Read lunyore YOHANA 16 Bible Online

YOHANA 16 - lunyore bible

YOHANA 16

¹“Mubooleye kho mulekhe okhwesiraala mubusubili bwenywe.

²Balimwilusia okhurula mutsisinakoki; khandi esaa yitsanga, eyomundu omwiranga inywe alikanakana mbu akhol'langa Nyasaye omulukha.

³Ne balikhola yako khwinywe sichila sibamanyile Papa, kata ise tawe.

⁴Nebutswa mubooleye amang'ana yaka, kho nyinga esaa tsana yakhoole, muletsul'le mbu ndali nindamubool'la. “Sindamubool'la amang'ana yako mukhuranga tawe, sichila ndali nisili halala n'nenywe.

⁵Nebutswa luno nzitsanga khuye owaruma, ne abulaho mulala khwinywe oureba ahanzitsanga.

⁶Ne luno olwa mubooleye yaka, emioyo chienywe chitsuye mwo esibeela.

⁷Nebutswa aka mubool'langa nakatooto. Nakobukhala khwinywe mbu khatimba nzie, okhuba nimba niratsia tawe Omuhotselesia siyakhetsa khwinywe tawe. Nebutswa nimba ninzia, namurume khwinywe.

⁸Naye, nyinga yakhetse, alibuula khubomusibala mbu bali nesikha khutsimbi tsiabwe, nende khubulunji, nende khukokhukhalaka khwa Nyasaye khwesiina.

⁹Bali nesikha khutsimbi sichila sibasubila khu ise tawe;

¹⁰bali nesikha khukobulunji, sichila nzitsanga owa Papa, ne simulindolakhwo khandi tawe;

¹¹ne bali nesikha khu kokhukhalaka esiina, sichila omukhongo wesibala yisi umal'le okhukhalachilwa esiina.

¹²“Sili namang'ana amenji akokhumubool'la, nebutswa simuli abanyala okhukahul'la luno tawe.

¹³Nebutswa nyinga Omwoyo watooto obuulanga akatooto khuka Nyasaye aliba niyetsele, alimwemel'la mukatooto kosi. Sialiboola khubunyali bubwe akaake omwene tawe; nebutswa alil'loma khu yako akahul'langa khandi alimuribulila amang'ana kosi aketsa okhukwa.

¹⁴Yakhambelesia oluyali sichila alabukula khukanje namuribul'la.

¹⁵Kosi aka Papa ali n'nako nakanje; niko akachila nimboola, abukulanga khukanje, namuribulila.

¹⁶“Hasili hatututu, simulindola tawe, khandi hasili hatututu mulindola.”

¹⁷Abechi baabe nibarebana abene, “Ning'ana sina aliakhubol'langa, ‘Hasili hatututu simulindola tawe, ne khandi hasili hatututu mulindola’ khandi aboolanga mbu ‘Kali sichila nzitsanga owa Papa.’ ”

¹⁸Ma nibaboola, “Ning'ana sina eliaboolanga, ‘Hasili hatututu?’ Sikhumanyile eliaboolanga tawe!”

¹⁹Yesu yamanya mbu benya okhumureeba ling'ana, kho yababool'la, “Murebananga aka ndali okhumubool'la mbu ‘Hasili hatututu ne inywe simulindola, khandi hasili hatututu ma mulindola?’

²⁰Mubool'langa tooto, inywe mulilakaya khandi muliekhuula, nebutswa nabo abomusibala balisangala; ne inywe mwakhabe nesibeela, nebutswa esibeela sienywe silikalukhanibwa okhuba obusangali.

²¹Omukhasi nalumwanga abetsanga nesibeela, sichila esaa yiye eyeinumwa yol'le; nebutswa namal'le okhwibula omwana, siyetsul'langa khandi okhusalila khwe tawe, okhuba asangalanga mbu omwana omutoro wibuywe musibala.

²²Nimbwo kali khwinywe; luno muli nesibeela; nebutswa ndakhamulole khandi, ne mulisangala mumioyo chienywe, obusangali tsana abulaho owakhabuhinie khwinywe.

²³“Mwitukhu tsana simulisaba esindu kata silala. Siahene, siahene mubool'langa, Papa, yakhamuhe esindu siosi esia mwakhamusabe muliira lianje.

²⁴Musili okhusabakhwo esindu siosi muliira lianje; sabe nenywe mulanyoola, kho obusangali bwenywe bwitsule.

²⁵“Rumikhiye tsingano okhumubool'la amang'ana yaka. Nebutswa inyinga yitsanga eya ndibula okhuboola n'nenywe mutsingano tawe, nebutswa ndibool'lana n'nenywe kol'lani khumang'ana ka Papa.

²⁶Litukhu tsana niliol'le, mwakhasaaye khu Papa muliira lianje; ne simubool'langa mbu, ndakhamusaayile khu Papa tawe;

²⁷sichila Papa mwene wamuyanza. Amuyanzanga sichila inywe mwainyanza ise, khandi mwahuchil'la mbu ndarula khu Nyasaye.

²⁸Ndarula khu Papa, ninzitsa musibala; khandi, rulanga musibala ninzia khu Papa.”

²⁹Abechi baabe nibamubool'la, “Oboolanga kol'lani luno, ne siobool'langa mutsingano tawe.

³⁰Luno khwakhamanya mbu wamanya amang'ana kosi, ne sikahel'le omundu akhurebe amang'ana tawe. Khwing'ana yili khusubilanga mbu Ibe warula khu Nyasaye.”

³¹Yesu nabakalusia mbu “Luno musubilanga noho?

³²Esaa yitsanga ne eyatsana yamala okhwola, nyinga mulisalanibwa, siomundu owabwe, ne mulindekha ise sienyene. Nebutswa sindi sienyene tawe, sichila Papa ali halala n'nase.

³³Mubooleye, amang'ana kano mbu mube nomulembe khulwo khuhambana mwise. Esibala nasimukhupie esibi, nebutswa mulume ikholo okhuba ise mal'le okhuleka esibala!”