Read lunyore OKHUKALUKHILA MUMALAKO 6 Bible Online

OKHUKALUKHILA MUMALAKO 6 - lunyore bible

OKHUKALUKHILA MUMALAKO 6

¹“Yaka kosi namalako ako MWAMI Nyasaye wenywe yali okhundaka mbu mwibaal'le inywe. Mukalonde nimuli musibala esia muli ahembi okhwinjilamwo nende okhusibukula.

²Oluhono lwosi olwa musili mwoyo, inywe halala nende abolwibulo lwenywe mukhoya okhuhaana oluyali khu MWAMI Nyasaye wenywe nimulonda amalako kaake kosi aka amuhelesianga kho mube abanyala okhumenya musibala amatukhu amenji.

³Mukahulile ma mukalonde! Ma kosi kalaba amalahi khwinywe ne mulaba lihanga likufu ma mumenye musibala esiobuhinda khandi esiebiamo ebinji, singa butswa OMWAMI, Nyasaye wabakuka befwe amal'le okhwesuha.

⁴“Isiraeli mwitsul'le yili! Mbu, OMWAMI Nyasaye wenywe niye Nyasaye yenyene.

⁵Oyanze OMWAMI Nyasaye uwo nomwoyo kukwo kwosi, namakani kaako kosi nende tsingufu tsitsio tsiosi.

⁶Orakhebil'lakhwo amalako kano aka muhetsanga luno tawe.

⁷Mukebaale khubaana benywe. Mukaribulenje nimukalukhilamwo olwamuli hango nende olwamuli ehale nehango, olwamuhuluukhanga nende olwamukholanga emilimo.

⁸Mukabohe khumakhono kenywe nimukahandia khubweni bwenywe singa esitsusio,

⁹Mukahandike khumatilwa kemiliango chie tsinyumba tsienywe nende khubilibwa bienywe.

¹⁰“Singa butswa OMWAMI Nyasaye wenywe yesuhila abakuka benywe, Aburahamu, Isaka nende Yakobo, alamuhelesia esibala esili namatookho amakali khandi akahindihala aka murayombokha tawe.

¹¹Tsinyumba tsienywe natsitsulemwo ebindu ebilahi ebia murareyemwo, ne namube nebitaho ebia murayaba, nende emikunda chiemisabibu nende echiemiseituni echia muraraaka tawe. Olwo OMWAMI namwinjisie musibala tsana ma olwa namube nende siesindu siosi esia mwakhenya okhulia,

¹²muteeme akanyalikha mbu murakhebil'lakhwo OMWAMI owamununula okhurula musibala sie Misiri, aha mwalinji abasumba tawe.

¹³Muhaana oluyali khu MWAMI Nyasaye wenywe, mumwekayakaye ye yenyene, ne mwesuhilenje muliira lilie lionyene.

¹⁴Murakhekayakayakhwo abanyasaye bandi, mulala khubanyasaye babandu abali ahembi n'nenywe tawe.

¹⁵Nimwakhekayakaya abanyasaye bandi lirima lio MWAMI lilachemukha khwinywe singa omul'lo ne lilamuma mwesi, sichila OMWAMI Nyasaye wenywe oli halala n'nenywe, ni Nyasaye weimbalikha khubanyasaye bandi.

¹⁶“Murateema OMWAMI Nyasaye wenywe singa obwa mwamuteema nimuli Masa tawe.

¹⁷Mulole mbu mulondanga amalako kosi aka amal'le okhumuhelesia.

¹⁸Mukhole ako MWAMI aboolanga nakahabwene khandi namalahi nenywe mulanyoola ol'lahi, ma mulabukula esibala siemiandu esio MWAMI yasubisia abakuka benywe,

¹⁹ma mulakhunga abasuku benywe singa yali okhwesuha.

²⁰“Mumatukhu aketsanga abaana benywe bakhamureebe mbu, ‘Nisina esiachila OMWAMI Nyasaye wefwe nakhulaka mbu khulonde amalako yaka kosi?’

²¹Kho mubabool'le mbu, ‘Khwalinji abasumba bomuruchi we Misiri, ne OMWAMI yakhununula nobunyalibwe obukhongo.

²²Khwamulola netsimoni tsiefwe abene nakholanga akamangalimwa nende ebindu biokhurisia khu Bamisiri nende khumuruchi wabwe halala nende khubemeli babwe.

²³Yakhuhinia Emisiri nakhukhola abalakhuule mbu akhuleere hano ma nakhuhelesia esibala sino singa yali niyesuhila abakuka befwe.

²⁴Nilwo olwo MWAMI Nyasaye wefwe yakhulaka okhulonda amalako yaka kosi nende okhumuria. Nikhukhola mbwo, alahenganga nalinda lihanga liefwe nalihindihasia khasotso.

²⁵Nikhwakhalonda mubusubilwa amang'ana kosi aka Nyasaye akhulachile, alayanzisibwa n'nefwe.’