Read lunyore OKHUKALUKHILA MUMALAKO 7 Bible Online

OKHUKALUKHILA MUMALAKO 7 - lunyore bible

OKHUKALUKHILA MUMALAKO 7

¹“OMWAMI Nyasaye wenywe yetsa okhumwinjisia musibala sia mwitsa khumenyamwo ne nakhunge tsinzibulo tsinyinji okhurula musibala yimwo. Olwa mwitsa okhuba nimwesundanga musibala yisio OMWAMI yetsa okhukhunga tsinzibulo tsine natsitaru etsili tsingali okhuyomba inywe khandi etsili netsingufu okhumuyomba: Abahiti, Abakirikashi, Abaamori, Abakanaani, Abaperisi, Abahiwi nende Abayebusi.

²Olwo MWAMI Nyasaye wenywe yetsa okhura abandu yaba mumakhono kenywe, ma mubaleke okhwola mubeere bosi pe. Murakhahambanakhwo n'nabo, nohomba okhubamanyia aketsimbabasi tawe.

³Murakhateesiakhwo abakhaana babwe tawe, khandi murakhahuchil'la abaana benywe okhuteesiakhwo mulala khubo tawe,

⁴sichila nimwakhakhola mbwo, betsa okhuhiinia abaana benywe khu MWAMI ma bekayakaye abanyasaye bandi. Yako nikakhekhola, OMWAMI yetsa okhuba nelirima khwinywe ma amumume matetekhana.

⁵Khulwe yako musambule tsisambwa tsiabwe, mwasaake amachina amatsienukhu ketsisiilo tsiabwe, muremake ebifwanani biosi ebialombwa okhumanyia nyasaye mukhasi Ashera ma musambe ebiniini biosi.

⁶Mukhole yaka sichila muli abandu bo MWAMI Nyasaye. Okhurula mubandu bosi abali khusibala, OMWAMI yali okhumwela inywe okhuba abandu baabe.

⁷“OMWAMI siyali okhumuyanza nende okhumwela sichila mwali abenji okhuyomba tsinzibulo tsindi tawe; inywe mwali butswa olwibulo lutiti musibala.

⁸Nebutswa OMWAMI yali okhumuyanza ma niyenya okhuhesia lisubisio eliayalomba nabakuka benywe. Niko akachila namuhonokosia nende obunyali bubwe obukhongo ma namukhola okhuba abalakhuule okhurula mubusumba bwomuruchi we Misiri.

⁹Mwitsul'le mbu OMWAMI Nyasaye wenywe niye Nyasaye yenyene khandi nomusubilwa. OMWAMI alahesia ake Indakano yiye, ma amanyie aketsimbabasi tsitsie tsiakhasotso khutsinzibulo elefu ndala khu yabo abamuyanzanga nende okhulonda amalako kaake,

¹⁰nebutswa salacheleba okhuhaana esinyasio khu yabo abamusukuhananga tawe.

¹¹Kho luno mulonde akamwechibwa; mulonde amalako kosi aka amal'le okhumuhelesia olwaleelo.

¹²“Nimwakhahulila amalako yaka kosi ma mukalonde mbusubilwa, kho OMWAMI Nyasaye wenywe alatsilil'la okhuhesia indakano yiye n'nenywe ma yeetsa okhutsilil'la okhumanyia obuyanzi bubwe bwakhasotso singa obwa yali okhusubisia abakuka benywe.

¹³Yeetsa okhumuyanza nende khumulaamila ikhabi kho mube abanyala okhumeetekha mubwibulani, ma mube nende abaana abenji, yeetsa okhulaamila emikunda chienywe ikhabi, kho mube abanyala okhunyoola obuswache, ewaini nende amafura komuseituni; yeetsa okhumulaamila ikhabi khulwokhunyoola tsing'ombe tsinyinji nende amakondi amenji. Yeetsa okhumuhelesia tsikhabi yitsi tsiosi nimuli musibala esiayasubisia abakuka benywe mbu alimuhelesia inywe.

¹⁴Babulakhwoho abandu bandi bosi musibala abakhahebwe tsikhabi tsinyinji singa yitsi. Abulakhwoho mulala khwinywe owakhabe omukumba kata tsing'ombe tsienywe sitsiakhabe etsisunu tawe.

¹⁵OMWAMI yakhamusinge okhurula khubulwaye bwosi khandi siyakhaleere obulwaye obubi obwamwali n'nabwo Emisiri tawe; nebutswa yakhaleere obulwaye yibu khubasuku benywe.

¹⁶Mwire abetsinzibulo bosi abo MWAMI nare mumakhono kenywe, ne murakhabamanyiakhwo tsimbabasi tsiosi tawe. Murakhekayakaya abanyasaye babwe tawe, sichila yilwo lwakhaba olufu olukali khwinywe.

¹⁷“Murakhaboolekhwo abene mbu abandu yaba nabenji okhumuyomba, kho simuli abanyala okhubakhunga okhurula musibala yisio tawe.

¹⁸Murakhabariakhwo tawe; mwitsul'le ako MWAMI Nyasaye wenywe yakhol'la omuruchi we Misiri halala nende abandu baabe.

¹⁹Mwitsul'le amakhupako amabi aka mwali okhulola netsimoni tsienywe abene, akamangalimwa nende akokhuchenyia, nende obunyali obukali halala netsingufu tsio MWAMI Nyasaye wenywe yarumikhila okhumukhola abalakhuule. Munjila yo MWAMI yamuhul'lamwo aba Misiri nimbwo yetsa okhukhola khubandu yaba abamurisisie.

²⁰Yeetsa okhubahelesia amakhupako nende okhwira yabo abakhelukha okhutsia khwebisa.

²¹Kho murabba noburi khubandu yaba tawe. OMWAMI Nyasaye wenywe ali n'nenywe halala, ni Nyasaye omukhongo okhoyele okhuriibwa.

²²Sihatu sihatu yeetsa okhukhunga abetsinzibulo yaba olwa mwitsa okhuba nimwesundanga imbeli. Sinamube abanyala okhubamuma bosi munyinga ndala tawe, sichila nimwakhakhola mbwo tsinyama tsiomubulimo tsitsa okhumeetekha ma tsibe linyakhano khwinywe.

²³OMWAMI yeetsa okhura abasuku benywe mumakhono kenywe, ma abakhole okhuba neindenga okhwola olwa bosi berwa.

²⁴Yeetsa okhura abaruchi babwe mumakhono kenywe. Namubeere ma nabebil'lwe. Abulaho owanomwikal'le; namwire buli mundu.

²⁵Musambe ebiniini biabwe. Murakhekomba etsahabu nohomba efetsa eyarebwa khubiniini yibio, khandi murakhachibukulakhwo tawe. Nimwakhabukula, yilio liakhalera linyakhano, sichila OMWAMI ali nelirima khu yabo abekayakayanga emisambwa.

²⁶Murakhaleerakhwo ebiniini yibio mutsinyumba tsienywe tawe, khase, esilaamo esitelwa yisio siakhaba khwinywe singa esili khubo. Okhwola musuule nende okhuchaya ebiniini, sichila biamala okhulaamwa nende OMWAMI.