Read lunyore OKHUKALUKHILA MUMALAKO 5 Bible Online

OKHUKALUKHILA MUMALAKO 5 - lunyore bible

OKHUKALUKHILA MUMALAKO 5

¹Musa yalanga Abaisiraeli bosi halala ma nababool'la mbu, “Abandu ba Isiraeli, muhuyie khumalako kosi akamuhelesianga litukhu lino. Mukeeke ma mulole mbu mukakhol'le.

²Khusikulu sia Sinai OMWAMI Nyasaye wefwe yali okhulomba indakano,

³ne siyachilomba nabakuka befwe bonyene tawe, nebutswa nende ifwe fwesi abasili mwoyo olwaleelo.

⁴Khusikulu khwene yikhwo OMWAMI yal'loma khu inywe moni namoni nali mumul'lo.

⁵Ise ndasinjila hakari wenywe nende OMWAMI munyinga yiyo khulwokhumubool'la ako MWAMI yaboola sichila inywe mwali okhuria omulilo kho simwali abanyala okhwanichila khusikulu tawe. “OMWAMI naboola mbu,

⁶‘Ise nise OMWAMI Nyasaye wenywe owamuhinia Emisiri aha mwalinji obasumba.

⁷“ ‘Murekayakaya nyasaye undi nirali nise tawe.

⁸“ ‘Murelombelakhwo ebiniini biesindu siosi sio Mwikulu nohomba esiokhusibala nohomba esiomumaatsi akali hasi heliloba tawe.

⁹Murakhasikamilakhwo esiniini siosi nohomba okhusiekayakaya tawe; sichila ise, ndi OMWAMI Nyasaye wenywe ne simbuchil'langa okhuchelanibwa tawe. Nderanga esinyasio khu uyo oumbihil'lwanga nende khubolwibulo lulwe okhwola khutsinzibulo tsitaru nende tsine.

¹⁰Nebutswa manyianga tsimbabasi khutsinzibulo etsielefu khu yabo bosi abanyanzanga khandi abalondanga amalako kanje.

¹¹“ ‘Murarumikhila eliira lianje mumang'ana amabi tawe, sichila ise OMWAMI Nyasaye wenywe, ndakhahaane esinyasio khumundu wosi orumikhilanga eliira lianje munjila imbibibi.

¹²“ ‘Mwitsul'le litukhu liesabato, mulikhole litsienukhu singa Ise, OMWAMI Nyasaye wenywe ndamulaka okhukhola.

¹³Muli namatukhu kasasaba akokhukhol'lamwo emilimo chienywe;

¹⁴nebutswa litukhu liakhane nakhataru ne litukhu liokhuhuluukha, eliahanwa khu ise. Mwitukhu yilio omundu arakhola emilimo tawe; kata inywe, abaana benywe abasumba benywe, emiruko chienywe nohomba omucheni owamenyibwa musibala sienywe tawe. Abasumba benywe bahuluukhe butswa singa muhuluukhanga.

¹⁵Mwitsul'le mwali abasumba musibala sie Misiri ne ise, OMWAMI Nyasaye wenywe ndamusoola nobunyali bwanje obukali halala netsingufu tsianje. Niko akachilanga nimulaka okhwola muhuluukhe litukhu lie Sabato.

¹⁶“ ‘Muhane oluyali khu Papa wenywe nende mama wenywe, singa obwe Ise OMWAMI Nyasaye mulakanga khukhola, kho amang'ana kosi kabe amalahi khwinywe khandi kho mube abanyala okhumenya amatukhu amenji musibala sianzitsanga okhumuhelesia.

¹⁷“ ‘Mureera tawe.

¹⁸“ ‘Muraheya tawe.

¹⁹“ ‘Mureba tawe.

²⁰“ ‘Murachiikha abasienywe tawe.

²¹“ ‘Orakhayilwa omukhasi wowasio tawe; orakhayilwa inyumba yowasio, kata omukunda kukwe, kata omusumbawe, kata ing'ombeye, epundaye nohomba esindu siosi esiayaruka tawe.’

²²“Kano niko amalako ko MWAMI yali okhumuhelesia mwesi olwa mwali nimwebunjikhile hasikulu. Olwa yal'loma nomwoyo kwobunyali okhurula mumul'lo nende okhurula mwilumbesi lisiro, yahaana amalako kano ne akandi kosi sikalikhwoho tawe ma nakahandika khurupao rwamachina rubili ma niyambelesia.

²³“Olwe esikulu siosi siali nisiyitsanga, mwahul'la omwoyo nikul'lomanga okhurula musiilima, abemeli benywe nende abaami betsinzibulo tsienywe beetsa khu ise

²⁴ma nibaboola mbu, ‘OMWAMI Nyasaye wefwe akhumanyisie obukhongo bubwe nende oluyali lulwe olukali olwa khuhuliye nal'lomanga okhurula mumul'lo! Olwaleelo khuluutsi mbu kanyalikha khulwomundu okhutsilil'la okhumenya, kata nikali mbu Nyasaye ul'lomele n'naye.

²⁵Nebutswa khandi busina khwere mumanyakhano kokhufwa? Omul'lo omukali kula kunyala okhukhumuma ifwe. Khuli nobusubili mbu khunyala okhufwa nikali khwakhahul'la OMWAMI Nyasaye wefwe nal'lomanga khu ifwe khandi.

²⁶Alikhwoho omundu wosi owatsilil'la okhuba mwoyo namal'le okhuhul'la Nyasaye oli mwoyo nal'lomanga okhurula mumul'lo?

²⁷Kalukhayo, Musa ma ohuyie amang'ana kosi ako MWAMI Nyasaye wefwe aboolanga. Ma okalukhe okhukhubool'le ifwe ako MWAMI aba nakhubooleye.’

²⁸“Olwo MWAMI yahul'la yaka, yamala niyambool'la ise mbu, ‘Mal'le okhuhul'la akabandu yaba babooye, ne bali habwene.

²⁹Bwakhaba bulahi nibakhatsilil'la okhuba neinganakani efwana yiyi! Nikakhaba bakhambelesia ise oluyali nende okhulonda amalako kanje kosi, kho ebindu biosi bibe ebinyala khuba ebilahi n'nabo nende abolwibulo lwabwe khulwe inziayo.

³⁰Tsia obabool'le bakalukhe mumaheema kabwe.

³¹Nebutswa ibe Musa, obe hano n'nase ne nzia okhukhuha amalako kosi nende amebaalo. Wekesie abandu amalako, kho babe abanyala okhukalonda musibala sia nzia okhubahelesia.’

³²“Abandu ba Isiraeli, mulole mbu mukhol'le buli sindu siosi esio MWAMI Nyasaye wenywe yamulaka khukhola. Murakhasuulakhwo lilako liosi khumalako ko MWAMI tawe.

³³Mulonde amalako kosi kho amang'ana kosi kabe amalahi khwinywe kho mube abanyala okhumenya musibala esia namube nimubukuye.