Read lunyore OKHUKALUKHILA MUMALAKO 32 Bible Online

OKHUKALUKHILA MUMALAKO 32 - lunyore bible

OKHUKALUKHILA MUMALAKO 32

¹“Esibala nelikulu, hulile amang'ana kanje, muhulile bulahi aka nzia okhuboola.

²Amebaalo kanje karonye singa ifula yolunyilila ne keetsa okhwama khusibala singa eliime. Amang'ana kanje keetsa okhukwa singa ifula ekwitsanga khumimela emitoro, singa ifula esamanga obunyasi.

³Nanzitsoomie eliira lio MWAMI, ne abandube nabaribule obukhongo bubwe.

⁴“OMWAMI nomusooli wenywe omukufu, omulunji khandi omukol'lokhu munjilatsie tsiosi; Nyasaye wenywe nomusubilwa khandi nowatooto; akholanga kali amalahi khandi akahabwene.

⁵Nebutswa inywe simuli abasubilwa, abakwana okhuba abandube tawe, muli olwibulo lwetsimbi khandi olwobukaati.

⁶Nimbwo mwakhakhol'la OMWAMI, inywe abandu abahingwa, ababula obwongu? Ye siali niye Papa wenywe, owamulonga, ma namukhola okhuba lihanga?

⁷“Kanil'lekhwo khumatukhu akabira, khale muno; mureebe abapapa benywe bamubool'le akali okhwekhalekha, mureebe abasakhulu bamubool'le akekhola khale.

⁸Nyasaye Oweikulu Okhusila yahelesia amahanga liloba; yaloosia ahetsimbia tsikhoya okhumenya. Yahelesia sielihanga omunyasaye walio,

⁹nebutswa yeela olwibulo lwa Yakobo okhuba olulwe omwene.

¹⁰“Yabanyoola nibaboyaboyanga musitsiimi, esitsiimi esiralimwo abandu khandi esiahilwa nomuyeka. Yabasoola ma nabalinda bulahi singa yakhelinde omwene.

¹¹Singa inditsu yibaal'langa ebiminywi biayo okhupulukha, nebitil'la mumbaha tsiayo bulahi, nimbwo OMWAMI yalinda Isiraeli mbu erakwa tawe.

¹²OMWAMI yenyene yemel'la abandu baabe, narakhonywakhwo nomunyasaye mucheni tawe.

¹³“Yabaha obunyali okhwamiha mumaloba akechinga, ma nibalia ebiamela mumikunda. Banyoola obuukhi bwomumutsuru mutsinyanda, ne emiseituni tsiabwe tsianera mumaloba kamachina.

¹⁴Tsing'ombe tsiabwe nende tsimbusi tsiabwe tsiarulamwo amabeele amenji; bali namakondi amalahi, tsimbusi tsindahi nende tsing'ombe tsindahi, halala neingano indahi nende ewaini indahi okhusila.

¹⁵“Abandu bo MWAMI bahindihala okhusila nebutswa bali abamakosi amomu; banera ne nibetsusibwa nebiakhulia. Bamukhupa omukongo Nyasaye wabwe owabalomba, ma nibasuula omusooli wabwe omukufu.

¹⁶Obwekayakayi bwabwe bwemisambwa bwahelesia Nyasaye inda ndulu, obubi obwa bwachila naba nelirima.

¹⁷Bahaana emisango khubanyasaye abarali abatooto, abanyasaye abacheni ababakuka babwe baramanya, abanyasaye aba Isiraeli eralondakhwo.

¹⁸Bebil'la Nyasaye wabwe, omusoli wabwe omukufu, uyo owabahelesia obulamu.

¹⁹“Olwo MWAMI yalola yaka, yasinyikha, ma nasuula abasianibe nende abakhaanabe.

²⁰Yaboola mbu, ‘Khandi sinambakhonyekhwo tawe,’ ma nandole esia nasiekhole khubo, abandu bemioyo emiomu khandi abarali abasubilwa.

²¹Bachemele lirima lianje khulwe emisambwa chiabwe, bambeye inda ndulu khulwe yabo ababakulikhanga abanyasaye abarali abanyasaye basiahene. Kho narumikhile lihanga okhubahambia lirima; nambahe inda ndulu khulwo khurumikhila lihanga liabahingwa.

²²Lirima lianje naliatukhe singa omul'lo, ma nalisambe ebindu biosi khusibala. Naliole musibala sie Makombe, ma nalisambe omusinji kwebikulu.

²³“ ‘Ndakhaleere khubo amakhupako akarali nesihesi nimbalase netsisele tsianje tsiosi.

²⁴Bakhafwe khulwe inzala nende emirengo; bakhafwe khulwo bulwaye obubi. Ndakharume etsisolo tsiomubulimo okhubenjil'la nende tsinzokha tsiobusungu okhubaluma.

²⁵Obulwani bwakhaleere okhufwa mumihanda; Tsingo tsiakhetsule ebirisio. Abasiani nabakhaana bakhafwe; kata abaana abatoro nohomba abasakhulu sibakhalekhwe tawe.

²⁶Ndakhabeye nibamumile bosi, kho mbu omundu wosi arakhabetsul'lakhwo tawe.

²⁷Nebutswa sindakhalekhele abasuku babwe bepaake mbu nibo abali okhuleka abandu banje, ne nindi nise owali nimbamal'le tawe.’

²⁸“Isiraeli nelihanga elibula obuchesi; sibamanyilisianga kata tawe.

²⁹Sibanyala okhulola esiachila nibalekwa tawe; sibanyala okhumanyilisia mbu nisina esiali okhwekhola tawe.

³⁰Nisina esiachila abandu elefu ndala nibalekwa nomundu mulala ne abandu etsielefu likhumi nabandu babili bonyene? Kali khulwa mbu, OMWAMI Nyasaye wabwe yali nabakhupile omukongo; Nyasaye wabwe omukufu yali nabalekhele.

³¹Abasuku babwe bamanya mbu abanyasaye babwe nabatofu, sibali abakufu singa Nyasaye wa Isiraeli tawe.

³²Abasuku babwe sibali abasubili khu MWAMI singa Sodoma nende Komora, bali singa emisabibu etsiamanga tsinzabibu emilulu khandi echiobusungu,

³³bali singa ewaini eyalombwa okhurula khubusungu bwetsinzokha.

³⁴“OMWAMI yetsul'langa aka abasuku babwe bakhol'le; alindil'langa inyinga indahi okhubaha esinyasio.

³⁵OMWAMI nabarunjie es'sialia ma nabahe esinyasio; inyinga nayoole olwa nabakwe; litukhu liokhutiba khwabwe lili ahembi.

³⁶OMWAMI yakhamulule abandu baabe, olwa yakhalole mbu tsingufu tsiabwe tsihweye. Yakhabeele tsimbabasi yabo abamurumikhilanga, olwa yakhalole abutiimi bwabwe.

³⁷Ma OMWAMI yakhareebe abandu baabe mbu, ‘Abanyasaye abamwasubilamwo abakufu bali hena?’

³⁸Mwabalisia nemisango chienywe emikhomefu, nimubaha ewaini okhunywa. Lekha butswe okhumuhabina luno; lekha betse okhumununula bwangu.

³⁹“ ‘Ise, khandi ise sienyene nise Nyasaye; abulaho nyasaye undi wosi narali ise sienyene. Nziranga khandi mbananga obulamu, nzarakanga olukuma khandi mbonia, ne omundu wosi sanyala okhwikal'la aka kholanga tawe.

⁴⁰Singa obwe ise ndi Nyasaye oli mwoyo siahene, njinganga omukhono kwanje nindesuha mbu,

⁴¹nanzochiyie olukanga lwanje olwakhakhu, ndole mbu akahabwene kakhol'lwe. Narunjie es'sialia khubasuku banje, nimbaana esinyasio khu yabo abambihil'lwanga.

⁴²Tsisele tsianje natsironye amatsahi kabwe, ne olukanga lwanje lwakhere bosi abafukulanga emilimo chianje. Sinandekhelekhwo wosi ounwananga tawe; kata abamafumire nende ababohe bakhafwe.’

⁴³“Mwitsoomie abandu ba Nyasaye, inywe amahanga kosi, okhuba ahaananga esinyasio khubosi ababeeranga. Arunjianga es'sialia khubasuku baabe khandi abeelanga tsimbi tsiabandu baabe.”

⁴⁴Musa nende Yoshwa omusiani wa Nani bakalukhila mulwembo yilu kho abandu ba Isiraeli baluhulile.

⁴⁵Olwa Musa yali namal'le okhuhaana amebaalo ka Nyasaye khubandu,

⁴⁶yaboola mbu, “Mulole mbu mulondanga amalako kosi aka muhelesisie olwaleelo. Mubool'le abaana benywe nimukalukhilamwo, kho nabo balonde amebaalo ka Nyasaye kosi mubusubilwa.

⁴⁷Amebaalo yaka sikali butswa amang'ana amakhaya tawe; ko nobulamu bwenywe bwene. Mukalonde ne nenywe namumenye amatukhu amenji musibala esili injelekha wa Yorodani esia muli ahembi okhwinjilamwo.”

⁴⁸Litukhu liteelwa yilio OMWAMI yabool'la Musa mbu,

⁴⁹“Tsia khusikulu sia Abarimu musibala sia Moabu esihengana nende litookho lia Yeriko; oniine khusikulu sia Nebo ma ohenge khusibala sia Kanaani esia ndi ahembi okhuhelesia abandu ba Isiraeli.

⁵⁰Nofwile khusikulu yisio singa amwabowo Haruni yafwila khusikulu sia Hori,

⁵¹sichila inywe mwesi simwali abasubilwa khu ise imbeli wabandu ba Isiraeli tawe. Olwa mwali hamaatsi ka Meriba ahembi Kadeshi musitsiimi sia Sini, ibe wali okhunzaaya imbeli wabandu.

⁵²Nolole esibala sia Kanaani okhurula ehale, nebutswa sinawinjile musibala esia nambelesie abandu ba Isiraeli tawe.”