Read lunyore YOHANA 11 Bible Online

YOHANA 11 - lunyore bible

YOHANA 11

¹Omundu oweliira mbu Lasaro owamenyanga Betsania, yali okhulwala. Betsania liali litaala lianga Mariamu nende Maritsa, omwana wabwe.

²Mariamu niye owatsana owatsukha amafura khubilenje bio Mwami namweya nende liswi lilie, owambotso wabwe Lasaro yali nalwala.

³Ababotso nyene yabo baruma ling'ana khu Yesu nibaboola, “Omwami, lola, owawayanza alwala.”

⁴Nyinga Yesu yakahul'la, naboola, “Obulwaye yibwo sibuli obwokhufwa tawe, nebutswa buli khulwo bukhongo bwa Nyasaye mbu Omwana wa Nyasaye afumibwe khulwa bwo.”

⁵Ne Yesu yali niyayanza Maritsa nende awabwe nyene nende mbotso we Lasaro.

⁶Nyinga yahulila mbu Lasaro yali nalwala, yakona aha yali nali amatukhu kandi kabili.

⁷Olwe inyuma nabool'la abechi baabe, “Chende khukalukhe Ebuyahudi.”

⁸Abechi nibamubool'la, “Omwibaali Abayahudi bali nibenyanga okhukhulasa namachina; nawe wenyanga okhukalukhayo khandi?”

⁹Yesu nababool'la, “Omubasu sikuli netsisaa likhumi natsibili? Omundu ochenda m'mubasu siyakhesirala tawe, sichila alolanga obulafu bwesibala yisi.

¹⁰Ne naba nachenda mubutukhu ne yesiraala sichila obulafu sibuli muye tawe.”

¹¹Yesu yababool'la yaka; ma nameeta okhuboola, “Lasaro, omulina wefwe, akonanga tsindoolo; nebutswa ndatsia okhumubuusia mundoolo tsitsie.”

¹²Abechi nibamubool'la, “Omwami, naba nakonanga, nahone.”

¹³Nebutswa Yesu yali nabooyenje akokhufwa khukhwe khwene, nebutswa bakaala abooye akokhukona tsindoolo.

¹⁴Nilwo olwa Yesu yabaribul'la kol'lani, “Lasaro ufwiye.

¹⁵Ne khulwe inywe, nyanzile sichila sindabeyeho tawe, khe mutoole okhusubila. Chende khutsie khuye.”

¹⁶Kho Tomasi, olangwanga Mukhwana, nabool'la abechi basie, “Nefwe chende khutsie, khufwe halala n'naye.”

¹⁷Nyinga Yesu yoola yo yanyoola mbu Lasaro yali nakon'ne musilindwa amatukhu kane.

¹⁸Betsania hali ahembi nende Yerusalemu oluchendo oluhela ahembi etsikilomita tsitaru.

¹⁹Abayahudi abenji nibetsa khu Mariamu nende Maritsa, okhubahotselesia khulwa okhufwa khwomusiani wabwe.

²⁰Nyinga Maritsa yahul'la Yesu yetsanga, yarula natsia okhumwakan'na, ne Mariamu nasikhaye munzu.

²¹Maritsa nabool'la Yesu, “Omwami, olaba niwabeye hano, khane mbotswa siyafiye tawe.

²²Ne kata luno manyile, eliosabanga khu Nyasaye, Nyasaye yakhakhuha.”

²³Yesu namubool'la, “Mbotso uwo alasimukukha khandi.”

²⁴Maritsa namubool'la, “Ndamanya yakhasimukukhe mwitukhu liesihesi.”

²⁵Yesu namubool'la, “Ise nise okhusimukukha, khandi nise obulamu. Uyo osubilanga khu ise, kata naba nafwa, yakhabe nobulamu;

²⁶naye oli mwoyo ne niyasubiye siyakhafwe kata nahati tawe. Ibe osubilanga yako?”

²⁷Maritsa namubool'la, “Yee Omwami, subiye niwe Masihi, Omwana wa Nyasaye, naye niye owitsanga musibala.”

²⁸Nyinga Maritsa yali nabooye yako, yatsia nalanga omwana wabwe, Mariamu masilisi, namubool'la “Omwibaali ali hano, akhulanganga.”

²⁹Nyinga Mariamu yahul'la yaka yasinjila bwangu natsia okhumwakan'na.

³⁰Yesu yali nasili okhwinjila mwitaala ne naba asili habwene yaho aha Maritsa yamwakan'na.

³¹Ma abandu abali mbalinji n'naye munzu, nibamulemianga omwoyo olwa balola Mariamu nasinjila bwangu narula esioba bamulonda. Bakaalanga mbu atsitsanga enasilindwa okhwekhuula.

³²Mariamu olwa yoola ha Yesu yali nali, namulola nakwa hasi habilenje bibie, namubool'la, “Omwami, olaba niwabeye hano, khane mbotswa siyafwiye tawe.”

³³Olwa Yesu yamulola niyekhuulanga, yabelela ma naba nesihenda mwoyo.

³⁴Ma nabareeba, “Nihena aha mwabeye okhumuyabila?” Nibamubool'la, “Omwami, yitsa olole.”

³⁵Yesu nalakaya amasika.

³⁶Khe Abayahudi nibaboola mbu, “Lolekhwo singa obwa yamuyanza.”

³⁷Nebutswa abandi mubo nibaboola, “Omundu uyu yali okhufunula tsimoni tsiababofu. Siyakhekaliye okhufwa khwa Lasaro?”

³⁸Ma Yesu yabelela mumwoyokwe khandi niyoola khusilindwa. Ne esilindwa tsana siali mulwangaywa nisiekal'lwa nelichina.

³⁹Yesu yababool'la, “Hinie lichina yilio.” Maritsa, owa mbotsowe yali nafwiye, namubool'la, “Omwami, luno ahunyanga, sichila leelo namatukhu kane okhurula nafwa.”

⁴⁰Yesu namubool'la, “Sikhubooleye mbu Noba nosubila wakhalola obukhongo bwa Nyasaye?”

⁴¹Ma nibahinia lichina, Yesu nachinga tsimoni tsitsie ikulu, naboola, “Papa, mboolanga khuibe embwo sichila ibe umbul'langa.

⁴²Ndamanya mbu ibe umbul'langa khasotso, nebutswa mbooye yaka khulwabandu yaba abasinjiye yaha kho basubile mbu niwe owaruma.”

⁴³Olwa yali niyakhaboola yaka, nalanga nende omwoyo omukali, mbu “Lasaro, rula esioba!”

⁴⁴Lasaro tsana narula esioba, nabohelwe ebilenje nende amakhono, nende tsingubo etsiayali nayabiywe n'natsio; ne kata m'moni mumwe nimubohelwe nesitambaya. Yesu nababool'la, “Mumuboholole atsie.”

⁴⁵Abenji khu Bayahudi abali okhwitsa khu Mariamu, nibalola aka Yesu yakhola bamusubila.

⁴⁶Nebutswa abandi khubo nibatsia khu Bafarisayi nibababool'la amang'ana ka Yesu yali nakhol'le.

⁴⁷Abesaalisi abakhongo nende Abafarisayi nibabunjelesia esiina, nibaboola “Khukhole mbwena? Okhuba omundu uno akholanga akamangalimwa amenji.

⁴⁸Nikhuba nikhumulekha butswa mbwo, abandu bosi nabamusubile; ma Abaroma baleetsa okhwononia Ehekalu yefwe nende olwibulo lwefwe.”

⁴⁹Ne oundi khubo owalangwa Kayafa owali Omwesaalisi Omukhongo omuhika kwene yikwo yababool'la mbu, “Simumanyile ling'ana liosi tawe.

⁵⁰Kho kata simwitsulila singa obwa buli obulahi omundu mulala afwile abandu bosi, musilenje sioluyia lwosi okhutiba?”

⁵¹Ne siyaboola yako khululwe tawe; nebutswa olwa yali Omwesaalisi Omukhongo owomuhika kwene yikwo yali naroobanga mbu Yesu yakhafwila Abayahudi bosi.

⁵²Ne sikali khulwo olwibulo yilwo lwonyene tawe, nebutswa abunjelesie halala abaana ba Nyasaye abali nibasalana.

⁵³Ma okhurula khwitukhu yilio balomba emise obwa banyala okhumwira.

⁵⁴Kho Yesu siyachenda habulafu mu Bayahudi khandi tawe, ne yarulaho natsia musibala esiali ahembi nende esitsiimi, mwitaala elilangwa Efuraimu, namenyayo halala nende abechi yabo.

⁵⁵Ne Epasaka ya Bayahudi yali ahembi ne abenji nibarula musibala okhutsia Yerusalemu Epasaka nesili okhwola mbu besiiye.

⁵⁶Kho nibamuruna Yesu, nibabool'lana abene khubene nibasinjiye mu Hekalu, mbu “Mupaalanga mbwena? Siyetsa okhwitsa khwisabo?”

⁵⁷Ne abesaalisi abakhongo nende Abafarisayi bali nibalachile mbu omundu wosi naba namanya ahaali, abuule ma bamufumile.