Read lunyore YOHANA 20 Bible Online

YOHANA 20 - lunyore bible

YOHANA 20

¹Khwitukhu liomwihonga Mariamu Magadalena yahuuna hasilindwa mbusili butukhu, nalola lichina (eliali ndikaliywe esilindwa) nilihinibwe khusilindwa.

²Kho natsia tsimbilo, niyoola khu Simoni Petero, nende khumwechi undi owa Yesu yali niyayanza, nababool'la mbu “Bahinisie Omwami, musilindwa, ne sikhumanyile aha bamureye tawe.”

³Kho Petero narula, halala nende omwechi undi uyo, nibatsia enasilindwa.

⁴Nibelukha bombi, ne omwechi undi uyo nayomba Petero, naranjil'la okhwola hasilindwa.

⁵Niyenama nahenjel'la musilindwa, nalola tsingubo tsiekatani nitsieyalisiisiemwo, nebutswa siyainjilamwo tawe.

⁶Ma Simoni Petero naye niyoolaho namulondanga, ye niyenjila musilindwa. Nalola tsingubo tsiekatani nitsieyalisiisiemwo,

⁷nende esitambaya esiali khumurwe kwa Yesu. Esitambaya tsana sisiali nisikon'ne netsingubo tsiekatani tawe, nebutswa siali nisifumbilwe nisibiikhilwe lukano.

⁸Ma omwechi undi uyo owali naranjiliye okhwola hasilindwa naye niyenjilamwo; nalola ma nasubila. (

⁹Bali nibasili okhumanyilisia akahandikwa, akaboolanga mbu kamuhel'le asimukukhe okhurula mubafu.)

¹⁰Ma abechi bamala nibahunzukha owabwe khandi.

¹¹Mariamu yali nasinjiye hasilindwa nalakayanga. Ne olwa yali mwilakaya, niyenama nahenga musilindwa;

¹²nalola abamalaika babili abebikhile tsingubo tsindafu nibekhaye homubili kwa Yesu kwali nikwalisibwenge, mulala hamurwe ne undi enabilenje.

¹³Abamalaika nibamureeba, “Omukhasi, olakayanga busina?” Nabakalusia, “Bahil'le Omwami wanje, ne simayile habamureye tawe!”

¹⁴Olwa yaboola yaka, nasukhana emukongo nalola Yesu usinjiyeho; ne siyamanya ni Yesu tawe.

¹⁵Yesu namureeba, “Omukhasi, olakayanga busina? Orunanga wina?” Naye, nakalanga en'no nomulindi womukunda, namubool'la, “Noba noli niwe omubukuye, mbool'la ahomureye, nase ndakhamubukula.”

¹⁶Yesu namubool'la, “Mariamu!” Naye niyesebukha, namubool'la mu Luheburania, “Raboni!” (Elibetsanga, “Omwibaali.”)

¹⁷Yesu namubool'la, “Orandumbakhwo tawe okhuba sili okhwanichila owa Papa; nebutswa tsia khubamwabo banje, obabool'le, Ise nzanichilanga khu Papa wanje, ouli Papa wabwe, Nyasaye wanje khandi Nyasaye wabwe.”

¹⁸Mariamu Magadalena natsia nabool'la abechi mbu uluutsi Omwami khandi singa obwa yali namubooleye amang'ana yako.

¹⁹Kwali omukolooba kwelitukhu liomwihonga yilio, abechi bali nibebunjikhile munyumba halala, ne emiliango chiali nichikaywe sichila bali nibariye abemeli ba Bayahudi. Ma Yesu niyetsa, nasinjila hakari wabwe, nababool'la, “Emilembe chibe khwinywe!”

²⁰Olwa yamala okhuboola yako, nabamanyia amakhono kaake nende mumbafu mwe. Abechi yabo nibayanza okhusila okhulola Omwami.

²¹Yesu nababool'la khandi, “Emilembe chibe n'nenywe; singa obwa Papa yaaruma, nimbwo nase murumanga inywe mbwo.”

²²Nyinga yaboola yako mbwo, yabahel'la emiiya, naboola, “Mubukule Omwoyo Omutsienukhu.

²³Nimulekhela abandu tsimbi tsiabwe, balalekhelwa; nimurabbalekhela tawe sibalalekhelwa tawe.”

²⁴Tomasi, mulala khubechi likhumi nababili, owalangwa Mukhwana, siyali halala nabechi bandi olwa Yesu yetsa yilwo tawe.

²⁵Kho abechi bandi bamubool'la, “Ifwe khuluutsi Omwami!” Ne naye nababool'la, “Ise sindakhasubila khwo nisili okhulola tsimbala tsiemisimari mumakhono kaake, nindiilamwo nesitere sianje mutsimbala tsana, ma nimamba mumbafu mumwe nomukhono kwanje tawe.”

²⁶Kho inyuma wamatukhu munane abechi yabo bali halala khandi munyumba, Tomasi nali n'nabo. Emiliango njiba chikaye, nebutswa Yesu niyetsa nasinjila hakari wabwe, naboola; “Emilembe chibe khwinywe.”

²⁷Kho nabool'la Tomasi, “Ra esitere sisio hano olole emikhono chianje, khandi onyiile omukhono kukwo, ohambe mumbafu mwanje. Olekhe honzoni yiyo, ma osubile.”

²⁸Tomasi namukalusia, “Omwami wanje khandi Nyasaye wanje.”

²⁹Yesu namubool'la, “Osubilanga sichila unduutsi? Nabeikhabi abasubilanga mbasili okhundola.”

³⁰Kaliho akamangalimwa kandi amenji aka Yesu yakhola mumoni mwabechi baabe akarahandikwa musitapu yisi.

³¹Nebutswa yaka kahandikwa mbu musubile Yesu niye Masihi, Omwana wa Nyasaye; kho mukhusubila khwenywe muye mube nobulamu.