Read lunyore YOHANA 2 Bible Online

YOHANA 2 - lunyore bible

YOHANA 2

¹Ne khwitukhu liakhataru sialiho es'selelo Mwitaala lia Kana lia Galilaya, ne nyina Yesu yali naliho,

²khandi Yesu nende abechi baabe bali nibalangilwe mus'selelo tsana.

³Olwe ewaini yali nehweye nyina Yesu namubool'la, “Ewaini yabwe ihweye.”

⁴Yesu namukalusia, “Mama busina unyinjisianga mumang'ana yaka? Inyinga yaanje esili okhwola.”

⁵Yaho nyina Yesu nabool'la abarumikhi, “Liosi eliayetsa okhumubool'la mulikhole.”

⁶Ne tsialiho tsisikha tsisasaba tsiamachina nitsirenjekhele singa ifwo ya Bayahudi eyokhwesaaba, sindala yahelanga etsiliita emia ndala.

⁷Yesu nabool'la abarumikhi “Mwitsusie amaatsi mutsisikha yitsi.” Ma nibetsusia okhwola khuminwa.

⁸Ma nababool'la, “Tahekhwo luno, muhil'le omukhulundu osinjiliye es'selelo.” Nibamuhil'la amaatsi

⁹akali nikakwiye ewaini, naye omukhulundu wes'selelo yatsanzamakhwo, Ne naramanya aherul'le tawe. (Nebutswa abarumikhili abataha amaatsi bo bamanya); omukhongo wes'selelo nalanga omusaatsa mwene s'selelo,

¹⁰namubool'la, “Abandu bosi baranganga okhuler'ra abacheni ewaini indahi, ma abandu nibaseyele okhunywa muno, khe balera erali indahi. Nawe wali okhubikha ewaini indahi okhwola luno!”

¹¹Isio nisio esilolelo siamangalimwa siokhuranga esia Yesu yakhola mu Kana lia Galilaya okhumanyia obunyali buubwe, ma abechi baabe nibasubila khuye.

¹²Inyuma wakene yako, yatsia Kaperinaumu, omwene, na nyina we, nabaana babwe, nabechi baabe, nibabayo amatukhu matititi.

¹³Epasaka ya Bayahudi yali neli ahembi, kho Yesu yatsia Yerusalemu.

¹⁴Nalola mu Hekalu yabo abali nibarundanga tsing'ombe namakondi namakhulwi, nende yabo abali nibasilanianga efetsa nibekhaye.

¹⁵Nabasa olukhoba lwemikoye nakhunga etsisolo tsiosi okhurula mu Hekalu, amakondi nende tsing'ombe, nasundulania efetsa eya bali nibasilanianga, nafung'amia etsimesa tsiabwe;

¹⁶nabool'la yabo abali nibakusianga amakhulwi, “Hinie yako muno! Murakhola inyumba ya Papa wanje inyumba yobukhala tawe!”

¹⁷Abechi baabe nibetsul'la obwa Amahandiko Amatsienukhu kaboolanga, “Obuyanzi bwanje khu inyumba yiyo bwatukhanga mwise singa omul'lo.”

¹⁸Abakhongo ba Bayahudi bamukalusia nibamureeba, “Nakamangalimwa sina akonyala okhukhola okhumanyia mbu oli nobunyali okhukhola yaka?”

¹⁹Yesu nabakalusia, “Sambule Ehekalu yiyi, nase mumatukhu kataru ndakhachisinjisia khandi.”

²⁰Kho Abayahudi nibaboola, “Emihika amakhumi kane nachisasaba Ehekalu yiyi niyombokhwanga, nawe wakhachisinjisia mbwena mumatukhu kataru?”

²¹Nebutswa Ehekalu eya Yesu yal'lomangakhwo nomubili kukwe.

²²Kho Olwa Yesu yasimukusibwa okhurula mubafu, abechi baabe nibetsul'la mbu yali niyaboola yako, ma nibasubila Amahandiko Amatsienukhu nende ling'ana lia Yesu yali nabooye.

²³Luno olwa yali nali mu Yerusalemu khwitukhu lie Pasaka, abandu abenji basubila muye, olwa balolanga akamangalimwa aka yali nakholanga.

²⁴Nebutswa Yesu siyayehana khubo, sichila wamanya abandu bosi.

²⁵Khandi siyaruna omundu wosi okhumubool'la amang'ana komundu wasie tawe okhuba omwene yali namanyile akali mumioyo chiabandu.