Read lunyore OKHUKALUKHILA MUMALAKO 8 Bible Online

OKHUKALUKHILA MUMALAKO 8 - lunyore bible

OKHUKALUKHILA MUMALAKO 8

¹“Mulole mbu mulondanga mubusubilwa amalako kosi aka ndaali okhumuhelesia olwaleelo, ma kho mube mwoyo, mumetekhe mubwinji, ma mumenye musibala esio MWAMI yesuhila abakuka benywe.

²Mwitsul'le obwo MWAMI Nyasaye wenywe yamwemel'la khuluchendo olurambi yilu okhubir'ra musitsiimi khumihika etsiahweye amakhumi kane, namurumilanga amanyakhano khulwo khumuteema, okhumanya akali mumioyo chienywe khandi nikaba mbu mulondanga amalako kaake.

³Yamunyasia khulwo okhumulekha okhuba neinzala, ma namuha amana mbu mulie, ebiokhulia ebie inywe kata abakuka benywe mwali nimusili okhuliakhwo tawe. Yakhola yaka okhumumanyia mbu omundu salamenyanga khulwe biokhulia bionyene tawe, nebutswa khulwe ling'ana liosi elirulanga mumunwa kwo MWAMI.

⁴Khumihika amakhumi kane yitsio, tsingubo tsienywe sitsiarandukhakhwo tawe; kata ebilenje bienywe sibiasimbakhwo tawe.

⁵Mwitsul'le mbu OMWAMI Nyasaye wenywe amukol'losianga namuha esinyasio singa butswa obwa samwana abaana achetsiyianga abaanabe.

⁶Khulwe yako mukhole ako MWAMI amulachile okhukhola: mumenye nimulonda amalako kaake ma mumurie.

⁷OMWAMI Nyasaye wenywe amuleeranga musibala siobuhinda; esibala esilimwo emichela nende ebitaho nende emichela chiamaatsi akasenukhanga hasi nikatsia mumabanda, nomubikulu;

⁸esibala esiaamangamwo ingano, nende obuswache, nemisabibu, nende amakhuyu, nende amakomolu, nemiseituni nende obuukhi.

⁹Ebwene yiyo sinamuhongekhwo inzala nohomba okhutakha esindu siosi tawe. Tsinyanda tsiesibala tsana tsilimwo ebibia, ne mubikulu biasio munyala okhuyabamwo esibia siomukasa.

¹⁰Mulanyoola biosi ebia mwakhenya okhulia, ne mulakhupila OMWAMI Nyasaye wenywe embwo khulwesibala esiobuhinda esia yamuhelesia.

¹¹“Mulole mbu murakhebil'la OMWAMI Nyasaye wenywe tawe; murachweya okhulonda amalako kaake nobukhalachibwe nende amebaaloke akamuhelesianga luno tawe.

¹²Olwa namunyole biosi ebiamutakhanga okhulia ma olwa namube nimwombokhele tsinyumba tsindahi okhumenyamwo,

¹³ma olwe tsing'ombe tsienywe, nende emianduchienywe chiosi nabibe nibimeetekhele,

¹⁴mulole mbu murakhekhonya ma mwibil'le OMWAMI Nyasaye wenywe owamununula okhurula Emisiri, aha mwalinji abasumba tawe.

¹⁵Yamwemel'la namubisisia musitsiimi esikali khandi esiokhurisia ahetsinzokha tsiobusungu nende amakatia kali. Musilangalangwe esibulamwo amaatsi yisio yamusenul'la amaatsi okhurula mulwanda.

¹⁶Olwa mwali musitsiimi yamuha amana mulie, ebiokhulia ebiabakuka benywe bali nibasili okhuliakhwo. Yamurumila amatinyu okhumuteema inywe, kho mbu mukhumalila amukaasie nebindu ebilahi.

¹⁷Khulwe yako, murakhapaalakhwo mbu mwabeye okhwenyool'la obuhinda abene khulwe tsingufu tsienywe khandi khulwo obunyali bwenywe abene tawe.

¹⁸Mwitsul'le mbu OMWAMI Nyasaye wenywe niye ochilanga nimuba abahinda khulwo obunyali bubwe omwene. Akholanga mbwo sichila asili omusubilwa olwaleelo khundakano eya yalomba nabakuka benywe.

¹⁹Murebil'lakhwo OMWAMI Nyasaye wenywe kata murasukhanakhwo okhutsia khubanyasaye bandi okhubekayakaya nokhubarumikhila tawe. Nimukhola mbwo, kho muchetsiyianga olwaleelo mbu siahene mwesi mulatiba.

²⁰Nimuba nimuralonda amalako ko MWAMI, kho mulamumwa singa butswa amahanga yako ako MWAMI namume olwa namwesundenje hambeli.