Read lunyore OKHUKALUKHILA MUMALAKO 9 Bible Online

OKHUKALUKHILA MUMALAKO 9 - lunyore bible

OKHUKALUKHILA MUMALAKO 9

¹“Hulile inywe Abaisiraeli! Olwaleelo muli ahembi okhwambukha omuchela kwa Yorodani ma mubukule esibala sia betsinzibulo abali abenji okhumuyomba khandi abetsingufu okhumuyomba. Amatookho kabwe namakali khandi kasirwa namasisi akoolanga mumalumbesi.

²Abandu bamwo nabarambi khandi abetsingufu; emindu emikali, khandi muhuliye nikaboolwanga mbu abulaho onyala okhulwana nende abaana ba Anakimu.

³Nebutswa mwitsa okhulola abene mbu OMWAMI Nyasaye wenywe, yeetsa okhwemela imbeli wenywe singa omul'lo okwatukhanga butinyu. Yeetsa okhubaleka olwa mwitsa okhuba nimwesundanga imbeli, kho mube abanyala okhubakhunga nende okhubeera bwangu singa obwa yakhusubisia.

⁴“OMWAMI Nyasaye wenywe namal'le okhumukhungila abasuku, murakhaboolakhwo mumioyo chienywe mbu, ‘OMWAMI akhuleer're khubukule esibala sino sichila nifwe abakwan'ne okhusibukula tawe.’ OMWAMI yetsa okhumukhungila abandu yaba sichila nabonooni.

⁵Khandi sikali sichila muli abalahi ma mukholanga akabwene kho OMWAMI uhuchiliye mubukule esibala siabwe tawe. Yeetsa okhubakhunga sichila nabonooni khandi sichila OMWAMI yekombanga okhuhesia lisubisio elia yalomba nende abakuka benywe, Aburahamu, Isaka nende Yakobo.

⁶Munyala okhuba nobwatooto mbu OMWAMI siamuhetsanga esibala esinolu yisi sichila mukhoyele munyoole tawe.

⁷“Murakhebil'la singa obwa mwamukhola OMWAMI Nyasaye wenywe okhuba nelirima nimuli musitsiimi tawe. Okhurula litukhu eliamwarula Emisiri okhwola litukhu eliamwoleyekhwo hano, mwali okhumukhol'la induli.

⁸Kata olwa mwali hasikulu sia Sinai mwali okhumuchema lirima; liali lirima likali liokhumukhuya mwesi.

⁹Ise ndanichila okhutsia khusikulu khulwokhuhebwa orupao rwamachina orwali nirwahandichilwekhwo Indakano eyo MWAMI yali nalombele n'nenywe. Ndamenya khusikulu khulwo oluhono lwamatukhu amakhumi kane om'basu nobutukhu ne sindaliakhwo esiokhulia nohomba okhunywakhwo esindu siosi tawe.

¹⁰Ma OMWAMI niyambelesia orupao rwamachina rubili orwa yali nahandichilekhwo nomukhono kukwe amalako akayali namubooleye nali mumul'lo litukhu elia mwali nimwebunjikhile hasikuli.

¹¹Yee, inyuma wamatukhu amakhumi kane obutukhu nende om'basu, OMWAMI yambelesia orupao rwamachina rubili orwayali nahandichilekhwo indakano.

¹²“OMWAMI niyambool'la mbu, ‘Tsia hasi khusikulu bwangu, sichila abandu baabo abawemel'la okhurula Emisiri bamal'le okhwona ma bakhole tsimbi. Bamal'le okhulekha akandabalaka okhukhola ma belombeye esiniini siokhwekayakaya.’

¹³“Khandi OMWAMI niyambool'la mbu, ‘Manyile singa obwabandu yaba bali abatinyu mumioyo chiabwe.

¹⁴Orakhateema okhunzikal'la tawe. Mal'le okhukhalaka okhubakhuya bosi kho omundu wosi alekhe okhubetsul'lakhwo khandi tawe. Ma ibe nzia okhukhukhola samwana olwibulo olukali okhubayomba, khandi owe tsingufu okhubayomba.’

¹⁵“Kho ndamala nisukhana okhutsia hasi hesikulu ninjinjile orupao rwamachina rubili orwe Indakano yali nehandichilwekhwo. Olumemo lwomul'lo lwali ndurulanga khusikulu.

¹⁶Ndali okhulola mbu inywe mwali nimufunachile lilako lio MWAMI Nyasaye wenywe yamuhelesia, ne mwali nimumukholeye tsimbi khulwo khwelombela esiniini siomukasa esifwana echulukhi.

¹⁷Kho imbeli wenywe ndafuuba hasi orupao rwamachina rubili orweindakano yirwo, ma nirwatikha mubitonye.

¹⁸Kho olwakhabili ndakona hasi mafung'ama imbeli wo MWAMI khulwa amatukhu amakhumi kane obutukhu nom'basu ne sindaliakhwo esiokhulia nohomba okhunywakhwo esindu siosi tawe. Ndakholanga yaka sichila mwali nimwoneye OMWAMI ma nimumuchemele okhuba nelirima.

¹⁹Ndali nende oburi khulwe lirima likali elio MWAMI yali n'nalio sichila yali noburima bwokhumwira inywe mwesi; nebutswa khandi OMWAMI yali okhuhul'la olwa ndamusaaya amulekhele.

²⁰Khandi OMWAMI yali nelirima likali eliokhwira Haruni, nebutswa ndali okhusaayila Haruni munyinga indelwa yiyo.

²¹Ndabukula esindu sietsimbi esiamwali nimulombele; mbu echulukhi yomukasa; ma nifuuba mul'lo. Ma ninzituya mubitonye ma ninzisa nekwa olukuukhi ma nifuuba olukhuukhi yilwo mumuchela okurulanga musikulu.

²²“Khandi mwamukhola OMWAMI Nyasaye wenywe okhuba nelirima olwa mwali Tabera, Masa nende Kiburotsi Hataba.

²³Ne olwo MWAMI yali okhumuruma okhurula Kadeshi Barinea, namalako okhutsia okhubukula esibala yisio, mwali okhukhola indiri khu MWAMI, simwali okhumusubila kata okhumuhul'la tawe.

²⁴Okhurula ise nimumanya inywe mwamenya nimufukulanga OMWAMI.

²⁵“Kho ndakona hasi mafung'ama imbeli wo MWAMI khulwa amatukhu amakhumi kane obutukhu nom'basu ne ndali nimanyile mbu OMWAMI yali nachoomele okhumukhuya.

²⁶Ne ndamala nisaaya khuye mbu, ‘OMWAMI wo Bunyali orakhuya abandu baabo tawe, abandu aba wali okhuhonokosia ma nobahinia Emisiri khulwe tsingufu tsitsio nende obunyali bubwo.

²⁷Witsul'le abarumikhili baabo, Aburahamu, Isaka, na Yakobo, kho orabbahendelakhwo khulwo okhuba abemioyo emitunyu tawe, kata khulwobubi bwabwe nende tsimbi tsiabwe tawe.

²⁸Niwakhakhola mbwo Abaamisiri bakhaboola mbu wali okhuramwa okhuhila abandu baabo musibala esiawali niwabasubisia. Nababoole mbu wahila abandu baabo musitsiimi khulwo okhuber'ramwo, sichila wali niwabasinyikhila.

²⁹Ne kata mbwo, yaba nibo abandu abawali okhwela babe abandu baabo khandi wabahinia Emisiri khulwo bunyali bubwo obukhongo.’