Read lunyore OKHUKALUKHILA MUMALAKO 34 Bible Online

OKHUKALUKHILA MUMALAKO 34 - lunyore bible

OKHUKALUKHILA MUMALAKO 34

¹Musa yarula mwibanda lia Moabu natsia khusikulu sia Nebo, khubutenje bwesikulu sia Pisiga ebukwe wa Yeriko, ne ebwene iyo OMWAMI yamumanyia esibala sia Kanaani siosi; olusoma lwa Gileadi okhutsia esinyolu khwitaala lia Dani;

²olusoma lwosi lwa Nafutali; tsisoma tsia Efuraimu nende Manase; olusoma lwa Yuda okhutsia emasaba okhwola khunyanza ya Mediterenia;

³olubeka lwe nandete wa Yuda; nende omwalo okutsitsanga okhurula Soari okhwola Yeriko, litookho liemisaala chiamasindu.

⁴Ma OMWAMI nabool'la Musa, “Yisi nisio esibala esia ndesuha khu Aburahamu, Isaka nende Yakobo mbu ndakhasihaane khutsinzibulo tsiabwe. Khuhuchiliye okhusilola nebutswa sinakhuhuchil'le okhwinjilamwo tawe.”

⁵Kho Musa omurumikhili wa Nyasaye yafwila ebwene yiyo musibala sia Moabu, singa OMWAMI yali namubooleye.

⁶OMWAMI yamuyabila mwibanda lia Moabu, elihengana nende Betsipeori, nebutswa okhwola naleelo abulaho omanyile ahesilindwa tsana sili.

⁷Musa yali owemihika emia ndala namakhumi kabili olwa yafwa. Yali nasili netsingufu khandi yali nasilola bulahi.

⁸Abandu ba Isiraeli bamwekhuula amatukhu amakhumi kataru mwibanda lia Moabu.

⁹Yoshwa omusiani wa Nuni yetsusibwa nobuchesi, sichila Musa yali niyamwahula okhubukula obukonobwe singa omwemeli. Abandu ba Isiraeli bahulila Yoshwa ma nibalonda amalako ako MWAMI yali niyabaha okhubir'ra khu Musa.

¹⁰Khusili okhubakhwo nomuroobi mu Isiraeli singa Musa; OMWAMI yal'loma n'naye moni namoni.

¹¹Omuroobi undi wosi asili okhukholakhwo akamangalimwa nende akokhuchenyia singa ako MWAMI yaruma Musa okhukhol'la omuruchi we Misiri, nabemeli baabe nende esibala siosi.

¹²Omuroobi undi wosi asili okhukholakhwo amang'ana amasiro khandi akokhurisia singa aka Musa yakhola imbeli wa Isiraeli yosi.