Read lunyore YOHANA 13 Bible Online

YOHANA 13 - lunyore bible

YOHANA 13

¹Lisabo lie Epasaka ndili ahembi okhwola, Yesu yamanya mbu esaa yiye eyokhurula musibala yisi okhutsia owa Papa yol'le. Yali niyayanza abaabe abali musibala, ma nabayanza buyanza okhwola khusihesi.

²Yesu nabechi baabe bali mbali mukhulia ebiokhulia biamukoloba. Setani yali namal'le okhura amakani kokhusiemana Yesu mumwoyo kwa Yudasi Isikariote, omwana wa Simoni.

³Yesu yamanya mbu Papa uwe wamuha obunyali bwosi mumakhono kaake, namanya mbu yarula owa Nyasaye, khandi akalukhanga khu Nyasaye.

⁴Kho niyenabula tsingubo tsitsie etsie ikulu nabukula esitambaya, niyeboha mus'sienje.

⁵Ma natsukha amaatsi mulutaabo, nachiaka okhusaaba ebilenje biabechi baabe, nabieya nesitambaya esiayali niyebohele.

⁶Natsia khu Simoni Petero, ne Petero naye namubool'la, “Omwami, ibe wakhasaaba mbwena ebilenje bianje?”

⁷Yesu namukalusia namubool'la, “Akakholanga ibe siomanyile luno; ne nomanye esifune siako olweinyumakhwo.”

⁸Petero namubool'la, “Siusaaba ebilenje bianje kata nahati.” Yesu namukalusia, “Nimba nirakhusaaba, sioli khandi omwechi wanje tawe.”

⁹Simoni Petero namubool'la, “Omwami, orasaaba butswa ebilenje bianje bionyene tawe, nebutswa khandi nende amakhono kanje nende omurwe kwanje.”

¹⁰Yesu namubool'la, “Omundu owesingile omubili kwosi nomusiiyikhu wosi, yenya butswa okhusaaba ebilenje bibie bionyene. Inywe mwesi muli abasiiyikhu narali mulala yenyene.” (

¹¹Yesu yali namanyile owanomusiemane; niko akachila naboola, bosi nabasiyikhu narali mulala yenyene.)

¹²Kho olwa Yesu yali niyakhabasaaba ebilenje, yebiikha tsingubo tsitsie etsieikulu ma nakalukha khumesa. Ma nabareeba, “Mumanyilisisie akamukholeye yaka?

¹³Inywe munanganga Omwibaali khandi Omwami, ne muboolanga habwene okhuba nimbwo Ise ndi.

¹⁴Ma ise nimba nimusaabile ebilenje bienywe, nase nindi Omwami khandi Omwibaali, khe kamuhel'le inywe okhusaabananga ebilenje bienywe.

¹⁵Muheye esimanyilo, singa obwa mukholeye, nenywe mukholenge mbwo.

¹⁶Mubool'langa tooto, abulaho omusumba oyombele omwami we; nohomba omurumwa oyombele owamuruma.

¹⁷Nimuba nimumanya amang'ana yaka, muli abeikhabi nimuba nimukakhola.

¹⁸“Simboolanga inywe mwesi tawe; manyile yabo abandeela. Nebutswa okhwola Akahandikwa kahesibwe mbu, ‘Olitsanga ebiokhulia bianje, yangalukhan'ne.’

¹⁹Mubooleye kano luno nikasili okhwekhola kho olwa kaliba ngekhol'le mulasubile mbu ‘Ise Nise Ye’

²⁰Mubool'langa tooto, Ouchil'langa omurumwa wanje, ahuchilanga ise; ne naye oumbuchil'langa, ahuchilanga uyo owali okhuruma.”

²¹Nyinga Yesu yali namal'le okhuboola yaka, yanyakhana muno mumwoyo, naribula kol'lani naboola mbu, “Mubool'langa tooto, mulala khwinywe nayasiemane!”

²²Abechi baabe nibahengana, nibaramanya owaral'le.

²³Naye mulala khubechi baabe owa Yesu yali niyayanza yali niyesetamisie khusilifu sia Yesu.

²⁴Kho Simoni Petero namusima, namubool'la, “Murebe aralanga yako khuwina.”

²⁵Omwechi uyo niyesetamia khu Yesu ma namureeba, “Omwami niwina?”

²⁶Yesu namukalusia, “Ni uyo owanzia okhuha esironje sino nimal'le okhutonjesia mulutaabo.” Ma natonjesia esironje mulutaabo ma naha Yudasi, Omwana wa Simoni Isikariote.

²⁷Olwa Yudasi yali namal'le okhubukula esironje yisio nilwo olwa Setani yamwinjilamwo. Yesu namubool'la, “Khola bwangu aka wenyanga okhukhola!”

²⁸Nebutswa siyaliho kata mulala khubali nibekhaye owamanya esiachila namubool'la mbwo tawe.

²⁹Okhuba abalala bakaala mbu olwa Yudasi yali omubiikhi womutata, khe Yesu amubooleye, akule ebindu ebienyekhanga khulwe Lisabo; nohomba ahanekhwo esindu khubabisandu.

³⁰Kho nyinga yali namal'le okhubukula esironje yisio yarula esioba bwangu. Olwene yilwo bwali nibuli butukhu.

³¹Nyinga Yudasi yali narul'le esioba, Yesu naboola, “Luno Omwana wo Mundu ufumiibwe, ne muye khandi Nyasaye ufumiibwe.

³²Nyasaye naba nafumibwa muye, kho Nyasaye alafumia Omwana wo Mundu muye omwene, ne alamufumia bwangu.

³³Abaana banje inywe, sili n'nenywe oluhono lutititi butswa. Muliiruna; nebutswa luno mubool'langa singa ndabool'la abakhongo ba Bayahudi, ‘Ahanzia ise, inywe simunyala okhwitsa yo tawe.’

³⁴Muhelesianga Lilako liyia, mbu Muyanzane. Singa obwa nase ndamuyanza nenywe khandi muyanzanenge mbwo.

³⁵Nimuba nimuli nobuyanzi abene khubene, kho abandu bosi bakhamanya mbu muli abechi banje.”

³⁶Simoni Petero namureeba, “Omwami, notsie hena?” Yesu namukalusia, “Owanzitsanga ise, ibe sionyala okhunondayo luno tawe; nebutswa olinondayo olweinyumakhwo.”

³⁷Petero namubool'la, “Omwami, busina sinyala okhukhulonda kata luno? Nderechekhele okhukhufwila.”

³⁸Yesu namukalusia naboola, “Siahene werechekhele okhuufwila ise? Khubool'langa tooto mbu, etaywa nesili okhulakula, nobe niundeyambakhan'ne esiakhataru mbu siumanyile tawe.”