Read lunyore YOHANA 12 Bible Online

YOHANA 12 - lunyore bible

YOHANA 12

¹Amatukhu kasasaba Epasaka nesili okhwola, Yesu yatsia Betsania, hango hanga Lasaro tsana; owa Yesu yali niyasimukusiiye okhurula mubafu.

²Bamutekhela ho ebiokhulia biamukoloba ne Maritsa niye owabikabula. Lasaro yali mulala khubandu abekhala okhulia n'naye.

³Mariamu nabukula amafura akahunya esuswa, enusu yelita, akakulwanga obukusi obutinyu, natsukhil'la khubilenje bia Yesu ma nabieya nende liswi lilie. Inyumba yosi nehunya esuswa yamafura yako.

⁴Nebutswa Yudasi Isikariote, mulala khubechi baabe, owamala namusiemana, naboola,

⁵“Busina amafura yaka karakusiibwe etsidinari etsimia tsitaru, ma tsilahebwa abatakha?”

⁶Yako siyaboola sichila ubahendeye abatakha tawe, nebutswa sichila yali nali omwibi. Yachinganga omutata kwamapesa nabukulanga khu biabikhanga mwo.

⁷Kho Yesu naboola, “Mulekhe omukhasi uyu abe. Lekhe akabikhile khwitukhu liokhuyabilwa khwanje.

⁸Mulabetsanga nabatakha amatukhu kosi; nebutswa ise simuli n'nase amatukhu kosi tawe.”

⁹Abandu abenji khu Bayahudi bahul'la mbu Yesu ali Betsania, ma nibatsiayo. Sibaitsa khulwa Yesu yenyene tawe, nebutswa khandi balole Lasaro owa Yesu yali niyasimukusisie okhurula mubafu.

¹⁰Kho abesaalisi abakhongo nibalomba omuse kwokhwira Lasaro,

¹¹sichila khulwa ye abandu abenji khu Bayahudi babasuula, nibasubila khu Yesu.

¹²Litukhu elialondakhwo omukanda omukhongo okwali nikwitsile mwisabo lie Pasaka bahulila mbu Yesu yetsanga Yerusalemu.

¹³Kho babukula tsisaka tsiamasindu nibarula nibatsia okhumwakan'na, nibalanjisia mbu, “Nyasaye yetsomibwe! Noweikhabi uyo owitsanga muliira lio Mwami. Nyasaye alamile Omuruchi wa Isiraeli Ikhabi.”

¹⁴Naye, Yesu nanyoola esimoosi siesikhili naniina khwo singa obwa Amahandiko Amatsienukhu kaboolanga,

¹⁵“Oraria tawe, ibe litookho lia Sayuni! Lola, omuruchi uwo yetsanga, naniinile khusimoosi siesikhili.”

¹⁶Abechi baabe sibamanyilisia esifune sie ling'ana yilio olwokhuranga tawe, nebutswa betsul'la amang'ana yaka olwa Yesu yafumibwa mbu niye owakahandikwa khwo, khandi niko akabamukholeye.

¹⁷Omukanda kwabandu yikwo abali halala n'naye olwa yalanga Lasaro okhurula musilindwa, namusimukusia mubafu, baribula kol'lani, akali nikekhol'le.

¹⁸Nisio esiachila omukanda nikutsia okhumwakan'na, sichila bali nibahuliye niye owakhol'le akamangalimwa tsana.

¹⁹Abafarisayi nibabool'lana, “Lole obwa khukhumbuywe! Lole, esibala siosi simulondanga!”

²⁰Abalala khu Bayunani bali halala neyabo abatsia Yerusalemu okhwekayakaya mwisabo.

²¹Abene yabo betsa khu Filipu, owali okhurula Betsisaida mu Galilaya, nibamubool'la, “Omwami, khwakhenya okhulola Yesu.”

²²Filipu natsia okhubool'la khwo Anderea; kho Anderea halala nende Filipu, nibatsia okhubool'la Yesu.

²³Yesu nabakalusia, “Esaa eyokhufumibwa khwo Omwana wo Mundu yol'le luno.

²⁴Siahene siahene, mubool'langa, inzoli yeingano ebetsanga inzoli yeingano butswa okhwola olwa erakwa mwiloba, ma efwe. Olwa ebetsanga niyakhafwa, yamanga ebiamo ebinji.

²⁵Omundu oyanzanga obulamu bubwe abukosianga, ne naye obihil'lwanga obulamu bubwe musibala yisi, niye olibuhonia anyoole obulamu oburahwaho.

²⁶Omundu niyenya okhuurumikhila ise, akwana yanonde ise, ne aha Ise ndi, ahene yaho omurumikhili wanje naye abeho khandi. Omundu wosi owurumikhilanga ise, Papa wanje alamufumia.

²⁷“Luno omwoyo kwanje kuhendanga muno kho namboole mbwena? Ndakhaboola mbu ‘Papa, oralekha esaa yiyi yinzitsile tawe?’ Nebutswa amang'ana yaka, niko akachila ninzitsa mbu mbir're khusaa eyomunyakhano yiyi.

²⁸Papa fumia eliira lilio.” Ma omwoyo nikurula mwikulu nikuboola, “Ndifumiisie khandi nandifumie.”

²⁹Omukanda okwali nikusinjiyeho, kwahulila omwoyo tsana ma nikuboola mbu ikhupa irindukhile; ne abandi nibaboola “Om'malaika ul'lomele n'naye.”

³⁰Yesu nabakalusia, nababool'la “Omwoyo yikwo sikul'lomele khulwe ise tawe, nebutswa khulwe inywe.

³¹Luno okhukhalachilwa esiina khwesibala yisi khwol'le; luno omukhongo wesibala yisi alafuubwa esioba.

³²Nase olwa njingulwa ikulu okhurula khusibala, ndikhwesa abandu bosi okhwitsa khwise.”

³³(Akene yaka yali okhuboola, nabuulanga singa obwa alifwa.)

³⁴Abomukanda nibamukalusia mbu “Amalako kefwe kakhubool'langa mbu Masihi watsana, yakhamenye inziaiyo! Nawe oboolanga mbwena mbu Omwana wo Mundu akwana okhuchingulwa? Omwana wo Mundu tsana uyo niwina?”

³⁵Yesu nabakalusia mbu, “Obulafu yibwo busili n'nenywe hatututu. Chende olwa musili nobulafu, kho esiilima silekhe okhwitsa khwinywe, okhuba omundu nachendanga musiilima siamanyanga ahatsitsanga tawe.”

³⁶Kho, musubile mubulafu olwa musili nabwo, khe mube abandu bobulafu. Yesu niyakhamala okhuboola amang'ana yako yarulayo ma natsia okhwebisa.

³⁷Kata olwa yali niyakhola akamangalimwa amenji imbeli wabwe, sibasubila khuye tawe.

³⁸Kho Ling'ana liomuroobi Isaya yaboola liekhole, elia yali okhuboola; “Omwami niwina owasubila amang'ana kefwe? Niwina owo Mwami yabisul'la obunyalibwe?”

³⁹Khulwe yaka sibanyala okhusubila, sichila Isaya yali niyaboola khandi mbu,

⁴⁰“Nyasaye yababofusia tsimoni tsiabwe Niyekal'la amachesi kabwe, baralola netsimoni tsiabwe, khandi baramanya mumioyo chiabwe, kata barakalukhana nase nimbahonia tawe.”

⁴¹Amang'ana yaka Isaya yaboola, sichila yalola obukhongo bwa Yesu ma nal'loma khukaake.

⁴²Kata olwene yilwo, abenji khubakhulundu ba Bayahudi basubila khu Yesu; nebutswa khulwa okhuria Abafarisayi, sibayeribulanga kol'lani tawe, khase bakhahinibwa musinakoki,

⁴³okhuba bali okhuyanza ifuma yabandu okhuyomba ifuma ya Nyasaye.

⁴⁴Yesu yaboola nomwoyo omukali mbu: “Omundu osubilanga mu ise, siasubilanga mwise sienyene tawe nebutswa asubilanga mu uyo owaaruma.

⁴⁵Ne uyo oundolanga ise, khandi alolanga uyo owaruma.

⁴⁶Ise ndetsa okhuba obulafu musibala mbu omundu wosi niyakhasubila alekhe okhumenya musiilima.

⁴⁷Omundu wosi naba nahul'la amang'ana kanje ne narakakhola tawe, sindimukhalachila esiina tawe. Sindaitsa okhukhalachila abomusibala esiina tawe, nebutswa okhuhonia esibala.

⁴⁸Oufukulanga ise, narahuchil'la amang'ana kanje tawe, ali nende olimukhalachila esiina. Amang'ana aka ndaboola niko akalimukhalachila esiina khwitukhu liesihesi.

⁴⁹Yaka kali habwene sichila simboolanga khubwanje tawe, nebutswa Papa awaruma ise niye owandaka akangwan'ne okhuboola nokhul'loma.

⁵⁰Ne nase ndamanya mbu lilako lilie, lileranga obulamu bwe inziaiyo. Eliamboolanga nelia Papa yandachile okhuliboola.”