Read lunyore OKHUKALUKHILA MUMALAKO 33 Bible Online

OKHUKALUKHILA MUMALAKO 33 - lunyore bible

OKHUKALUKHILA MUMALAKO 33

¹Kano niko aketsikhabi tsia Musa, omundu wa Nyasaye yasabila abandu ba Isiraeli nasili khufwa.

²OMWAMI yarula musikulu sia Sinai; yarula singa eliuba niyaakha khu Edomu, ma niyaakha khubandu baabe okhurula khusikulu sia Parani. Abamalaika etsielefu likhumi bali n'naye, omul'lo okwatukhanga kwali khumukhonokwe musaatsa.

³OMWAMI wayanza abandu baabe, ma abalindanga yabo abali abaabe. Kho khumusikamilanga habilenje bibie ma khulonda amalako kaake.

⁴Khulondanga amalako ka Musa yakhuhelesia, akali obuhinda obukali bwelihanga liefwe liabiikha.

⁵OMWAMI yali omuruchi wabandu baabe ba Isiraeli, olwetsinzibulo tsiabwe nende abemeli bali nibebunjikhile halala.

⁶Musa yaboola kano khulwibulo lwa Rubeni: “Olwibulo lwa Rubeni lurakhakora tawe, kata nikali abandu babwe nibatu.”

⁷Khubolwibulo lwa Yuda yaboola mbu, “OMWAMI! Hulila amalakayo kolwibulo lwa Yuda akareebanga obukhonyi; obahambanie halala netsinzibulo tsindi. OMWAMI, obalwan'ne khandi obakhonye okhulwana abasuku babwe.”

⁸Khubolwibulo lwa Lawi yaboola: “Ibe, OMWAMI, oribule akelichoomo liabwe norumikhilanga Urimu nende Tsumimu,[2] nobir'ranga mubarumwa baabo abasubilwa abolwibulo lwa Lawi. Wali okhubara mukhutemwa nibali Masa, ma nobanyoola okhuba abatooto nibali hamaatsi ka Meriba.

⁹Bamanyia okhuba abahulili khuibe, okhuyomba abebuli babwe, abasiani babwe, nohomba abaana babwe. Bali okhulonda amalako kaako, khandi bali abasubilwa khu Indakano yiyo.

¹⁰Bakhebaal'le abandu ba isiraeli okhulonda Amalako kaako. Bakhahaane emisango khulusambwa lulwo.

¹¹OMWAMI, okhonye olwibulo lwabwe okhumeetekha tsingufu, oyanzisibwe nende akabakholanga, okhuye abasuku babwe; ne oralekha bahul'likhekhwo khandi tawe.”

¹²Khubolwibulo lwa Benjameni yaboola; “Luno nilwo olwibulolwo MWAMI yayanza khandi alindanga; Abalindanga om'basu kwosi, khandi wamenya halala n'nabo.”

¹³Khubolwibulo lwa Yosefu yaboola mbu, “OMWAMI alaamile emikunda chiabwe ikhabi, ifula ekwemwo, khandi banyoole amaatsi okhurula mumaloba hasi.

¹⁴Liloba libe netsikhabi tsiokhwaama ebiokhulia ebinji mumuhika. Liloba litsulemwo amatunde amalahi buli muhika.

¹⁵Ebikulu biabwe biakhale bibemwo na matunde ketsimbila tsiosi.

¹⁶Liloba liabwe litsusibwemwo nebiamo ebilahi. Banyoole tsikhabi tsindahi tsio MWAMI, owali okhul'loma okhurula musitsakha esiatukhanga omul'lo. Tsikhabi yitsi tsiosi tsiyeele khulwibulo lwa Yosefu, sichila yali omwemeli mubaana babwe.

¹⁷Yosefu ali netsingufu singa etsiechulukhi, ali netsinzika singa etsieimboko. Tsinzika tsitsie netsinzika etsielefu tsia Manase. Khandi netsinzika etsielefu likhumi tsia Efuraimu. Arumikhilanga tsinzika yitsio okhufumira abetsinzibulo. Ma abasukumanga okhwola khusihesi siesibala.”

¹⁸Khukabetsinzibulo tsia Sabuloni nende Isakari yaboola: “Makano aba Sabuloni bakhola obukhala bulahi khu Nyanza. Ne makano aba Isakari banyoola obuhinda obwinji hango.

¹⁹Balange abandu bebibala biebucheni mubikulu biabwe, ma bahaane emisango chiatooto habwene yaho. Banyoole obuhinda bwabwe okhurula munyanza nende mumuyekhe okuli khundulo we inyanza.”

²⁰Khubolwibulo lwa Gadi yaboola: “Mufumie Nyasaye owalomba esibala sienywe esikali. Gadi alindil'langa singa esimba, okhurandula omukhono nohomba likhoba liokhusihanga.

²¹Bebukul'la liloba lilahi okhusila; Esitonye sieliloba liomwemeli bali okhuhebwa. Bali okhulonda amechesio nende Amalako ko MWAMI Olwa abemeli ba Baisiraeli bali nibebunjikhile halala.”

²²Khubolwibulo lwa Dani yaboola: “Dani nesimba esili imbukha. Arumanga okhurula Bashani.”

²³Khubolwibulo lwa Nafutali yaboola: “Abandu ba Nafutali balaamilwa tsikhabi tsinyinji khulwe tsimbabasi tsio MWAMI. Esibala siabwe siolanga enandete we inyanza ya Galilaya.”

²⁴Khubolwibulo lwa Asha yaboola, “Asha walaamilwa tsikhabi okhuyomba abetsinzibulo tsindi tsiosi. Makano wayanzwakhwo nabasiani babwe, ma emikunda chichie chiame emiseituni eminji.

²⁵Amataala kaake kasirwe nende ebilibwa biebichuma, ma amenye nomulembe.”

²⁶Abandu ba Isiraeli, abulaho nyasaye ofwana Nyasaye wenywe, achendanga mubunyali nakhalania mwikulu, achendanga mumalumbesi khulwo khwitsa okhumukhonya.

²⁷Nyasaye wamenya nakhusinganga mumang'ana amenji, amakhono kaake keinziayo niko akakhuletel'langa. Yakhunga abasuku benywe olwa mwamulondanga, ma namubool'la mubeere bosi.

²⁸Kho abolwibulo lwa Yakobo bamenye nomulembe babe abaralilu mumikunda etsietsulamwo obuswache nende ewaini, Ahe liime okhurula mwikulu lisamanga emikunda.

²⁹Inywe Abaisiraeli mako obwa muli nobusangali! Abulaho omundu ofwana n'nenywe, olwibulo lwali okhuhonokosibwa no MWAMI, OMWAMI mwene niye esikhumba sienywe khandi olukanga lwenywe, khulwo khumusinga nende okhumuha obulechi. Abasuku benywe bakhetse okhumureeba tsimbabasi, nebutswa mwakhabasen'ne hasi.