Read lunyore OKHUKALUKHILA MUMALAKO 31 Bible Online

OKHUKALUKHILA MUMALAKO 31 - lunyore bible

OKHUKALUKHILA MUMALAKO 31

¹Musa yatsitsachil'la okhul'loma khubandu ba Isiraeli,

²ma naboola mbu, “Luno ise ndi nemihika emia ndala namakhumi kabili, kho sindi onyala okhutsilil'la okhuba omwemeli wenywe tawe. Ne kata nikarali mbwo tawe, OMWAMI waimbool'la mbu ise sindiambukhakhwo omuchela kwa Yorodani tawe.

³OMWAMI Nyasaye wenywe nayemele omwene imbeli wenywe khulwo okhumuma tsinzibulo tsimenyele ebwene yiyo, kho mube abanyala okhubukula esibala siabwe, ne Yoshwa yeetsa okhuba omwemeli wenywe singa obwo MWAMI yaboola.

⁴OMWAMI nabakhuye abandu yabo singa obwa yali okhuleka Sihoni nende Ogu, abaruchi ba Baamori, ma nasasia esibala siabwe.

⁵OMWAMI nabahelesie obulechi khubandu yabo, ne okhwola mubakhol'le singa obwa ndamubool'la.

⁶Okhwola mube neikholo inyomu nende olutswoni. Murakhabariakhwo tawe. Nyasaye wenywe, OMWAMI mwene nabe n'nenywe. Sialamukwisia nohomba okhumulekha tawe.”

⁷Ma Musa nalanga Yoshwa namubool'la imbeli wabandu bosi ba Isiraeli mbu, “Wome ikholo khandi obe nobusubili, niwe owiitsa okhwemel'la abandu yaba okhubukula esibala sio MWAMI yali okhusubisia abakuka babwe.

⁸OMWAMI mwene yeetsa okhukhwemel'la ma abe n'nawe. Siyakhakhukoka nohomba okhukhulekha tawe; kho orakhaba nesihenda mwoyo nohomba okhuria tawe.”

⁹Kho Musa yahandika Lilako lia Nyasaye ma nalihelesia abesaalisi abali nibahebwa okhulinda Lisanduku lie Indakano yo MWAMI, nende abemeli ba Isiraeli.

¹⁰Yababool'la mbu, “Emihika tsine natsitaru nitsihweye, omuhika kwamakobi kalekhelwanga nikwol'le, osome amang'ana kano nomwoyo omukali khwisabo lia Mahindu.

¹¹Osomele abandu ba Isiraeli olwa baba nibetsele okhwekayakaya OMWAMI Nyasaye wabwe habundu halala ahokhwekayakayila.

¹²Olange abasaatsa bosi, abakhasi bosi, nende abaana bosi halala nabacheni abamenyibwa mumatookho kenywe betse halala kho buli mulala khubo ahulile lilako yili ma yeeke okhuhaana oluyali khu MWAMI Nyasaye wenywe nende okhulonda amechesio kaake mubusubilwa.

¹³Munjila yiyi abolwibulo lwenywe abasili okhuhulilakhwo Lilako lio MWAMI Nyasaye wenywe bakhalihulila. Ma bakheka okhumuhulila OMWAMI oluhono lwababa nibasimenyele musibala esia muli ahembi okhubukula khuluchelekha lwa Yorodani.”

¹⁴Kho OMWAMI yabool'la Musa, “Ibe siosili nende amatukhu amenji akokhuba mwoyo tawe. Langa Yoshwa ma omuleere ahe Liheema lili kho mbe onyala okhumuhelesia amalako kaake.” Musa nende Yoshwa batsia ahe Liheema liali,

¹⁵ne OMWAMI nalolekha khubo habwene yaho nali musiilo yelilumbesi eliali ndisinjiye hamuliangokwe Liheema.

¹⁶OMWAMI nabool'la Musa mbu, “Ibe witsa okhufwa bwangu, ne ibe nomal'le okhufwa abandu sibeetsa okhuba abasubilwa khu ise tawe ne beetsa okhufunaka Indakano eyandalomba n'nabo. Beetsa okhundebala ma bekayakaye abanyasaye betsinzibulo tsiesibala esiabali ahembi okhwinjilamwo.

¹⁷Yako nikakhekholekha, nambe nelirima n'nabo; nambalekhe, ma nabeerwe. Amakhupako amenji amabi nakabetsele, ma nabamanyilisie mbu ebindu yibi biekholekhanga khubo, sichila Ise Nyasaye wabwe sisili halala n'nabo tawe.

¹⁸Ma nzia okhusuula okhubakhonya olwene yilwo, sichila bakhol'le amabi khulwo khwekayakaya abanyasaye bandi.

¹⁹“Luno handika olwembo luno hasi ma olwechesie Abaisiraeli ma obakhole balwembe kho lube obukobokheli khu ise khulwo okhubatula.

²⁰Nzia okhubahila musibala siobuhinda nende liloba linolu singa obwa ndasubisia abakuka babwe. Ebwene iyo bakhanyoole ebiokhulia biosi ebiabakhenya ne nabamenyemwo sila amanyakhano. Nebutswa bakhakalukhane khandi balekayakaye abanyasaye bandi. Bakhaasuule khandi balafunake indakano yanje;

²¹ne amakhupako amabi kakhetse khubo. Nebutswa olwembo yilu lulitsilil'la okhwembwa ne lwakhabe obukobokheli khu ise ndubatulanga. Kata luno nisili okhubahila musibala esia ndabasubisia okhubahelesia, manyile akabapaalanga.”

²²Litukhu liene yilio Musa yahandika olwembo hasi ma niyechesia Abaisiraeli.

²³Ma OMWAMI nal'loma khu Yoshwa omusiani wa Nuni namubool'la mbu, “Obe neikholo inyomu nende olutswoni. Ibe nawemel'le Abaisiraeli okhutsia musibala siandabasubisia ne nambe halala n'nawe.”

²⁴Musa yahandika Lilako lia Nyasaye musitapu, nabukula obweyangu okhulola mbu sialekhelekhwo esindu siosi esioba tawe.

²⁵Olwa yali namal'le, yabool'la abesaalisi Abalawi abali nibalindanga Lisanduku lie Indakano yo MWAMI mbu,

²⁶“Bukule esitapu yisi sia Malako ka Nyasaye ma musire halala nende Lisanduku lie Indakano yo MWAMI Nyasaye wenywe kho sibe esinyala okhubaho singa obukobokheli khulwo khutula abandu baabe.

²⁷Manyile singa bali abemioyo emitinyu nende okhubula okhuhul'la. Bateema okhulwana OMWAMI mumatukhu kobulamu bwanje, khandi nabamulwanekhwo okhusila ise nifwiye.

²⁸Mubunjelesie abemeli betsinzibulo tsiosi nende abakhonyel'li babwe imbeli wanje, kho mbe onyala khubabool'la amang'ana yaka; Nzia okhulanga likulu nende sibala okhuba abakobokheli banje khulwo okhumanyia obubi bwabwe.

²⁹Manyile mbu nimal'le okhufwa abandu nababe ababi okhusila ma nabafukule amechesio kanje khubo. Ne amatukhu ketsanga nababukaane nobutinyu, sichila nababe nibamukhol'le OMWAMI okhuba nelirima khulwo khukhola amang'ana ako MWAMI yakaya.”

³⁰Ma Musa naboola nomurwe amang'ana kolwembo lwosi olwabandu ba Isiraeli bosi bali nibahuyianga.