Read lunyore YOHANA 10 Bible Online

YOHANA 10 - lunyore bible

YOHANA 10

¹Yesu yaboola, “Mubool'langa tooto: Omundu orenjil'la musilibwa siesikuli siamakondi, nebutswa nabir'ra elubeka lundi, omwene uyo nomwibi khandi nomwikul'li.

²Omundu owinjil'langa musilibwa nomwayi wamakondi.

³Omulindi amwikul'langa esilibwa ne amakondi kahulilanga omwoyokwe, olwa alanganga sielikondi neliira lialio, nakemel'la okhurula esioba.

⁴Olwamal'le okhuhinia amakondi kosi esioba, akemel'langa imbeli, ne nako nikamulonda, sichila kamanya omwoyokwe.

⁵Amakondi yako sikakhalonda omundu omucheni tawe, nebutswa kakhamwilukha, sichila sikamanyile omwoyo kwomundu omucheni tawe.”

⁶Olukano luno Yesu yali okhubabool'la, ne sibali okhumanyilisia esifune sialwo tawe.

⁷Kho Yesu khandi nababool'la, “Mubool'langa tooto: Ise nise esilibwa siamakondi.

⁸Bosi abali okhwitsa imbeli wanje nabebi nende abekul'li, nebutswa amakondi sikabahul'la tawe.

⁹Ise nise esilibwa; omundu wosi naba niyenjila nabirila khu ise, alahona, ma nayenjilenge nende okhurula, nanyoola obwayilo.

¹⁰Omwibi yetsanga okhwiba nende okhwira, nokhwononia. Ise ndetsa mbu babe nobulamu, ne khandi babe n'nabwo obusilan'ne.

¹¹“Ise nise omwayi omulahi, omwayi omulahi ahaananga obulamubwe okhufwila amakondi.

¹²Omundu owahandikwa orungwanga, orali omwayi, khandi narali omwene makondi, nalola esibwe nisitsanga, ne alekha amakondi niyelukha, ma esibwe siketsumba nisikasalania.

¹³Yelukhanga sichila norungwanga, ne siahendelanga amakondi tawe.

¹⁴Ise ndi omwayi omulahi; nase ndamanya amakondi kanje, nako kaimanya.

¹⁵Singa obwa Papa yamanya ise, nase nimbwo ndehaananga okhufwila amakondi.

¹⁶Ndi nende amakondi kanje kandi akarali musikuuli sino. Kambel'le okhukaleera nako kakhahul'la omwoyo kwanje; ma kabe esiayo silala, nende omwayi mulala.

¹⁷“Papa wainyanza sichila mbaananga obulamu bwanje, khe mbe onyala okhububukula khandi.

¹⁸Abulaho onyala okhunuula obulamu bwanje, nebutswa mbuhana omwene. Ndi nobunyali okhubuhana, ma ndi nobunyali okhububukula khandi, yaka niko aka Papa yandaka okhukhola.”

¹⁹Abayahudi nibachiaka okhuhingana khandi sichila amang'ana kaake.

²⁰Abenji khubo nibaboola, “Wasienwa! Ulalukhile! Busina muhul'lisianga akaboolanga?”

²¹Abandi nabo nibaboola, “Amang'ana yaka sikali akomundu wasienwa tawe. Owasienwa anyala okhufunula tsimoni tsiababofu?”

²²Olwene yilwo liali litukhu lielisabo eliokhutsienulwa khwe Hekalu mu Yerusalemu, ne kali amatukhu kobusindu.

²³Yesu yali nachendanga mu Hekalu, khulusimbo lwa Solomoni.

²⁴Abayahudi betsa nibamufumbila, nibamureeba mbu, “Lwakhabe okhwola lina khulalekhe okhuhayahayia? Noba noli Masihi, okhubool'le bulahi.”

²⁵Yesu nabakalusia mbu “Ndali okhumubool'la nenywe simwasubila tawe. Emilimo echiakholanga muliira lia Papa, nichio echingobokhelanga.

²⁶Nebutswa inywe simusubilanga, sichila simuli khubamakondi kanje.

²⁷Amakondi kanje kahul'langa omwoyo kwanje, nase ndakamanya, khandi kanondanga.

²⁸Nase ngahelesianga obulamu oburahwa sichila abulaho kata mulala olakahinia okhurula mumakhono kanje.

²⁹Papa wanje, owamba nomukhongo okhuyomba bosi, ne abulaho onyala okhukahinia mumakhono ka Papa.

³⁰Ise nende Papa khuli mulala.”

³¹Abayahudi batoola amachina khandi bamulase.

³²Yesu nababool'la, “Emilimo eminji emilahi ndamumanyisie echirula khu Papa, nimulimo sina muchio omubi okuchila mundase namachina?”

³³Abayahudi nibamukalusia, “Sikali ni khulwa omulimo omulahi okwa khukhulasilakhwo tawe, nebutswa kali sichila wechelanianga Nyasaye; khandi sichila ibe, olwoli omundu namundu wekholanga okhuba Nyasaye!”

³⁴Yesu nabakalusia mbu “Kahandikwa mumalako kenywe mbu ‘Nyasaye yaboola, Inywe muli abanyasaye.’

³⁵Nyasaye yalanga abandu yabo abanyasaye, aba mang'ana kaake ketsa khubo, ne khwamanya mbu Amahandiko kaboolanga akatooto khasotso.

³⁶Busina inywe muboolanga khuye, owa Papa yali okhutsienula namuruma musibala mbu ‘Wechelanianga Nyasaye.’ Khulwa mbu ndali okhuboola ‘Ise ndi Omwana wa Nyasaye?’

³⁷Kho murasubila tawe nimba nirakhola ebindu bia Nyasaye yenyanga khole.

³⁸Nebutswa nimba ninjikhola ne kata nimuba nimurasubila khwise, subile emilimo chianje; mbu mutoole okhumanya nokhumanyilisia obwa Papa ali mwise, nase mu Papa.”

³⁹Kho nibenya khandi okhumufumila; ne narula mumakhono kabwe.

⁴⁰Narulaho khandi natsia injelekha wa Yorodani, habundu tsana aha Yohana yali okhubaputisa olwokhuranga namenyayo.

⁴¹Abenji nibatsia owayali nibaboola mbu “Tooto, Yohana siyakholakhwo akamangalimwa kosi tawe nebutswa kosi aka yaboola khumundu uno nakatooto.”

⁴²Abandu abenji basubila khu Yesu.