe.”