Read lunyore OKHUKALUKHILA MUMALAKO 4 Bible Online

OKHUKALUKHILA MUMALAKO 4 - lunyore bible

OKHUKALUKHILA MUMALAKO 4

¹Ma Musa nabool'la abandu mbu, “Mulonde amalako kosi akamwibaal'langa, nenywe mulamenya nimubukula esibala esio MWAMI Nyasaye wabakuka benywe amuhelesianga.

²Murameetakhwo esindu siosi khumalako akamuhelesianga, kata murahiniakhwo esindu siosi tawe. Mulonde amalako ko MWAMI Nyasaye wenywe aka mal'le okhumuha.

³Inywe abene mwali okhulola ako MWAMI yakhola khusikulu sia Peori. Yamuma abandu bosi abekayakayilangaho Baali,

⁴nebutswa khu inywe abalinji abasubilwa khu MWAMI Nyasaye wenywe musili mwoyo okhwola olwaleelo.

⁵“Ndabeye okhumwibaal'la amalako kosi, singa OMWAMI Nyasaye wanje yali okhumbool'la khole. Mukalonde musibala esia namwinjilemwo nimusibukula.

⁶Mukalonde mubusubilwa, ne yaka nakamanyie abandu betsinzibulo tsindi obwa muli abachesi. Olwa nabahul'lenje amalako yaka kosi nababoole mbu, ‘Lihanga likhongo lia Isiraeli lili nobuchesi nende okhumanyilisia okhukali!’

⁷“Libulaho lihanga lindi, kata libe likali elifwana mbwena, elili nanyasaye oli ahembi khulio olwa barunanga abakhonye singa obwa OMWAMI Nyasaye wefwe ali ahembi n'nefwe. Akhukalusianga lwosi olwa khumureebanga obukhonyi.

⁸Khandi libulaho lihanga lindi kata libe likhongo okhuhela mbwena elili namalako amalunji singa yako aka ndaali okhumwibaal'la olwaleelo.

⁹Mwelinde! Mukhole esinani okhulola mbu murebil'lakhwo ebindu ebia muluutsi netsimoni tsienywe luhono lwamusili mwoyo tawe. Mubool'le abaana benywe nende abetsukhulu benywe

¹⁰litukhu elia mwasinjila imbeli wo MWAMI Nyasaye wenywe hasikulu sia Sinai, olwa Nyasaye yali okhumbool'la mbu, ‘Bunjikha abandu halala. Nyenyanga bahul'le aka nzia okhuboola, kho balonde amalako kanje oluhono lwabasimenyele ma kho nabo nabebaal'le abaana babwe okhukhola mbwo.’

¹¹“Mubool'le abaana benywe obwa mwatsia nimusinjila hasikulu esiali okhufuunikhwa nelilumbesi lisiro nende omwosi omumwamu ti nende omul'lo okwatukhanga nikuhengele mwikulu.

¹²Mubabool'le obwo MWAMI yal'loma n'nenywe okhubir'ra mumul'lo, obwa mwahul'la nal'lomanga nebutswa nimuramulola mubukondo bwosi bwosi tawe.

¹³Yamubool'la aka mukhoya okhukhola okhulinda Indakano eyayalomba n'nenywe — okhwola mulonde Amalako Likhumi, aka yali okhuhandika khurupao rwamachina rubili.

¹⁴OMWAMI yambool'la mwibaal'le amalako kosi aka mukwana okhulonda musibala esia muli ahembi okhulwana nende okhusibukula.

¹⁵“Olwo MWAMI yal'loma n'nenywe okhurula mumul'lo hakari, hasikulu sia Sinai, simwalolakhwo likondo liosi tawe. Khulwobulahi bwenywe abene, mulole

¹⁶mbu murakholakhwo tsimbi khulwo khwelombela esiniini mubukondo bwosi tawe; kata sibe esifwanani siomusaatsa nohomba omukhasi,

¹⁷omuruko nohomba linyonyi,

¹⁸kata esimolanga, kata isutse tawe.

¹⁹Muratema okhwekayakaya nende okhurumikhila ebia mulolanga mwikulu, mbu eliuba, omwesi, netsinyininyini tawe. OMWAMI Nyasaye wenywe wahaana yibi khubandu bandi bosi okhubiekayakaya.

²⁰Nebutswa inywe muli abandu aba yanunula okhurula Emisiri, mumanda akakhanga okhusila. Yamuhinia Emisiri okhumukhola abandu baabe bene, singa obwa muli olwaleelo.

²¹Ninywe abachila, OMWAMI Nyasaye wenywe niyasinyikhila ma niyandaka esilaamo siobubi mbu sindakhakhalaniekhwo omuchela kwa Yorodani okhwinjila musibala siobuhinda esia amuhelesianga tawe.

²²Ise nafwile musibala sino ne sinakhalanie omuchela kwa Yorodani tawe. Nebutswa inywe muli ahembi okhukhalania ma mumenye musibala siobuhinda yisi.

²³Mukhole akamunyala okhulola mbu murakhebil'lakhwo Indakano eyo MWAMI Nyasaye wenywe yalomba n'nenywe tawe. Mulonde lilako lilie eliboolanga mbu murakhelombelakhwo esiniini tawe,

²⁴sichila OMWAMI Nyasaye wenywe nomul'lo okumululanga; ye noweimbalikha khubanyasaye bandi.

²⁵“Kata olwa namube musibala tsana oluhono olurambi, ma munyoole abaana nende abetsukhulu, murakholakhwo tsimbi khulwo khwelombela ebiniini mubukondo bwosi tawe. Yili nelibi mutsimonitsio MWAMI ne linyala okhumuchema lirima.

²⁶Nanganga likulu nende esibala biitse okhuba abakobokheli khwinywe olwaleelo mbu, nimuba nimuranonda, mularula musibala yisio bwangu. Simulamenya oluhono olurambi musibala esili injelekha wa Yorodani tawe. Mulamumwa mwesi pe.

²⁷OMWAMI alamusalaania mumahanga kandi, ne batititi khwinywe nabahonokokhe.

²⁸Ebwene iyo, namwekayakaye abanyasaye abalombwa namakhono kabandu, abanyasaye abalombwa khumisaala, nende khumachina, abaranyala okhulola kata okhuhul'la, nohomba kata okhulia nohomba okhuhunya tawe.

²⁹Ebwene iyo mwakharune OMWAMI Nyasaye wenywe, ne nimwakhamukhaaba nomwoyo kwosi, mwakhamunyoole.

³⁰Olwa mwakhaba mumanyakhano ma ebindu yibio nibimukwila, nilwo olwa namuhunzukhe khu MWAMI nimumulonda.

³¹Ye ni Nyasaye wetsimbabasi. Salamukhupa omukongo kata okhumumuma tawe, khandi salebil'la indakano eya ye omwene yalomba nabakuka benywe tawe.

³²“Mukhabilisie amatukhu ka khale, olwamwali nimusili okhwibulwa, khale muno olwa Nyasaye yalomba omundu namura khusibala. Murunilisie esibala siosi. Mbula ling'ana liosi likhongo singa yili liayekholakhwo noho? Omundu wosi wahul'lakhwo esindu siosi singa yisi noho?

³³Balikhwoho abandu bosi abatsilil'la okhuba mwoyo inyuma wokhuhul'la nyasaye nal'lomelanga mumul'lo singa inywe noho?

³⁴Alikhwoho nyasaye undi owatsia okhuhiinia abandu okhurula mwihanga lindi akhabakhola abaabe bene, singa OMWAMI Nyasaye wenywe yamuhinia Emisiri noho? Mutsimoni tsienywe abene yarumikhila obunyali obukali nende tsingufu tsinyinji; yaleera amakhupako nende obulwani; yakhola akamangalimwa nende akokhuchenyia, ma nakhola ebindu biokhurisia.

³⁵OMWAMI yamukhol'la yaka, okhumumanyia mbu ye yenyene niye Nyasaye khandi mbu abulaho nyasaye undi singa ye tawe.

³⁶Yamuhuchil'la okhuhul'la omwoyokwe okhurula mwikulu kho amwibaal'le; khandi khusibala khuno, yamuhuchil'la okhulola omul'lo omutsienukhu ma nal'loma n'nenywe okhubir'ra mumul'lo tsana.

³⁷Sichila yali okhuyanza abakuka benywe, yamwahula inywe, ne khulwo obunyali bubwe obukali ye omwene yamuhinia Emisiri.

³⁸Olwa mwali nimwesundanga imbeli, yahinianga musibala tsana amahanga akali nobunyali obukhongo okhubira inywe, kho amwinjisiemwo ma amuhelesie esibala siabwe, esibala esisili esienywe okhwola leelo.

³⁹Kho mwitsul'le olwaleelo ne murebil'lakhwo tawe; mbu OMWAMI niye Nyasaye welikulu khandi owesibala. Abulaho nyasaye undi tawe.

⁴⁰Mulonde amalako kaake kosi aka muheye olwaleelo, ne kosi kalaba amalahi khwinywe khandi kata khubolwibulo lwenywe. Namutsilil'le okhumenya musibala esio MWAMI Nyasaye wenywe amuhelesianga okhuba esienywe inziayo.”

⁴¹Ma Musa niyahula amatookho kataru ebukwe womuchela kwa Yorodani

⁴²aha omundu yakhelukhila ma abe mumulembe naba niyetsukhan'na niyeera owasie orali omusuku khulwa amarabba. Anyala okhwilukhila khu elala khumatookho yaka khe alekhe khwirwa.

⁴³Khubolwibulo lwa Rubeni lialiho litookho lia Beseri, musitsiimi esihelanu; khubolwibulo lwa Gadi lialiho litookho lia Ramotsi mulusoma lwa Gileadi; ne khubolwibulo lwa Manase lialiho litookho lia Kolani, mulusoma lwa Bashani.

⁴⁴Musa yahaana amalako nende amebaalo ka Nyasaye khubandu ba Isiraeli.

⁴⁵Musa yabahelesia amalako yaka olwa bali nibamal'le okhurula Emisiri,

⁴⁶ne nibali mwibanda elili ebukwe womuchela kwa Yorodani, habundu ahahengana nende Betsipeori. Habundu tsana hali mulusoma olwalinji mumukhono kwa Sihoni omuruchi wa Baamori owali niyamihanga mwitookho lia Heshiboni. Musa nende abandu ba Isiraeli bamuleka olwa barula Emisiri.

⁴⁷Babukula esibala sisie nibamenyamwo halala nende esibala sia Ogu omuruchi wa Bashani, owali omuruchi undi wabandu ba Amori owamenyanga ebukwe womuchela kwa Yorodani.

⁴⁸Esibala yisi siarulanga khwitaala lia Aroeri, khundulo khwomuchela kwa Arinoni, okhutsia esinyolu okhwola khusikulu sia Sirioni, esili, esikulu sia Herimoni.

⁴⁹Khandi sialimwo nende olusoma lwebukwe lwomuchela kwa Yorodani okhutsia okhwola enandete khu Inyanza ye Chumbi nende ebukwe we Sikulu sia Pisiga.