Read lunyore YOHANA 1 Bible Online

YOHANA 1 - lunyore bible

YOHANA 1

¹Esibala nisisili okhulombwa Ling'ana yalinji ho, naye Ling'ana yali na Nyasaye, naye Ling'ana yali Nyasaye.

²Owatsana uyo yalinji halala na Nyasaye okhurula mukhuchiaka.

³Nyasaye yalomba ebindu biosi okhubir'ra muye. Esindu siosi esialombwa sisialombwa sila ye tawe.

⁴Ling'ana tsana liali obuchiachilo bwobulamu, ne obulamu tsana bwalera obulafu khubandu.

⁵Ne obulafu nabwo bwakhanga musiilima ne esiilima sisiabusimiakhwo tawe.

⁶Nyasaye yaruma omurumwa uwe oweliira lilie liali Yohana.

⁷Yetsa okhubool'la abandu akobulafu yibu, mbu bosi bahulile amang'ana yaka ma basubile.

⁸Naye siyaali niye obulafu bwatsana tawe; nebutswa yetsa okhukobokhela obulafu yibwo.

⁹Yibu nibwo obulafu bwatooto, obwitsanga musibala nibukhosia khubandu bosi.

¹⁰Ling'ana tsana yalinji musibala, ne okhubir'ra muye Nyasaye yalomba esibala, nebutswa esibala nasio sisiamumanya tawe.

¹¹Yetsela abomusibala sisie siene, nebutswa abandu baabe bene sibamwinjisia tawe.

¹²Ne abalala kata mbwo abamwinjisia nibasubila muye, yabaha obunyali okhuba abaana ba Nyasaye.

¹³Sibalangwa abaana ba Nyasaye khulwa okhwenya khwomubili, nohomba khukhulalila khwomundu tawe, nebutswa Nyasaye niye samwana wabwe.

¹⁴Naye Ling'ana yakwa omundu, khandi niyetsuye esirenda nakatooto, yamenya mwifwe. Nefwe khwalola obukhongo bubwe, obukhongo obwa yanyoola singa Omwana omutelwa owa Papa.

¹⁵Yohana yakobokhelanga omwene uyu. Yalanjisia, naboola, “Uyo niye owandal'lomangakhwo nimboola ‘Yetsanga inyuma wanje, nebutswa nomukhongo okhunyomba ise, okhuba yalinjiho ise nisili okhwibulwa.’ ”

¹⁶Okhurula khubukhongo bwesirenda sisie esinji, wamala okhukhulamila ifwe fwesi tsikhabi nakhumet'ta tsikhabi khutsindi.

¹⁷Nyasaye yahaana Amalako okhubir'ra mu Musa, nebutswa esirenda nakatooto bietsela mu Yesu Kristo.

¹⁸Abulaho omundu owalolakhwo Nyasaye mumatukhu kosi tawe. Omwana omutelwa obetsanga singa Nyasaye khandi ali khulubeka lwa Samwana niye owali okhumubisula khubandu.

¹⁹Abakhongo ba Bayahudi mu Yerusalemu baruma abalala khubesaalisi nende Abalawi khu Yohana bamureebe mbu, “Ibe niwe wina?”

²⁰Naye Yohana siyasula okhubakalusia tawe, nebutswa nababool'la kol'lani, “Ise sindi Masihi tawe.”

²¹Nibamureeba, “Kho okhali niwe wina? Niwe Elija noho?” Naye naboola, “Ise sindi niye tawe.” Nibamureeba khandi “Okhali omuroobi noho?” Nabakalusia, “Tawe.”

²²Kho nibamureeba, “Khe okhali wina? Khubool'le, khubakaluchisie amang'ana abakhurumile. Ibe omwene khububwo oboolanga niwe wina?”

²³Yohana yabakalusia narumikhilanga amang'ana komuroobi Isaya: “ ‘Ndi omwoyo kwomundu olanjisianga musitsiimi: lunjisie injila yo Mwami.’ ”

²⁴Kho abarumwa yabo abali nibarumilwe nende Abafarisayi,

²⁵nibamureeba “Khe obaputisanga busina, noba norali Masihi nohomba Elija, nohomba omuroobi?”

²⁶Yohana nabakalusia, “Ise mbaputisanga mumatsi, ne hakari wenywe usinjiye ho mulala owamuramanyile tawe.

²⁷Niye owitsanga inyuma wanje; singwan'ne okhuboholola emikoye chiebilaro bibie tawe.”

²⁸Amang'ana yaka kosi kekhola mu Betsania injelekha wa Yorodani, owa Yohana yali nabaputisanga.

²⁹Omukamba okwalondakhwo, Yohana yalola Yesu niyetsanga aha yali, ma naboola, “Lole esimeme sielikondi lia Nyasaye, ohiniangaho tsimbi tsiesibala!

³⁰Uyo niye owa ndal'lomangakhwo nimboola, ‘Omundu yetsanga inyuma wanje, nebutswa nomukhongo okhunyomba ise, sichila yalinjiho ise nisili okhwibulwa.’

³¹Nase sindali nindamumanya tawe, nebutswa ndetsa nimbaputisanga mumatsi okhumukhola amanyikhe khubandu ba Isiraeli.”

³²Ne Yohana yaribula akobukobokheli yibu. “Ise ndalola Omwoyo niyekhanga singa likhulwi narula mwikulu nayela khuye.

³³Nase sindamanya niye owatsana tawe, nebutswa Nyasaye owaruma okhubaputisa mumatsi yali niyambool'la, ‘Owolilola Omwoyo nayelakhwo, omwene uyo niye obaputisanga mu Mwoyo Omutsienukhu.’

³⁴Nase ndalola ma ningobokhela mbu uyo niye Omwana wa Nyasaye.”

³⁵Litukhu elialondakhwo, Yohana yali nasinjiye halala nabalondi baabe babili habwene yaho,

³⁶Olwa yalola Yesu nachendanga, naboola, “Lole esimeme sielikondi lia Nyasaye!”

³⁷Abalondi babili yabo bamuhulila naboolanga mbwo, nibalonda Yesu.

³⁸Yesu niyesebukha nalola bamulondanga, nabareeba “Murunanga sina?” Nibamukalusia, “Omwibaali omenyele hena?”

³⁹Naye nababool'la, “Yitse mulole.” Nibatsia nibalola ahamenyele nibabutsa n'naye litukhu yilio liosi okhuba tsiali nitsili etsisaa likhumi tsiamukoloba.

⁴⁰Anderea omusiani wanga Simoni Petero yali mulala khubo abahulila aka Yohana yaboolanga ma nibalonda Yesu.

⁴¹Olwokhuranga Anderea yanyoola Simoni omwana wabwe, namubool'la, “Khumunyooye Masihi watsana uyo.” (Elili okhuboola “Kristo.”)

⁴²Namuleera Simoni khu Yesu. Yesu namuhenga ma naboola, “Ibe niwe Simoni omwana wa Yona, nolangwenge Kefa.” (Elibetsanga ndikalukhanibwa, Petero, elili okhuboola “Lichina.”)

⁴³Litukhu elialondakhwo Yesu yenya okhutsia Galilaya. Nanyoola Filipu, namubool'la, “Nonda.” (

⁴⁴Ne Filipu yali omundu wa Betsisaida, litaala lianga Anderea nende Petero.)

⁴⁵Filipu nanyoola, Netsaneli, namubool'la “Khunyooye owatsana owa Musa yali okhuhandika amang'anake musitapu sia Malako khandi owa abaroobi bahandikakhwo. Niye Yesu wa Nasareti omwana wa Yosefu.”

⁴⁶Netsaneli namubool'la, “Mbula Nasareti yiyi esindu esilahi sinyala okhurulayo?” Filipu namubool'la, “Yitsa olole.”

⁴⁷Olwa Yesu yalola Netsaneli niyetsanga aha yali, Yaboola khuye mbu, “Omuisiraeli watooto ngwoyo, orali nesikha siosi tawe.”

⁴⁸Ne Netsaneli namureeba “Ne waamanya mbwena?” Yesu namukalusia namubool'la, “Ndakhulutsi noli mus'sina siomukhuyu Filipu nasili okhukhulanga.”

⁴⁹Netsaneli namukalusia mbu, “Rabi[1] ibe niwe Omwana wa Nyasaye, niwe Omwami wa Isiraeli.”

⁵⁰Yesu namubool'la, “Usubiye sichila khubooleye mbu ndali okhukhulola noli mus'sina siomukhuyu? Nolole amang'ana amakhongo okhuyomba yaka!”

⁵¹Yesu natsitsachil'la naboola, “Mubool'langa tooto, mwakhalole likulu nilikukha, ne abamalaika ba Nyasaye nibaniinanga khandi nibekhanga khu Mwana wo Mundu.”