Read lunyore YOHANA 17 Bible Online

YOHANA 17 - lunyore bible

YOHANA 17

¹Olwa Yesu yali namal'le okhuboola amang'ana yaka yatikul'la tsimoni tsitsie khwikulu, naboola, “Papa, esaa yol'le! Ofumie Omwanawo, mbu Omwana naye akhufumie ibe.

²Okhuba wamuha obunyali khubandu bosi, mbu abahelesie obulamu oburahwaho yabo bosi aba wali okhumuha.

³Nabwo obulamu oburahwaho nibwo yibu; bakhumanye ibe wenyene Nyasaye watooto, khandi bamumanye Yesu Kristo owa waruma.

⁴Ise ndakhufumia hano musibala, mal'le okhukhola omulimo okwa wamba okhukhola.

⁵Nawe luno, Papa, ufumie khububwo nobukhongo obwa ndali n'nabwo halala n'nawe esibala sisili okhulombwa.

⁶“Ndakhuribula ibe khubandu aba wali okhumba khubomusibala. Balinji abandu baabo, nawe wamba mbu baabe abanje. Bafumila ling'ana liilio.

⁷Luno bamanyile mbu amang'ana kosi aka wali okhumba karula khuibe.

⁸Ndababool'la amang'ana akawamba; nabo nibakafumila, nibamanya siahene mbu ndarula khuibe, ma nibasubila mbu niwe owaruma.

⁹“Nase mbasaayilanga. Sisaayilanga abesibala, nebutswa saayilanga abawamba yaba; sichila nabandu baabo.

¹⁰Bosi abali abanje nabaabo ne abaabo bosi nabanje; ne oluyali lwanje lumanyibwanga mubo.

¹¹Nase sindi musibala khandi tawe, nebutswa yaba bo basili musibala, ne ise nzitsanga owooli. Papa Omutsienukhu, obalinde mubunyali obweliira lilio, elia wali okhumba mbu baabe mulala, singa obwa ibe n'nase khuli mulala.

¹²Nyinga ndabeyenge halala n'nabo, ndabalindilenge mubunyali bweliira lilio, elia wali khumba. Nase ndabalindilenge ne abulaho mulala khubo owakora, narali omwana owakhalachilwa okhukora, kho Amahandiko kahesikhe.

¹³Nebutswa ngalukhanga khuibe, ne yaka mboolanga musibala mbu betsule nobusangali bwanje mumioyo chiabwe.

¹⁴Ndabahelesia amang'ana kaako; ne abomusibala bababihil'lwa, sichila bo sibali abomusibala tawe, singa obwa nase rali owomusibala tawe.

¹⁵Sisaayanga obabukule okhurula musibala tawe, nebutswa mbu obasoole okhurula khumubi.

¹⁶Sibali abesibala, singa obwa nase rali owesibala.

¹⁷Obatsienule mukatooto; amang'ana kako niko akatooto.

¹⁸Singa obwa waaruma ise musibala, nase nimbwo mbarumanga musibala.

¹⁹Ne khulwabwe ndetsienula omwene khuibe, nawe obatsienule mukatooto.

²⁰“Sisaayilanga yaba bonyene tawe, nebutswa yabo khandi abaliisubili ise okhubir'ra mumang'ana kabwe.

²¹Saayanga mbu bosi babe mulala, singa obwe ibe, Papa, obetsanga mwise, nase nimbetsanga mwibe, kho nabo babe mwifwe; kho esibala sisubile mbu khane niwe owaruma.

²²Ndabahelesia oluyali olwa wambelesia kho babe mulala, singa obwa ise n'nawe khuli mulala:

²³ise mbe mubo, nawe obe mu ise, kho bahambanibwe kupu babe mulala; mbu abomusibala bamanye mbu nibe owaruma, khandi wabayanza singa obwa wanyanza ise.

²⁴“Papa, nyenyanga yabo abawamba babe halala n'nase ahamba nindi, kho baabe abanyala okhulola obukhongo bwanje, obwa ibe wamba, sichila wali okhunyanza esibala nisisili okhulombwa.

²⁵Papa wobulunji, esibala sisiakhumanya ibe tawe, nebutswa ise ndakhumanya; khandi yaba bamanya mbu wali okhuruma.

²⁶Ndakhubisula khubo, khandi ndatsilil'la okhukhola mbwo, kho obuyanzi obwa wanyanza bubetsenge mubo nase khandi mbetsenge mubo.”