Read lunyore YOHANA 14 Bible Online

YOHANA 14 - lunyore bible

YOHANA 14

¹Yesu yabool'la abechi baabe, “Murahenda emioyo chienywe tawe, Subile khu Nyasaye subile khwise khandi.

²Munyumba ya Papa wanje, bulimwo obukono obwinji, nase nzitsanga okhumulombela ahenywe. Kalaba nikarali mbwo khane sindakhamubooleye yaka tawe.

³Ne nimba ninzia okhumulombela ahenywe, ndikalukha okhumwenda mbu ahandiba nenywe mulibaho.

⁴Inywe mwamanya injila etsitsanga owanzitsanga.”

⁵Tomasi namubool'la, “Omwami, sikhumanyile ahotsitsanga tawe; kho khwakhamanya mbwena injila?”

⁶Yesu namukalusia naboola, “Ise nise, injila, nise akatooto, khandi nise obulamu. Omundu sianyala okhutsia khu Papa narabiriye khu ise tawe.

⁷Mulaba nimwamanya siahene, khane mumumanyile Papa wanje khandi. Okhurula olwaleelo inywe mumumanyile khandi mumulutsi.”

⁸Filipu namubool'la, “Omwami, okhumanyie khwo Papa tsana, ma kakhuhele.”

⁹Yesu namukalusia naboola; “Ndabeye n'nenywe mwesi oluhono yilu lwosi, ne ibe siumanyile tawe Filipu? Oundutsi ise khe uluutsi Papa. Busina nawe oboolanga, ‘Okhumanyie Papa?’

¹⁰Siosubilanga ise ndi mu Papa, ne naye ali mwise tawe? Amang'ana akamubool'langa, singaboolanga khubwanje tawe. Papa omenyanga mwise niye okholanga emilimo chichie.

¹¹Musubile ise olwamboola mbu ndi mu Papa, naye Papa ali mwise. Ngarali mbwo kho musubile khulwe emilimo chiene echiakholanga.

¹²Mubool'langa tooto, omundu osubilanga khwise, alikhola emilimo echiakholanga ise, naye alikhola emilimo emikhongo okhuyomba yichi, sichila nzia owa Papa.

¹³Ne liosi elia mwakhasaba muliira lianje ndilikhola, mbu Papa afumibwe khu Mwana.

¹⁴Nimuba nimusaba ling'ana liosi muliira lianje, ndakhalikhola.

¹⁵“Nimuba nimunyanza, mwakhakhola amalako kanje.

¹⁶Nase ndakhasaaya Papa wanje, naye yakhamuhelesia Omuhotselesia undi owakhabetsenje n'nenywe khasotso.

¹⁷Naye niye Omwoyo oribulanga akatooto khuka Nyasaye. Esibala sisinyala okhumuhuchil'la tawe sichila sisimulolanga, kata sisimumanyile tawe. Nebutswa inywe mwamumanya sichila amenyanga n'nenywe khandi aliba mwinywe.

¹⁸“Sindimulekha inywe mube abatiimi olwa nditsia tawe; ndikalukha khwinywe.

¹⁹Hasili hatututu, ne esibala sisilindola tawe; nebutswa inywe mulindola, ne sichila ise ndi nobulamu, inywe nenywe mwakhabe nobulamu.

²⁰Mwitukhu yilio mulimanya singa obwa ndi mu Papa, ne nenywe mwise, singa obwa nase ndi mwinywe.

²¹“Omundu ouchil'langa amalako kanje, nakakhola, uyo niye owanyanza. Papa wanje alimuyanza omundu ounyanzanga ise nase ndimuyanza ninderibula khuye.”

²²Ma Yudasi (orali Yudasi Isikariote tawe) namubool'la, “Omwami, kakhaba mbwena mbu oliebisula khwifwe, ne norebisula khusibala?”

²³Yesu nakalusia, “Omundu naba niyanyanza ise, yakhalonda amebaalo kanje. Papa wanje naye yakhamuyanza, ne Ise na Papa wanje khwakhetsa muye ne khwakhamenya n'naye.

²⁴Omundu oranyanzanga tawe, sialiondanga amebaalo kanje tawe. Ne amebaalo kene akamwahuliye yaka sikali akanje tawe, nebutswa karulanga khu Papa owaruma.

²⁵“Amang'ana kano mubooleye olwa simenyele n'nenywe.

²⁶Ne Omuhotselesia niye Omwoyo Omutsienukhu owa Papa aliruma muliira lianje; alimwibaal'la amang'ana kosi, namwitsusia amang'ana kosi akandamubool'la.

²⁷Omulembe nikwo okwamulekhelanga; omulembe kwanje omwene nikwo okwa muhelesia. Sikali ol'la esibala sihananga nambwo mbananga khwinywe tawe. Murahenda emioyo chienywe kata murarie tawe.

²⁸Mwahulila obwa ndali okhumubool'la, ‘Nzitsanga, nebutswa khandi ndikalukha khwinywe.’ Nimuba nimwanyanza mwakhasangala, sichila nzitsanga owa Papa; okhuba Papa nomukhongo okhuyomba ise.

²⁹Nase mubooleye luno nikasili okhwekhola, mbu nyinga kaliekhola, mulasubile.

³⁰Sindi namang'ana kandi amenji akokhumubool'la tawe sichila omukhongo wesibala yisi yetsanga. Siali nobunyali khwise tawe,

³¹nebutswa abomusibala okhwola bamanye mbu ndayanza Papa, ne singa Papa yali okhundaka, nimbwo kholanga. Hambe, khutsie khurule hano.