Read lunyore YOHANA 15 Bible Online

YOHANA 15 - lunyore bible

YOHANA 15

¹“Ise nise omusabibu kwatooto, ne Papa wanje niye omusimikhi khandi omulimili wakwo.

²Asosolanga siolusaka mu ise oluramanga ebiamo tawe, ne asiyanga siolusaka olwamanga ebiamo, kho lumetekhe okhwama ebiamo.

³Ne inywe nenywe musiyikhile khulwa amang'ana akandali okhumubool'la.

⁴Menye mubuhambani n'nase, nase ndamenya mwinywe. Olusaka silunyala okhwama ebiamo olwene nilurali khumusaala tawe. Nimbwo nenywe simunyala okhwama ebiamo nimuramenya mwise tawe.

⁵“Ise nise omusabibu, ne ninywe tsisaka. Omundu omenyanga mwise, nase nimenyanga muye, yamanga ebiamo ebinji sichila simunyala okhukhola ling'ana liosi sila ise tawe.

⁶Omundu naba naramenya mwise, afuubwanga esioba singa olusaka, ma luniale; ne abandu batsibunjelesia, nibatsifuuba mumul'lo, matsihia.

⁷Nimuba nimumenya mwise, ne amang'ana kanje nikamenya mwinywe, kho mulasaba eliamwenya, nenywe mulalinyoola.

⁸Mwing'ana yili Papa ahebwanga oluyali, mbu mwame ebiamo ebinji, nenywe mulaba abechi banje.

⁹Singa obwa Papa wanje yali okhunyanza ise, nimbwo nase ndamuyanza inywe; menye mubuyanzi bwanje.

¹⁰Nimuba nimukhola amalako kanje mulamenya mubuyanzi bwanje, singa obwa nase ndali okhukhola amalako ka Papa wanje, ma nimenya mubuyanzi bubwe.

¹¹“Mubooleye yaka kho obusangali bwanje bube mwinywe, ma obusangali bwenywe bwitsule.

¹²Lilako lianje ndielino mbu: Muyanzane, singa obwa nase ndamuyanza inywe.

¹³Obuyanzi obukhongo obwomundu ahaananga khubalina baabe nokhubafwila abalina baabe.

¹⁴Inywe muli abalina banje nimuba nimukhola akamulakanga.

¹⁵Sindamulanga abarumikhili khandi tawe, sichila omurumikhili siamanyanga akomwami uwe akholanga tawe. Nebutswa mulangile abalina, sichila ndamuribul'la kosi akandali okhuhul'la khu Papa wanje.

¹⁶Simuli ninywe abali okhunzela ise tawe, nebutswa nise owali okhumwela inywe, nimubiikha mutsie okhwama ebiamo ebinji, nebiamo bienywe bimenye. Kho Papa alimuhelesia liosi eliamusaba muliira lianje.

¹⁷Yaka niko akamulaka mbu: muyanzane.

¹⁸“Esibala nisiba nisimubihil'lwa, mumanye mbu siaranga okhumbihil'lwa ise.

¹⁹Nimwakhabeye abesibala, khane esibala siakhamuyanzile singa abenesio. Nebutswa sichila simuli abesibala tawe, nebutswa ndamwela okhurula musibala khulwe yako abomusibala bamubihil'lwanga.

²⁰Mwitsul'le ling'ana elia ndali okhumubool'la, ‘Omurumikhili siali omukhongo okhuyomba omwami uwe tawe.’ Nibaba nibali okhukhupia ise esibi, nenywe bakhamukhupie khusibi, nibaba nibali okhulonda amebaalo kanje, ne akenywe bakhakalonde.

²¹Nebutswa yaka kosi balimukhol'la, sichila muli abanje; okhuba sibamanya uyo owaruma ise tawe.

²²Ndaba owabula okhwitsa okhubol'lana n'nabo, khane sibakhaba nesikha tawe; nebutswa luno sibali nobwesambakasi khuketsimbi tsiabwe tawe.

²³Omundu oumbihil'lwanga ise, khe abihil'lwanga Papa wanje khandi.

²⁴Ndaba owabula okhukhola mumoni tsiabwe emilimo chiomundu undi arakhola khwo, khane sibali nesikha tawe, nebutswa luno baseyele okhulola khandi okhubihil'lwa ise nende Papa wanje fwembi.

²⁵Nebutswa yaka kali mbwo kho Akahandikwa mu Malako kabwe kahesikhe mbu; ‘Bamubihil'lwa sila esifune.’

²⁶“Omuhotselesia alitsa, Omwoyo obuulanga akatooto khuka Nyasaye khandi orulanga khu Papa. Niye owandiruma okhurula khu Papa, naye alingobokhela.

²⁷Nenywe khandi mulingobokhela sichila mwabeyenje n'nase okhurulana olwokhuranga.