Read lunyore YOHANA 21 Bible Online

YOHANA 21 - lunyore bible

YOHANA 21

¹Inyuma we yako Yesu yalolekha khandi khubechi baabe khunyanza ya Tiberia. Kekhola singa mbu:

²Simoni Petero, na Tomasi oweliira lindi Mukhwana nende Netsaneli okhurula Kana lia Galilaya, nende abaana ba Sebedayo nende abechi ba Yesu bandi babili bali bosi halala.

³Simoni Petero nabool'la abasie: “Nzie okhuluba.” Nibamubool'la, “Nefwe khulatsia halala n'nawe.” Nibatsia, nibaniina muliaro; ne obutukhu yibwo sibaluba esindu tawe.

⁴Nyinga bwali nibwakhasia, Yesu yasinjila khuluchinga; nebutswa abechi sibamanya mbu ni Yesu tawe.

⁵Kho Yesu nabareeba mbu, “Abasiani, musili okhulubakhwo esindu siosi?” Nibamukalusia nabo, “Kata ndala tawe.”

⁶Nababool'la mbu, “Fuube likoko lienywe enamukhono musaatsa kweliaro, ne mulalubakhwo.” Kho nibafuuba mbwo, ne sibanyala okhulikhwesa tawe sichila bali nibatil'le tsisutse tsinyinji.

⁷Ma omwechi undi ula owa Yesu yayanza nabool'la Petero mbu, “No Mwami!” Olwa Simoni Petero yahulila mbu no Mwami, yebiikha ekanzo yiye, (sichila yali nali esiehechenye,) niyekhupa mumatsi.

⁸Abechi bandi baniina khuluchinga muliaro nibakhulula likoko lietsisutse. Sibali ehale nende oluchinga tawe; lwali oluchendo oluhela etsimiita emia ndala.

⁹Nyinga boola khuluchinga, balola amanda komulilo, ne tsisutse nitsisianikhiywe khuko, nende emikati khandi.

¹⁰Yesu nababool'la, “Lere khutsisutse tsiamwakhaluba luno.”

¹¹Simoni Petero naniina muliaro, ma nakhwesa likoko okhuleera khuluchinga nditsuye mwo tsisutse tsingali emia ndala nende amakhumi karano natsitaru, ne kata olwa tsiali tsinyinji mbwo, likoko siliakhalikha tawe.

¹²Yesu nababool'la, “Hambe Mulie.” Ne siyaliho kata mulala khubechi baabe yabo owateema okhumureeba, “Niwe wina?” tawe. Bali nibamanyile mbu no Mwami.

¹³Yesu niyetsa, nabukula omukaati, nabaha, khandi tsisutse mbwo.

¹⁴Yilwo nilwo olwakhataru Yesu nalolekha khubechi baabe inyuma wokhusimukukha.

¹⁵Nyinga bamala okhulia, Yesu yabool'la Simoni, “Simoni Petero, omwana wa Yona, wainyanza okhuyomba abandi yaba?” Namukalusia “Yee, Omwami; ibe wamanya mbu ise ndakhuyanza.” Yesu namubool'la, “Waaye ebimeme biamakondi kanje.”

¹⁶Yesu namubool'la khandi olwakhabili, “Simoni, omwana wa Yona, wainyanza?” Namukalusia, “Yee, Omwami; ibe wamanya mbu ndakhuyanza.” Yesu namubool'la, “Waaye amakondi kanje.”

¹⁷Yesu namubool'la olwakhataru, “Simoni, omwana wa Yona, Wainyanza?” Petero nabeelela, sichila umurebele esiakhataru, “Wainyanza?” Namukalusia, “Omwami, ibe wamanya amang'ana kosi, umanyile mbu ndakhuyanza.” Yesu namubool'la, “Waaye amakondi kanje.

¹⁸Khubool'langa tooto, olwa wali nosili omubuukha, walinji okhweboha, notsia hosi aha wenyele; nebutswa nyinga olisakhula, olilambisia amakhono kaako ma omundu undi alikhuboha, nakhuhila ahorenyele tawe.”

¹⁹Yaka yaboola, okhumanyia okhufwa khwa Petero nafumia Nyasaye mukhwo. Ma Yesu namubool'la, “Nonda.”

²⁰Petero yasukhana, nalola omwechi wa Yesu yali niyayanza namulondanga, naye niye owali okhwesetamia ahembi khu Yesu khubiokhulia biamukolooba namubool'la, “Omwami, niwina owanokhusiemane?”

²¹Nyinga Petero yamulola nareeba Yesu, “Omwami, omundu uyu naye akhole sina?”

²²Yesu namukalusia, “Nindakhenya alinde ndaluhe ndetse, nako kali sina khuibe? Ibe nonda.”

²³Kho ling'ana yili lialanda khubalondi ba Yesu mbu Omwechi uyo sialifwa tawe. Nebutswa Yesu siyali namubooleye siyakhafwe tawe, nebutswa, “Nimba ninyenya alinde ndaluhe ndetse kali sina khuibe?”

²⁴Omwene uyu niye omwechi watsana okobokhelanga amang'ana kano, khandi niye owakahandika, nefwe khwamanya obukobokheli bubwe nobwatooto.

²⁵Ne biliho ebindu bindi ebinji ebia Yesu yali okhukhola, bilala ebiakhahandichilwe silala silala, ngalanga khane kata esibala siene siakhaleemele ahebitapu biatsana biakhabiikhilwe, nibiakhahandichilwe.